Utendi 25 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uPaulo ntongela ya kĩPesito

¹ uPesito pĩna nuligia uutemi wa nsĩĩ pĩna nazikĩla ntondo zitatu, nunankĩla wende kuYelusalemũ kwipũna kuKaisalia.

² ĩApolia naakulu nĩatongeeli a Ayahũdi naamuĩĩla impola za kĩPaulo, naamupeepia.

³ Nukukumulompa waaloeelie, walagĩĩlie waleetue kũYelusalemũ; naalomile amukũsĩle nukukumuulaga munzĩla.

⁴ Ĩpa uPesito nushookeelia ya kĩna uPaulo mulindĩĩlue kuKaisalia, ninduyo umuene wĩzĩpĩlĩĩlĩlie wende kuasio kuukaaũ.

⁵ Nuũga, “Luulo gua, ĩaasio mumiani naatĩĩte usũũmi kutime palumuĩ nineene amusokie kanga ĩlukoolĩ nalubĩĩ kumuntu nuasio.”

⁶ Pĩna nuĩma kunsiao ntondo nasika zikĩlile munaana kamuĩ kyumi, nuenda kuKaisalia. Lutondo lwa kabĩlĩ nwikyalansa mwityengu lya ulamuli, nulagĩĩlia uPaulo waleetue.

⁷ Pĩna nuuza, ĩAyahũdi naalĩ apũnile kũYelusalemũ naĩĩmĩka piipĩ ninduyo, naamusokia kunkaani ningĩ kangĩ ndũto, ĩpa naalemua kukuzikamĩnkĩĩlia.

⁸ uPaulo nutambula, nuũga, “Ĩne sika ntimuĩle kalukaani kuUlagĩĩlio wa Ayahũdi sunga ku Numba ya kĩNzua, sunga kwa kĩKaisali.”

⁹ Ĩpa uPesito nwishiia kukualoeelia ĩAyahũdi, numushookelia uPaulo nuũga, “Umuloene wende kũYelusalemũ ulamulue kuasio ntongela yaane kumpola izi?”

¹⁰ Ĩpa uPaulo nuũga, ĩne nĩmĩkile ntongela ityengu lya ulamuli wa kĩKaisali, paapo injĩpĩĩle namulue; sika nĩatimulĩĩle ĩAyahũdi kalukaani kĩna uue nulĩngile nkankanaa.

¹¹ Malĩĩ ĩne numutimuli katia ntendile lukaani nalũjĩpĩĩle mbulague, sika nsiitile kwikia. ĩpa malĩĩ ulukaani ulu nanishookeelia ĩsika lwa kulukuuluu kutilĩ nusũmile kwimbĩĩka. Nsiile ntelie nukwa kĩKaisali.

¹² Paapo uPesto pĩna nukondia kukĩtambuĩla nĩanilindĩ, nuushookeelia, “Usiiile kwa kĩKaisali, ukienda kwa kĩKaisali.”

Agilipa nuBelinike

¹³ Pĩna nazikĩla ntondo nkeei, uAgilipa mutemi nuBelinike naapika kuKaisalia amusoolie uPesto.

¹⁴ Pĩna naikyala kuasio ntondo ningĩ, uPesito nuĩ kumuganuĩla umutemi impola za kĩPaulo nuũga, “Ukoolĩ muntu ĩpa naalĩ mulekue nuPeliki mukĩtũngo.

¹⁵ Pĩna alĩ nĩĩlĩ kũYelusalemũ ĩapolia naakulu nĩanampala a Ayahũdi naanganuĩla impola zaakue, naalompa numulamule,”

¹⁶ Nanĩashookeelia kĩna sika ntendo ya kĩLumĩ kukumupũnia wensi naalĩ musokigue pĩna wikĩĩlĩ kalaagaanua nĩasokia usiu kuusiu, waligie ĩlioma lya kĩtambuĩla mumpola za usokia kumuakue.

¹⁷ luulo gua, pĩna naĩlundĩĩla ĩpa sika nantinia; ĩpa palutondo lwa kabĩlĩ nanikyalansa mwityengu lya ulamuli, nandagĩĩlia umuuntu nuasio waleetue.

¹⁸ ĩAsokia pĩna naĩĩmĩka, sika naamusokia kalukaani nalubĩĩ kĩna alĩ nsĩĩgile ĩne,

¹⁹ Ĩpa kumpola za wĩtekeli waao nukumpola za muntu umuĩ Yesu nwakiile, nukumutambulaa uPaulo kungũlũ kĩna ukoolĩ mupanga.

²⁰ Nineene pĩna nanemua mumpola za nkaani izi, nanumukolia malĩĩ muloe wende kũYelusalemũ walamulue kuasio mumpola izi.

²¹ Ĩpa uPaulo pĩna nusiia kwitelia, walindile sunga walamulue numutemi namukulu, iio nandagĩĩlia walindĩĩlue sunga pĩna nĩkakumutuala kwa kĩKaisali.

²² uAgilipa numuĩĩla uPesto, “ĩne nineene numuloe numũigie umuntu uyu.” Nuũga, “Ukakumũigia mudaau.”

²³ Iio gua, mudau yaakue naaaza uAgilipa nuBelinike naĩoogelĩĩlie ĩkĩtemi, naingĩla muasio kwitegeela inkaani palumuĩ nĩakulu a kaa. Paapo uPesito nulagĩĩlia uPaulo waleetue.

²⁴ uPesito nuũga, “Mutemi Agilipa, niniinie ensi namukoolĩ palumuĩ nindiishie, mwamuona umuntu uyu Mumpola zaakue, ĩAyahũdi sue naalompa kũYelusalemũ sunga nĩa ĩpa gaa, nĩaalĩĩlie, naikulia ĩkĩlanga kĩna sika yumũjĩpĩĩle kainiinno wĩĩ muumĩ.

²⁵ Ĩpa ĩne namona kĩna sikutendile kalukaani nalũjĩpĩĩle waulague; ninduyo umuene pĩna nusiia kwitelia kumutemi namukulu, nanamula numutuale kumuakue.

²⁶ Ĩpa mumpola zaakue numugila kalukaani lwa tai kukumuandĩkĩla ũshekulu; luulo namuleeta ntongela yaani, naikulu nangũlũ ntoongela yaako, mutemi Agilipa, pĩna kwakondia kukumukolia-kolia, ndigie ulukaani lwa kuandĩka.

²⁷ kuitĩ naona ingĩ ulu kukumutuala umuntu, ndekilagĩĩla uusokia kumuakue.”