Utendi 26 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uPaulo witambula ntongela ya kĩAgilipi

¹ uAgilipa numuĩĩla uPaulo, “Utĩĩte lioma kukĩtambulĩlia uue.” Paapo uPaulo nunansula umukono waakue, nuĩ kĩtambulĩlia:

² ĩne neene nĩoonie numuliukũ kunsooko nĩkĩtambulĩlia ntongela yaako nantende, mutemi Agilipa, mumpola zensi nanumusokigue nĩAyahũdi.

³ Kuitĩ ue wĩĩzĩ dũũ, intendo nuukolia wensi naatĩĩte ĩAyahũdi. Luulo gua, nukulompile untegeele kuugigimĩlia.

⁴ uLugendo luane kwipũna uusumba waane, kĩna alĩ luĩlĩ kwipũna umuandio pakatĩ ya ndugu yaane kuasio kũYelusalemũ, ĩAyahũdi ensi alumanile.

⁵ Alĩ amanile ĩne kwipũna umuandio, malĩĩ aloe kwikuĩla, kĩna alĩ nĩmĩtiatile ĩnkamĩ nĩkakilie kukuzikendegeela impola za wĩtekeli wĩĩtu, kuitĩ alĩ nĩMuPalisayo.

⁶ Ĩpaino nĩĩmĩkile ĩpa namulue kunsooko ya ulaaĩĩli wilyago ĩatata ĩĩtu naalĩ apeegue nuNzua.

⁷ Ninduuli zĩĩtu kyumi nazibĩlĩ zilaaĩlĩĩle zĩlĩpikĩĩle; pĩna ĩkamatĩkilie kukĩtekela utiku nĩmunsĩ. Kunsooko ya ulaĩĩli uu nishokigua nĩAyahũdi, ee Mutemi!

⁸ Nĩkĩ lwatũla kumiani zĩmbũge ingĩ lukaani nasika lwishuĩĩlua kĩna uNzua ukũiukagiaa ĩakiu.

⁹ Tai ĩne uneene alĩ moonie munkolo yaane kĩna injĩpĩĩle ntende utendi wingĩ naukĩkuaa nĩliina lya kĩYesu Munazaleti.

¹⁰ Nantenda itĩ mũYelusalemu; pĩna alĩndigilie uusũũmi kuapolia naakulu, nanĩatũnga eelu iingĩ, kangĩ pĩna alĩ akuulagaguaa nangombagiaa.

¹¹ Nkua ningĩ mumasũnagogi maao mensi alĩ nĩkĩakaasagia, nanĩakakanĩka kukumutuka uNzua sunga kuugaali naukĩlĩkĩlĩĩle alĩ nĩkĩaagagiaa sunga kukaa za ugenda.

¹² Iio gua, nanongola sunga kuDamesiko nantĩĩte usũũmi nuulagĩĩligua wa apolia naakulu.

¹³ Pansaa ya mutandatu, eeMutemi, pĩna alĩ nĩĩlĩ munzĩla, namona weelu naupũnile kwigyulu naukĩlile uweelu wa mpasu, naumĩlĩkĩla ĩne nĩaasio naalĩ kwĩensi nineene, inaandĩ zensi.

¹⁴ Nakugua pansĩ tũlũ ensi; naniigia luli lwintambuĩla kuntambo ya kĩEbũlania, Sauli Sauli, nĩkĩ winjagia. ĩkakũ kumuako kukumĩsamba ilyakĩ ĩndilima.

¹⁵ Nineene nambũga, “Uue waani Shekulu.” ũShekulu nuũga, “Ĩne neene Yesu, nwinjagia ue.”

¹⁶ Ĩpa uuka, wĩĩmĩke kumĩgulu yaako, kuitĩ nukũgyelelĩĩle kunsooko yoĩ, nukuĩĩke wĩĩ mwĩtumi numukuĩli kumpola naazumoonie ĩne, sunga kumpola ziizo nanĩkakigyelelia kumuako.

¹⁷ Ĩnukukugũna kwipũna kuantu aako sunga kwipũna kundugu nazĩngĩ; kuitĩ nukukutuma kumiao

¹⁸ ualaĩlie ĩmiiso maao, agomolue kwipũna mukiiti, ingĩle muweelu; agomolue kwipũna muusũũmi wa kĩShetani, ingĩle kwa kĩNzua; aleegeligue ĩmĩlandu yaao, asaale palumuĩ nĩnaeeligue kuusuĩĩli nawĩĩlĩ mumuane.

¹⁹ Luulo gua, eeMutemi Agilipa, sika nansiita ĩmaoni ma kwigyulu,

²⁰ ĩpa kumuandio nanĩatanantĩlia ĩaasio a kuDamesiko niYelusalemũ numunsĩĩ yensi nya Uyahũdi sunga kundugu nazĩngĩ, koona apele agomokele kwa kĩNzua, ĩĩtenda utendi nawijĩpĩĩle uupeli.

²¹ Kunsooko ya izi ĩAyahũdi naanguĩla muNumba ya kĩNzua naagema kwimbulaga.

²² Sunga ulutondo lwa nantende ndigilie waalĩĩligua naupũnile kwa kĩNzua, nanĩĩmĩkile ĩpa nukukuakuĩla aniino nĩakulu, kangĩ sika nitambula nkaani zĩngĩ, isiititũla zozoozo ĩanakĩdagu nuMusa naalĩ akuzitambulaa kĩna zijilitũla;

²³ ya kĩna uKilisito yumũjĩpĩĩle waagigue, kangĩ uzo wĩĩ wa muandio kwiiiuka muakiu, watanantie impola za weelu kuantu aakue nukundugu nazĩngĩ.

²⁴ Pĩna nutambula itĩ, uPesito nwĩtunta nuũga, “Paulo wasailile ue, uumani waako naukulu wakusalilie.”

²⁵ ĩpa uPaulo nuũga, “Sika nsalile ee Pesito numukulu, ĩpa nitambula inkaani za tai kangĩ za masala.

²⁶ kuitĩ mutemi umanile impola izĩ luulo nitambula ntongela yaakue kualiĩ. Kuitĩ moonie ti kĩna impola izi zukutilĩ nasikuzimanile, kuitĩ izi sika alĩ zitendekile kumpelo-mpelo.

²⁷ Ee Mutemi Agilipa, uasuĩlĩĩlene ĩanakĩdagu. Manile kĩna uasuĩlĩĩle.”

²⁸ uAgilipa numuĩĩla uPaulo, “Pityũngo niino usĩĩgile ntũle MuKilisito!”

²⁹ uPaulo nuũga, “Malĩĩ niino kamuĩ lyĩĩpũ, magu;” namulompa uNzua, sika ue dũũ, ĩpa tũlũ ensi nainigia nantende atũle zĩ neene, isiititũla ĩmatendele aya.

³⁰ Paapo umutemi nũj ũmbe, nuBelinike nĩaasio naalĩ ikyalansile palumuĩ nĩndĩo naĩĩmĩka.

³¹ Pĩna naalega, naĩĩ kĩtambuĩla naiũga, “uMuntu uyu sikutendile kalukaani nalũjĩpĩĩle kwiulagua katia kwitũngua.”

³² uAgilipa numuĩĩla uPesito, “uMuntu uyu azũjilishũũma kwitũnguĩlua kanga ĩsika alusiile kwitelia kwa kĩKaisali.”