Utendi 27 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Musĩnzo wa kĩPaulo munanza sunga kuLumĩ, kunzĩla ya Kilete

¹ Pĩna naagomba kupũũte ĩnanza kuende kuItalia naamuĩĩka uPaulo nĩatũngua naĩngĩ mumĩkono ya mukulu wa ĩĩlaasi, ĩliina liakue Yulio, naalĩ wityũmpĩ lya ĩlaasi ĩlya mutemi namukulu.

² Nakũingĩla mwipyango naalĩ lĩpũnile kuAdalamiti nalĩlunziĩ kukaa za Asia, nakulega, uAlisitaliko Mumakedonia nwa kuTesalonike alĩ kwĩensi nĩndiishie.

³ Lutondo lwa kabĩlĩ nakupika kuSidoni ũYulio numukendegeela uPaulo kuupolo numulekela wende kuasuaĩĩa aakue wakendegeelue nĩndĩo.

⁴ Kwipũna kuasio nakugendia ipyango, nakukĩlĩla nsĩlĩlĩ ya Kiipulo kwĩkĩĩkame nĩnzega kunsooko alĩ ipũna kuntongela.

⁵ Pĩna nakupũũta ĩnanza ya luandĩ lwa Kilikia nĩPampilia, nakupika kuMila, kaa ya Kilikia.

⁶ Kuasio umukulu wa ĩlaasi nuona pyango lya Alekizandelia lĩlunziĩ kuItalia, nukũingĩlia muumo.

⁷ Nakugendia ipyango kĩĩsa-kĩĩsa kuntondo ningĩ, sunga nakupika kuluandĩ lwa Nido kuluago, nukunsooko ĩnzega alĩ yukukugilia nakukĩlĩla nsĩlĩlĩ ya Kilene kuluandĩ lwa Salimone.

⁸ Nakulĩgendia ipyango kuluago pankilimbua ya nanza, nakupika kuasio kĩna yukuĩtanguaa Kiandalo Kĩĩza, piipĩ nĩpaasio alĩkoolĩ kaa nyukuĩtaguaa Lasea.

Musĩnzo wa kuMelita Nzega ya munanza nuoononeki wipyango

⁹ Pĩna nazikĩla ntondo ningĩ numusĩnzo nawĩĩ wa wĩlũgi paasio kunsooko intoondo za kulaalĩla alĩ zakĩlile, uPaulo nuasugula,

¹⁰ nuũga, “Agoosia, naonaa kĩna umusĩnzo uu ukitũla nuuaalaalĩki, kangĩ utĩĩte ukapĩki wingĩ, sika ukapĩki wa mĩligo nipyango udũũ, ĩpa nuwa uumĩ wĩĩtu gaa.”

¹¹ Ĩpa umukulu wa ĩlaasi numũigia nangũlũ umugendia pyango numukola pyango kwikĩla uPaulo ninkaani zaakue.

¹² Nukunsooko paasio pa kiandalo sika alĩ ijĩpĩĩle kukikyala intondo za mpepo, iingĩ mumiao naaũga taazu alege kwipũna kuasio ende kuPoeniki malĩĩ ishũũmĩkile, nukwiĩĩma kuasio pantondo za mpepo, nĩndĩo ingĩ kaa ya Kilete nĩtungĩnkĩĩne kĩkĩĩlĩma kya kĩsũkũma nĩkĩkĩĩlĩma kya kĩtakama.

¹³ ĩNzega ya kutakama pĩna nĩkũnka iniino, naasĩĩga aligagiaa kĩna alĩ asiiile, naakĩkuula ĩkĩkamĩkĩlo naaloongola pankilimbua ya Kilete.

¹⁴ iTyũngo pĩna nalĩkĩla, ĩnzega nĩkũnka zĩ kĩlaumbĩ, nyukuĩtaguaa Eulakilo.

¹⁵ Pĩna ipyango nalĩguĩlua nukwilemua kwitungĩnkaana nĩnzega, nakulĩleka nakusolua kiaka.

¹⁶ Nakukĩla kuukaaũ piipĩ nĩkĩsiwa kĩniino, ĩliina liakue Kauda, paasio kuluago lukulu nakukanankĩlia kapango kipyango.

¹⁷ Naakatũnga ĩkapango, naakĩlĩlia luligi pansĩlĩlĩ ipyango. Paapo pĩna alĩ oopokile kĩna ikikama mumĩnsanga nyukuĩtaguaa Siliti, naatũngula intiila za kugendelia ipyango, naakenkua iio nĩnzega.

¹⁸ Pĩna ĩnzega nĩkakia kukukukua kungũlũ, palutondo lwa kabĩlĩ naagumĩla ĩmĩligo munanza.

¹⁹ Palutondo lwa katatu naataaga iisheme ipyango kumĩkono yaao ĩeene.

²⁰ Pĩna ĩmpasu ninshonda sika alĩ zigyelĩĩle kuntondo ningĩ, nĩnzenga nankulu nyukukũnkaa, nakuulia uulaaĩĩli wa kugũnĩka.

²¹ Pĩna alĩ ĩĩmile tyũngo kyulu sika alĩĩle kandia, paapo uPaulo nuĩmĩka pakatĩ yaao, nuũga, “Agoosia, anga ĩalĩĩ mutiatile ulukaani luane, alĩ muleke kwilega kuasio kuKilete, sika aza mũjiligia injago nuulimĩli uu.

²² Ĩpaino namuĩĩla mukamie nkolo, kuitĩ pakatĩ yaani ukutilĩ nunumuĩ nukilimansĩĩligua isiititũla ipyango udũũ.

²³ Kuitĩ malaĩka wa kĩNzua waane, uyu nanukumutumĩlaa, aza wĩĩmĩkile muna utiku wau piipĩ nineene

²⁴ wambuĩla, ‘Lekioopooka Paulo, ukutilĩ kawĩnegelo, ukiĩĩmĩka ntongela ya kĩKaisali; kangĩ laaa, uNzua wakupeelaa ĩaasio tũlũ naatĩĩte umusĩnzo palumuĩ ninduue.’

²⁵ Luulo gua agoosia, kamiĩ nkolo, kuitĩ numusuĩlĩĩle uNzua kĩna ikitũla iio-iioo kĩna aza numuĩĩlue.

²⁶ Ĩpa kutilĩ kawĩnegelo kulĩmankie ipyango kulĩkũnilie kukĩsiwa kĩmuĩ.”

²⁷ Pĩna naupika utiku wikyumi nakanĩĩ, pĩna alĩ kwitualua uko ninduuko munanza ya Adilia, muutiku wa katĩ ĩanananza naasĩĩgile kĩna asũgamĩlaa kunsĩĩ nankakũ.

²⁸ Naiikia ĩkĩlaaĩlo, naaona kĩna uusimu wa maazĩ alĩ zĩ mĩkono makumi mabĩlĩ; naalongoleka, naalĩgumĩlia kangĩ naaona uusimu wa maazĩ alĩ zĩ mĩkono kyumi nĩtaano.

²⁹ Naoopooka kulekikũnĩlia mumapampa; luulo naiikia makamĩkĩlio manĩĩkunũma, naalompa weele.

³⁰ Ĩpa ĩanananza naagema kwimanka alĩleke ipyango. Kuluulo, naiikia kapango munanza ĩtende kuunamampĩlu zĩ kwiguma makamĩkĩlio sunga kuntongela.

³¹ uPaulo numuĩĩla umukulu wa ĩlaasi gyana sunga ĩĩlaasi gaa, “Ĩa kanga asiitiĩĩma munipyango sika musũũmile kwigũnĩka.”

³² Paapo ĩĩlaasi naazidumula indigi za kapango naakalekela kague.

³³ Pĩna alĩ wieeleela, uPaulo nuapeepia tũlũ alĩe india nũũga, nantende lutondo lwa kyumi nakaanĩĩ mwikyalile yoi kwitũngĩla nukwilaalĩla, sika mulĩĩle kakĩntu.

³⁴ Luulo gua, numupeepilie mulĩe india; mukiligia ingũlũ, kuiti sunga ityũmbĩ lityue lya umuĩ mumiani sika likilimĩĩla,

³⁵ pĩna nutambula izi, nusola ugalĩ, numusongelia uNzua ntongela yaao ensi, nuuega nuandia kwilĩa,

³⁶ paapo naakamia inkolo ensi, naalĩa india ĩeene. (

³⁷ Nindiishie tũlũ naalĩ kukoolĩ mwipyango alĩ kwĩantu magana mabĩlĩ nĩmakumi mupũngatĩ namutandatu.)

³⁸ Pĩna naikyuta, naakeepia ĩmĩligo ipyango, naagumĩla uupemba munanza.

³⁹ Pĩna naweela, sika naamĩlekanula ĩnsĩĩ niasio, isiititũla naalĩona ikiki kyulu, naasiia alĩtuale ipyango kuasio malĩ ishũũmikile.

⁴⁰ Naamaguma ĩmakamĩkĩlio, naamaleka munanza, nankulu palumuĩ nukwitolia indigi zimankĩlio, paapo naamĩnansula ĩntiila naniino nya kugendelia ipyango, ĩtungĩnkane nĩnzega, ende kũkiki lya munsaanga.

⁴¹ Ĩpa naapikĩĩla pamaazĩ namakeei, ipyango nalĩseketela kuntongela, nalĩsĩmbĩla mumĩnsanga, nalĩguĩlua zigi-zigi, sika nalĩsũngusĩka, ĩpa kunũma nalĩtalulua kungũlũ za maĩngo.

⁴² iKialo kya ĩlaasi gyana alĩ kukuaulaga ĩatũngua, wensi waleke kĩgũna kunzĩla ya kukua nsambo.

⁴³ Ĩpa umukulu wa ĩlaasi kunsooko nwishiia kukumuguna uPaulo, nuagilia alekitenda kĩna alĩ asĩĩgile. Nualagĩlia ĩaasio naasũũmile kwikua ĩnsambo ĩgumĩle tangua munanza apike kunsĩĩ nankakũ.

⁴⁴ Ĩaasio naalĩ asaagile nualagĩĩlia ĩgũne mumakota niisheme ipyango, itĩ yoi tũlũ ensi naagũnĩka, naapika kunsĩĩ nankakũ.