Utendi 24 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Paulo ntongela ya kĩPeliki

¹ Pĩna nazikĩla ntondo zitaano, uAnania mupolia namukulu nuuza palumuĩ nityũmpĩ lya anampala numutambuĩla umuĩ ĩliina liakue Telitulo, nĩndĩo naamulondooselia ũjũmbe impola za kĩPaulo.

² Ninduyo pĩna nuĩtua, uTelitulo nuandia kukumusokia, nuũga. “Kunsooko kwaligilie matiliga mingĩ muutemi waako Peliki numukulu; kangĩ kuukendegeeli waako mpola ningĩ zukuzĩpĩĩlagiguaa kundugu ĩĩ,

³ izi tũlũ kukuzaanũnkulaa kumasongelio mingĩ kunzĩla zensi sunga tũlũ pensi.

⁴ Ĩpa ndeke kukutinĩlia nakupeepia ukutegeele nkaani nkeei kuuza waako.

⁵ Kuitĩ kumuonile umuntu uyu kĩna mugaali, ukoonoonaa nukukualũangĩla ĩAyahũdi tũlũ muna unkũmbigyulu, kangĩ muene tyũe lya nkamĩ ya Anazaleti.

⁶ Kangĩ nugema kumĩdobia ĩNumba ya kĩNzua; paapo namuguĩla, nakusiia kukumulamula kuUlagĩĩlio wĩĩtu.”

⁷ Ĩpa uLisia umukulu wa ĩlaasi nupika, numuleegia kungũlũ mumĩkono yĩĩtu,

⁸ nualagĩĩlia ĩasokia aaze kumuako. Kunzĩla ya kumuakue mumpola izi nakukumusokia

⁹ ĩAyahũdi naĩgombia uusokia uu, naiũga kĩna iio wĩĩlĩ.

¹⁰ ũJũmbe pĩna numuangaazĩlia umukono watambule, uPaulo nushookeelia, “Manile kĩna ue waalĩĩ mulamuli wa ndugu ĩĩmiaka mingĩ, nitambula mumpola zaane kuulumbi.

¹¹ Ue usũũmile kwimana kĩna intondo kwipũna naalĩ nendile kũYelusalemũ kukĩtekela sika zikĩlile kyuni nazibĩlĩ.

¹² Kangĩ ĩa sika alĩ amoonie kĩna alĩ nĩkĩkunguma numumtu wensi katia kukulĩlũangĩla iyũmbĩ munumba ya kĩNzua katia mumasũnagogi katia mukaa.

¹³ Kangĩ sika asũũmile kwikamĩnkĩĩlia inkaani naansokilie mumpola zaane.

¹⁴ Ĩpa ntongela yaako nikũmuula itĩ, kĩna mumpola za Nzĩla naaakumiĩta wĩkamatuli, iio nukumutekelaa uNzua wa atata ĩĩtu nukwishuĩĩla zensi nanandĩkue muUlagĩĩlio numuAnakĩdagu.

¹⁵ Ntĩĩte ulaaĩĩli kwa kĩNzua nĩndĩo naaugombile, kĩna wiijile ukoolĩ uwiiuki wa akiu, akola kulukuuluu nĩnasika akola kulukuuluu,

¹⁶ nineene nĩkakilie intondo zensi nĩĩ numoo naugila kukũmpia naĩngĩ ntongela ya kĩNzua nĩantu gaa.”

¹⁷ Pĩna nĩkĩla miaka mingĩ nampika, nĩatualĩle ĩantu a ndugu yaane ishadaka niipeelo.

¹⁸ Pĩna alĩ nitenda itĩ, alĩ amoonie muNumba ya kĩNzua, kangĩ numueligue, numugila kamulundo katia ulũngili. Ĩpa ĩAyahũdi ĩĩa naalĩ apũnile kuAsia,

¹⁹ iJĩpĩĩle nĩndĩo aaze ĩpa ntongela yaako aazinshokia kanga ĩatĩĩte lukaani luensi kumuane.

²⁰ Katia ĩeene atambule utimu kĩ naalĩ auoonie pĩna alĩ nĩĩmĩkile ntongela ilindĩ,

²¹ isiititũla kulukaani lwalu nalumuĩ naalĩ nĩtuntile pĩna nanĩĩmĩka pakatĩ yaao nukwiũga, Mumpola za wiiuki wa akiu ĩne nilamulua ntongela yaako nantende ĩĩ.

uPeliki wĩshũnta ĩkialo

²² uPeliki, kuitĩ alĩ wazimanaa kĩĩsa impola za Nzĩla ĩĩ, nukĩsũnta ĩkialo kiĩ lutondo luĩngĩ, nwiũga, “uLisia umukulu wa ulugu pĩna ukiiiza, nukilamula inkaani zaani.”

²³ Numulagĩĩlia umukulu nuasio uPaulo walindĩĩlue, ĩpa wĩĩ nĩlioma, kangĩ waleke kumugilia kaumuĩ wa asuaĩĩa aakue kukumutumĩla.

²⁴ Pĩna nazikĩla ntondo nkeei, uPeliki nupika palumuĩ nuDulusila musungu waakue naalĩ Muyahũdi, nutumanĩĩlia uPaulo wĩĩtue, numutegeela impola za usuĩĩli mwa kĩKilisito Yesu.

²⁵ Pĩna nulondoosia impola za kulukuuluu nukukĩgilia nuulamuli naukiiza, uPeliki nũingĩĩlua nuooa, nuũga, “Longola ĩpaino, pĩna nikiligia ĩlioma nĩkakukuĩta.”

²⁶ Palumuĩ niyaasio, nutũngĩĩle zĩ ukipeegua mpiia nuPaulo; iio gua, numuĩta nkua ningĩ naĩtambuĩla ninduyo.

²⁷ Pĩna nĩkĩla miaka ĩbĩlĩ, uPeliki numuanũnkula uPolikio Pesto wateme palioma liakue. uPeliki, kunsooko nusĩĩa kukualoeelia ĩAyahũdi, numuleka uPaulo mukĩtũngo.