Utendi 28 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Paulo paMelita

¹ Pĩna nakugũnĩka, paapo nakulĩnga kĩna ĩliina lya kĩsiwa ingĩ Melita.

² Ĩakolakaa naakutendela iiza kwikĩlĩkĩĩla, kuitĩ naakoleelia umooto naakusũgamĩĩlia ishie tũlũ kunsooko ya mbũla nalĩkuĩle, nĩmpepo.

³ uPaulo pĩna nuteena ĩkĩlinga lya nkuĩ nukukukĩĩkĩla mumooto, nzoka nĩpũna kunsooko ya mooto nyumutũnga mumukono.

⁴ ĩAkolakaa pĩna naamĩona ĩnzoka ĩkĩgalaganzia mumukono naĩĩ kĩtambuĩla eene kueene, “Kutilĩ kankankani, umuntu uyu muulagi, anga ĩazaa ugũnĩkile noo munanza, ĩkulukuuluu sika yumulekile wĩĩ muumĩ.”

⁵ Ĩpa uzo numĩkanantĩla ĩnzoka mumooto, sika nuaalaalĩka.

⁶ Iio nasĩĩgile nĩmbuge ukiimba katia ukigua pansĩ wakie kuukuanguki. ĩpa pĩnanaamukengekia nukwiona kĩna sikuaalaalĩkile, naakaĩla ĩmasĩĩgo maao, naaũga kĩna alĩ nzua.

⁷ Piipĩ nĩpasio alĩ ĩkoolĩ mĩgunda nya mukulu wa kĩsiwa, ĩliina liakue Pubulio, nduyo nukusũgamĩĩlia kunkolo ya kĩsuakĩĩa intondo zitatu.

⁸ ũShee wa kĩPubulio ali muluĩle nukwipunĩlia ĩmĩgali. uPaulo nũingĩla kumuakue, nulompa, nuĩĩka ĩmĩkono mumuakue numukamia.

⁹ Izi pĩna nazitendeka, ĩaluĩle ĩĩĩa mukĩsiwa kiasio naamuagaana naakamigua.

¹⁰ Nĩndĩo naakukulia kwikyulio kyulu; pĩna nakũingĩla mwipyango kangĩ, naakuĩĩkĩlĩlia mwipyango iintu ya musĩnzo wĩĩtu.

Musĩnzo wa kuLumĩ ulongolekile

¹¹ Mieli ĩtatu pĩna nĩkĩla, nakutũnga umusĩnzo mwipyango lya Alekizandelia naalĩ liĩmile paasio pantondo za mpepo, nĩkĩlĩngasĩĩlio kiakue ingĩ Tyutĩ nuMalũka.

¹² Na kupika kuSilakusa, nakudĩĩla kuasio ntondo zitatu.

¹³ Kwipũna kuasio nakupilima, nakupika kuLegio; pĩna lutondo lumuĩ nalukĩla, nzega ya takama nĩkũnka, lutondo lwa kabĩlĩ nakupika kuPuteoli.

¹⁴ Kuasio nakuagaana ĩanũna naakupeepia kuĩme nĩndĩo ntondo mupũngatĩ. Iio nakupika kuLumĩ.

¹⁵ ĩAnũna a kuasio, pĩna naigyũlia impola zĩĩtu, naapoloka kukukusĩngĩĩlia sunga ku Gyunanĩlo lya kuApio nĩTiletabeline uPaulo pĩna nuona, numusongelia uNzua, nukamia ĩnkolo.

¹⁶ Pĩna nakupika kuLuĩ, uPaulo nupeegua ugombigua wĩĩme kĩna muloelue umuene, palumuĩ numwĩlasi numulindĩlĩĩle.

uPaulo ukĩtambuĩla nĩAyahũdi kuLumĩ

¹⁷ Pĩna nazikĩla ntondo zitatu, nuĩĩta ĩakulu a Ayahũdi ĩlundĩĩle. Pĩna naĩlunda, nuaĩĩla, “Agoosia anũna aane, kanga ĩsika alĩ nĩatimulĩĩle ĩantu ĩĩtu sunga intendo za atata ĩĩtu noo, nambĩĩkĩlua mumĩkono ya Alumĩ, nantũngua kwipũna kũYelusalemũ.

¹⁸ Nĩndĩo pĩna alĩ iinkolekeelia, naasiia kwintũnguĩla kunsooko kumuane alĩ kutilĩ kalukaani nalũjĩpĩĩle mbulague.

¹⁹ Ĩpa ĩAyahũdi pĩnanaasiita, nankankanĩkua kwitelia ilindĩ kwa kĩKaisali. Sika mbũge alĩ ntĩĩte lukaani lwa kuasokia ĩantu a ndugu yaane.

²⁰ Luulo gua, kunsooko yoĩ numuĩtile inie muĩze muĩzindaaa nukukĩtambuĩla, kuitĩ kunsooko yaulaĩĩli waĨsilaeli numutũngue nityendele ĩlĩ.”

²¹ ĩAasio naamuĩĩla, “Ishie sika kuligilie kambalua kumpola zaako kwipũna kuUyahũdi, sunga ukutilĩ kaumuĩ wa anũna naalũjile kunu, waganule kamuĩ watambule kanalubĩĩ mumpola zaako.

²² Ĩpa kusĩĩgile kĩna iiza kũigie kumuako kĩna uoonie; kuitĩ mumpola za wĩkamatuli uu wigyelela kunsĩĩtu kĩna itambulua ibĩĩ tũlũ pensi.”

²³ Pĩna naalagana ninduyo ulutondo, iingĩ naamuagaana munumba muna alĩ wĩĩlĩ nualondoosia kĩĩsa-kĩĩsa kwipũna mudaau sunga mumpĩndĩ, nukukuukuĩla uutemi wa kĩNzua. Nugema kukuasugula mumpola za kĩYesu kunzĩla ya Ulagĩĩlio wa kĩMusa ninkaani za Anakĩdagu.

²⁴ ĩĨĩa naagomba inkaani zaakue, ĩĩĩa sika naazishuĩĩla.

²⁵ Pĩna sika naĩkĩgombia eene kueene, naalongola pĩna uPaulo nutambula lukaani lumuĩ itĩ, “uMuau Muelu alukĩtambuĩlaa kutai nĩatata aani kumulomo wa munakĩdagu Yesaya,

²⁶ Nuũga, ‘Lenda kuantu ĩa, uaĩĩle, Kwiigia mukiiigia, ĩpa sika mukilĩnga; Kwilaaa mukilaaa, ĩpa sika mukiona.

²⁷ Kuitĩ inkolo za antu ĩa zaalĩĩ nkakũ. Nukuakutuĩ aao sika akũigagiaa kĩĩsa. Nĩmiiso maao amatũtilie; Alekiona kumiiso maao, Alekiiigia kuakutuĩ aao, Alekilĩnga kunkolo zaao, Agomoke, nĩagũne.’

²⁸ Luulo gua imanĩke kumiani kĩna uugũnua uu wa kĩNzua watualaguaa kundugu nazĩngĩ, nĩndĩo ikitegeela.”

²⁹ Pĩna alutambuĩile inkaani izi, ĩAyahũdi naalongola, naĩĩ kĩkolia ningĩ eene kueene.

Mumalĩĩlio

³⁰ Nuĩma miaka ĩbĩlĩ munumba yaakue naalupangile, nuasũgamĩĩlia tũlũ-tũũlũũ naalĩ akumuagaana,

³¹ nukukuzitanantia impola za utemi wakĩ Nzua, nukukuzimania impola zakĩYesu Kilisito kuukamatĩkũ wingĩ, sika nugiligua numuntu.