Utendi 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uPetelo nuYohana ntongela ilindĩ

¹ Pĩna alĩ kĩlĩ akĩtambuĩla nĩantu, ĩapolia numukulu wa numba ya kĩNzua, nĩAsadukayo naaaagaana.

² Naaĩĩpĩlua kunsooko akuamania ĩantu nukwitanantia mwa kĩYesu uwiiuki wa akiu.

³ Naaaguĩla, naaaĩĩka mukĩtũngo sunga mudaau, kuitĩ alĩ yaazaa mpĩndĩ.

⁴ Ĩpa muaasio naalĩ igyũũlie ulukaani, iingĩ naasuĩĩla; ĩagoosia dũũ alĩ zĩ magana ma nzogũ mataano.

⁵ Pĩna naweela, ĩakulu nĩanampala nĩalangi naĩilingĩĩla kũYelusalemũ,

⁶ nuAnasi umupolia namukulu, nuKayapa nuYohana nuAlekizando, nĩndĩo ensi naalĩ a kĩntua numupolia namukulu.

⁷ Pĩna naaaĩĩka pakatĩ, naaakolia, “Kungũlũ kĩ nukuliina lya kuani, inie mumatendile aya?”

⁸ Paapo uPetelo namũjulue nuMuau Muelu nuaĩĩla, “Inie akulu a antu nianampala a aĨsilaeli,

⁹ kanga kukoligue nantende mumpola za utendi nauuza naalĩ mutendelue umunakĩtele, kunzĩla kĩ alĩ mukamigue,

¹⁰ mumane inie tũlũ nĩantu tũlũ a Ĩsilaeli kĩna kuliina lya kĩYesu Kilisito Munazaleti naalĩ mumukonontelĩĩle inie mumusalaba, uzo uNzua numũiukia kwipũna muakiu; kwa kĩuyo umuntu uyu wĩĩmĩkile mupanga ntongela yaani.

¹¹ Uzo muene gyũe naalĩ mulĩsiitile inie azengi, ndĩlo lialĩĩ igyũe kyulu lya kuluũno.

¹² Kangĩ kutilĩ kaugũnua kunuĩngĩ kaumuĩ, kuitĩ kutilĩ kaliina naliĩngĩ nsĩlĩlĩ igyulu naalĩ apeegue ĩantu nalyukũjipĩĩle ishie kwigũnua nĩndĩlo.”

¹³ Pĩna naauona uukamatĩkũ wa kĩPetelo nuYohana, nukwilĩnga kĩna alĩ antu udũũ nasika amanigue, naakulĩlua, naalĩnga kĩna alĩ yĩensi nũYesu.

¹⁴ Ĩpa naamuona umuntu naalĩ mukamigue wĩĩmĩkile palumuĩ nĩndĩo, naaulia kalukaani lwa kushookeelia.

¹⁵ Pĩna naaalagĩĩlia apũne mũlindi, naalonga ĩkialo eene kuene,

¹⁶ naaũga, “Kuatendele yaani ĩantu ĩa? Kuitĩ yĩkualiĩ kuantu tũlũ naĩkikyalaa mũYelusalemũ kĩna kĩlĩngasĩĩlio kĩkulu kĩtendue nĩndĩo, sunga sika kusũũmile kukukĩkaana.

¹⁷ Ĩpa koona lukaani lulekishapatĩla kuantu, kwĩoopookie alekitambula kangĩ kumuntu kaumuĩ kuliina ĩlĩ.”

¹⁸ Naaĩĩta, naaalagĩĩlia alekitambula kalukaani kangĩ alekimania muliina lya kĩYesu.

¹⁹ Ĩpa uPetelo nuYohana naashookeelia naaaĩĩla, “Kanga ĩkulukuuluu ntongela ya kĩNzua kukumũigia inie kwikĩla uNzua, lamulĩ uniinie;

²⁰ kuitĩ ishie sika kusũũmile kwileka kukuzitambula impola naalĩ kuzioonie nukukuziigia.”

²¹ Pĩna naakondia kukuoopookia naaatũnguĩla; sika naaona nzĩla ya kukuakaasĩlia kunsooko ya antu, kuitĩ ĩantu ensi alĩ akumukulia uNzua kuluasio naalĩ lutendekile.

²² Kuitĩ umuntu naalĩ mutendelue ĩkĩlĩngasĩĩlio kya kukamigua, ĩmiaka yaakue alĩ ĩkĩlile makumi manĩĩ.

uPetelo nuYohana ishooka kuasuaĩĩa

²³ Pĩna naatũnguĩlua naenda kuantu aao, naaaganuĩla impola zensi naalĩ aĩĩlue nĩapolia naakulu nĩanampala.

²⁴ Ndĩo pĩna naiigia, naĩtunta induli zaao kunkolo ĩmuĩ kwa kĩNzua, naaũga, “Shekulu, ue ingĩ uue naalutũndile igyulu nĩnsĩĩ, nanza niintu tũlũ yensi naikoolĩ muasio.

²⁵ ninduue kumulomo wa kĩtata wĩĩtu Daudi, mwĩtumi waako, alutambuĩle kungũlũ za kĩMuau Muelu, ‘Nĩkĩ indugu nazĩngĩ zikalamukĩlana Nĩantu asĩĩgile ĩza nakanda?

²⁶ ĩAtemi a muna nsĩĩ ĩkitinkĩlĩĩlie Nĩakulu ndĩo akomilie ĩkialo Amusiite ũShekulu nuKilisito waakue.’

²⁷ Kuitĩ tai, uHelode nuPontia Pilatu palumuĩ nindugu nazĩngĩ nĩaantu a Ĩsilaeli naakĩkomia ĩkialo mukaa ĩĩ mumpola za Mwĩtumi waako naMuelu Yesu naalumupakile ĩmakũta,

²⁸ atende mensi namĩkono.

²⁹ Ĩpaino, Shekulu, alaae uoopookia waao, uapeele ĩĩtumi aako atambule ulukaani luako kuukamatĩkũ wensi,

³⁰ pĩna winansula umukono waako kwikamia, niilĩgasĩĩlio nĩmakula matendeke muliina lya Mwĩtumi waako Muelu Yesu.

³¹ Pĩna naakondia kwilompa, umuasio muna alĩ ĩlundĩlĩĩle naishũngũsigua, tũlũ naijulua nuMuau Muelu, naatambula ulukaani lwa kĩNzua kuukamatĩkũ.”

Mbĩĩka ya nsangĩ

³² iYũmbĩ lya aassio naalĩ asuĩlĩĩle, ĩmioo yaao ninkolo zaao nazitũla umuĩ sunga ukutilĩ nunumuĩ naaluũgile kĩna kĩntu kiensi naalukĩtĩĩte ingĩ nsao yaakue umuene, ĩpa intu yensi alĩ ya nsangĩ.

³³ Nĩatumua naapũnia uukuĩli wa wiiuki wa kĩShekulu Yesu kungũlũ ningĩ, nuukende wingĩ nawĩĩma mumiao tũlũ.

³⁴ Kuitĩ ukutilĩ nunumuĩ pakatĩ yaao naalĩ muulĩlue kakĩntu, kunsooko ĩaasio naalĩ atĩĩte ĩmĩgunda katia numba alĩ akugulagiaa naatuala ĩngele ya zaasio naagulilie,

³⁵ naamĩĩĩka pamĩgulu ya atumua; muntu wensi noomoelua kwilika lya usilĩlua waakue.

³⁶ Alukoolĩ Mulawi mukolakaa wa Kiipulo ĩliina liakue Yosepũ naalukuĩtaguaa nĩatumua Balinaba, ĩndogolelio yaakue muana wipyumbulio.

³⁷ Nduyo alutĩĩte mugunda, nuugulia, nuzileeta impiia, nuzĩĩka pamĩgulu ya atumua.