Utendi 22 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Utanantia wa kĩPaulo kuAyahũdi

¹ “Agoosia anũna aane nĩatata aane, nzigiĩ inkaani zaane za ukuĩli ntongela yaani ĩpaino.”

² Pĩna naiigia kĩna ukĩtambuĩla nĩndĩo kuntambo nya Kĩebulania naatuulia udũũ. Nuũga,

³ “Ĩne nuMuyahũdi, numulelue kuTaliso, kaa nya Kilikia, ĩpa alĩ numukulĩligue muna kaa yoĩ; pamĩgulu ya kĩGamalieli namanigua kĩĩsa-kĩĩsa uUlagĩĩlio wa atata ĩĩtu, nanĩkamatĩkia mumpola za kĩNzua zĩ uniinie tũlũ nantende ĩĩ.

⁴ Nanĩaagia ĩantu a Nzĩla ĩĩ sunga kukuaulaga, nanĩatũnga nanĩatuala kukĩtũngo, agoosia nĩasungu,

⁵ Kĩna umupolia namukulu nĩanampala a kialo ensi ankuĩlĩĩle. Nanaanũnkula ĩmbalua kwipũna kumiao nĩatualĩle ĩanũna.”

⁶ Pĩna alĩ kĩlĩ nĩĩlĩ mumusĩnzo nukwishũgamĩĩla kuDamesiko zĩ nsaa ya mutandatu ya munsĩ kumpũmpũkĩlĩ weelu ukulu naupũna kwigyulu naumĩlĩkĩla ĩne nandĩ zensi.

⁷ Nangua pansĩ naniigia luli nalumbuĩla Sauli Sauli nĩkĩ winjagia.

⁸ Nanshookeelia uue waani Shekulu. “Numbuĩla ĩne neene Yesu Munazaleti ue nwinjagia.”

⁹ Ĩpa ĩaasio naalĩ auoonie uweelu ĩpa sika alĩ alũigilie ululi lwa nuasio naalĩ kukĩtambuĩla nineene.

¹⁰ Nambũga ntende yaani shekulu ũShekulu numbuĩla ĩĩmĩka wende kuDamesko; kuasio ukiĩĩlua impola tũlũ nandagiĩĩligue uzitende.

¹¹ Pĩna nanemua kwiona kunsooko ya ukulu wa weelu waasio namambua kumĩkono nĩaasio naalĩ kwĩensi nampika kuDamesiko.

¹² Alukoolĩ muntu umuĩ, ĩliina liakue Anania, mukola kuukendegeela uUlagĩĩlio wensi, naalutĩĩte lukũmo naaluuza pakatĩ ya Ayahũdi ensi naĩkikyalaa kuasio,

¹³ nunzagaana, nuĩmĩka piipĩ pamuane numbuĩla, Munũna waane Sauli, uone, Nineene katũngo kako-kaakoo namona.

¹⁴ Paapo nuũga, uNzua wa atata ĩĩtu alukusaaguĩle ue ulĩnge uulooa waakue nukukumuona unuasio Mukola kulukuuluu, nukukulũigia ululi nalupũnile mumulomo waakue.

¹⁵ Kuitĩ ukitũla mukuĩli waakue kuantu tũlũ ensi, waa mpola zaasio naaluzioonie nukukuziigia.

¹⁶ Ĩpaino wĩĩmĩĩle yaani? Ĩĩmĩka ubadĩĩzigue; woogie ĩmĩlandu yaako, wiiĩĩta ĩliina liakue.

¹⁷ Pĩna naashooka kũYelusalemũ nukwilompa muNumba ya kĩNzua, ĩnkolo yaane nĩkia mukanka,

¹⁸ nanumuona nduyo, numbuĩla, Uuka, ulege mũYelusalemũ kuukaaũ, kunsooko sika ĩkakuugomba uukuĩli waako mumpola zaane.

¹⁹ Nineene nambũga, Shekulu, ĩeene akola amanile kĩna ĩne mũshũnagogi liensi alĩ nukuaĩĩka mukĩtũngo nukukuakua naasuĩlĩĩle mumuako.

²⁰ Nĩmĩgali ya kĩSitepano umukuĩli waako. pĩna alĩ iiitua, ĩne alĩ nkoolĩ paapo nũkũlindĩĩla intiila zaao naalĩ akumuulaga.

²¹ Ninduyo numbuĩla, Lega udũũ, kunsooko nikakukutuma wende kulĩ kundugu nazĩngĩ.

uPaulo ukĩkuĩla kĩna Mulumĩ

²² Naamutegeela sunga palukaani lwalu; paapo naĩtunta induli zaao naaũga, “Muleegie umuntu kĩna uyu muna nsĩĩ, kuitĩ sika yumũjĩpĩĩle watũle muumĩ.”

²³ Pĩna alĩ ikulia ĩkĩlanga nukwiguma intiila zao nukwishemula ĩmasalu mukiania,

²⁴ umukulu wa ulugu nulagĩĩlia waleetue munkĩlĩ, nwiũga wakoligue impola zaakue kunzĩla nya makuo wamĩone ĩnsooko ya kumukulĩlia ĩkĩlanga itĩ.

²⁵ Ĩpa pĩna alĩ amutũngile naluligĩ, uPaulo numuĩĩla umukulu wa ĩlaasi naalĩ wĩĩmĩkile paasio, “Kuuza ntendone kukumukua uMulumĩ pĩna wikaalĩ walamulue.”

²⁶ Pĩna umuntu nuasio nũigia ĩzaasio, nuenda numuĩĩla umukulu wa ulugu, “wakitenda mbii. Kuitĩ umuntu uyu ingĩ Mulumĩ.”

²⁷ uMukulu wa ulugu nuuza numukolia, “Mbuĩla, uue uMulumĩne.” Nuũga, “Eeze.”

²⁸ uMukulu nushookeelia, “Ĩne uukolakaa uu alĩ nuugulile kungele nkulu.” uPaulo nuũga, “Ĩne gua numulelelue muumo.”

²⁹ Nĩaasio naalĩ akaaa kumukolia naalega naamuleka kuukaaũ. uMukulu nuasio nduyo noopooka pĩna nulinga kĩna ingĩ Mulumĩ, kangĩ kunsooko alĩ wamutũngaa.

uPaulo ukĩkuĩla ntongela ya ukulu a kialo

³⁰ Lutondo lwa kabĩlĩ pĩna nusiia kwimana kutai kunsooko kĩ alĩ wishookigua nĩAyahũdi, numutũnguĩla, nulagĩĩlia ĩapolia naakulu nilindĩ liensi lyĩlunde. Numuleeta uPaulo pansĩ numuĩmĩkia ntongela yaao.