Utendi 6 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwiĩĩkua mumulĩmo naamupũngati

¹ Pantondo zaasio pĩna ĩamanigua alĩ iongeeleka iyalo liao, ĩAyahũdi a kĩGiliki alĩ akuang'ung'untĩlia ĩAebũlania, kunsooko mumeelele alĩ aagumanĩlĩĩlie ĩakiĩlua aao muoomoelua.

² Naikyumi naabĩlĩ naamĩlundĩĩla ĩnkaami ya amanigua naaũga, “Sika yukũjĩpĩĩle ishie kuleke kwitanantia uLukaani lwa kĩNzua nukukĩtuma umulĩmo pandia.

³ Luulo gua anũna ĩĩtu, muasaagule antu mupũngatĩ pakatĩ yaani, ĩa lukũmo naluuza, naijulue nuMuau nĩmasala, kuaĩĩke mumulĩmo uu.

⁴ Ishie gua kukakĩkamatĩkia muulompi nukukulutanantia uLukaani.”

⁵ uLukaani ulu nalualoeelia ĩanamulundo, naamusaagula uSitepano, muntu naalĩ wijuile uusuĩĩli nuMuau Muelu, nuPilipo, nuPolokolo, nuNikanoli, nuTimoni, nuPalimena, nuNikolao naalĩ mutiati wa wĩtekeli wa kĩYahũdi, nupũnile kuAntiokia.

⁶ Awa naaĩĩmĩkia ntongela ya atumua, naalompa, naaĩĩka ĩmĩkono yaao mumuao.

⁷ uLukaani lwa kĩNzua nalusapatĩla, niyalo lya amanigua naliongeeleka zigi-zigi mũYelusalemũ, nĩapolia iingĩ naaugombia uUsuĩĩli.

Kwiguĩlua kwa kĩSitepano

⁸ NuSitefano namwijulue nuukende ningũlũ, alukutendaa ĩmakula namakulu niilĩngasĩĩlio pakatĩ ya antu.

⁹ Paapo ityũmpĩ lya aasio naalĩ ishũnagogi naalĩ lyukuĩtaguaa lya Akolelua nĩlya Akilene nĩlya Alekizandelia, nĩaasio kwipũna kuKilikia nĩAsia, naĩĩmĩka kukĩkunguma nuSitepano.

¹⁰ Ĩpa sika naasũũma kukĩkunguma nĩmasala muna uMuau alukumupambĩla.

¹¹ Paapo naaasisikĩĩlia ĩantu, naalĩ aũgile, “Kwamũgyũlagiaa umuntu uyu witambula inkaani za kumutukĩla uMusa nuNzua.”

¹² Naaalũangĩla ĩantu nĩanampala nĩalangi; naamuagaana, naamuguĩla, naaamutuala kuntongela ilindĩ,

¹³ naĩĩmĩkia ĩakuĩli a ulongo, naalĩ aũgile, “uMuntu uyu sikukulekaa kwitambula iinkaani za kusiita Pana yeelu nuUlagĩĩlio;

¹⁴ kuitĩ kwamũigagiaa witambula ya kĩna uyo ũYesu Munazaleti ukitaula ĩpa nukwikaĩla intendo naalĩ kuapeegue nuMusa.”

¹⁵ Tũlũ ensi naalĩ ikyalansile pilindĩ naamutuupĩĩla naamuona uusiu waakue zĩ usiu wa kĩmalaĩka.