Utendi 21 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwĩpũnĩĩla kuMileto sunga kuTilo

¹ Pĩna alĩ kukĩlaga nĩndĩo nukwiandia umusĩnzo munaza, nakupika kunzĩla ya kĩsongela kuKosi; lutondo lwa kabĩlĩ nakupika kuLodo; kwipũna kuasio nakupika kuPatala.

² Pĩna nakuona ipyango lya kukupũũtia ĩnanza sunga kuPoiniki nakunankĩla nakuandia umusĩnzo munanza.

³ Pĩna nakuona ĩKiipulo nakumĩleka luandĩ lwa nkĩgĩ, nakulĩgendia ipyango sunga kũShamũ, nakupika kuTilo, kuitĩ kuasio ipyango alĩ liiikia ĩmĩligo yaakue.

⁴ Pĩna nakuona ĩamanigua, nakuĩma kuasio ntondo mupũngatĩ. Kunzĩla ya kĩMuau naamuĩĩla uPaulo walekienda kũYelusalemũ.

⁵ Sunga pĩna nakutimĩlia intondo zaasio, nakulega nakulongola; naakutindĩkĩĩlia tũlũ palumuĩ nĩasungu nĩaana aao sunga kunzi ya kaa, nakutũngama pikiki lya nanza nakulompa.

⁶ Pĩna nakwĩlaga nakũingĩla mwipyango, nĩndĩo naashooka kukaa.

Musĩnzo wa kuKaisalia

⁷ Pĩna nakukondia umusĩnzo munanza kwipũna kuTilo, nakupika kuTolemai; nakuaũgia ĩanũna nakuĩma kumiao lutondo lumuĩ.

⁸ Mudaau yaakue nakulega, nakupika kuKaisalia, nakũingĩla munumba ya kĩPilipo, mutanantia wa Mpola naNziiza, naalĩ umuĩ wa aasio namupũngatĩ, nakuĩma kumuakue.

⁹ uMuntu uyu alutĩĩte ananso anĩĩ naakupũnagiaa uunakĩdagu.

¹⁰ Pĩna alĩ kuĩmile kuaasio intondo ningĩ, munakĩdagu umuĩ ĩliina liakue Agabo nuuza kwipũna kuUyahũdi

¹¹ Pĩna nukuagaana, nuusola umusipi wa kĩPaulo, nwĩtũnga ĩmĩgulu nĩmĩkono, nuũga, “uMuau Muelu uũgile itĩ, itĩ yoi ĩAyahũdi a kũYelusalemũ ĩkakumutũnga umukola musipi uu, nĩndĩo ĩkakumuĩĩkĩla mumĩkono ya ndugu nazĩngĩ.”

¹² Pĩna nakũigia itĩ ishie nĩantu naalĩ akoolĩ paasio nakumupeepia walekienda kũYelusalemũ.

¹³ Paapo uPaulo nushookeelia, “Mwitenda yaani, kwilĩla nukumũnangĩlia ĩnkolo. Kuitĩ ĩne nĩzĩpĩlĩĩlie sika kwitũngua udũũ, ĩpa sunga kwikia kũYelusalemũ kunsooko ya liina lya kĩShekulu Yesu.”

¹⁴ Pĩna nusiita kukukũigia nakutuulia, nakuũga, “uUlooa wa kĩShekulu nautendeke.”

Musĩnzo wa kũYelusalemũ

¹⁵ Pĩna nazikĩla intondo zaasio, nakukenka iisheme yĩĩtu, nakulongola kũYelusalemũ.

¹⁶ ĩĨĩa a amanigua a kuKaisalia nakwĩtiata niindidishie, naakutuala kunumba ya kĩMunasoni nwa kuKiipulo, mumanigua wa kalĩ, kwikyale kumuakue.

¹⁷ Pĩna nakupika kũYelusalemũ, ĩanũna naakusũgamĩĩlia kuulumbi.

Paulo wigema kwikamantana nĩAKilisito a kĩYahũdi

¹⁸ Palutondo lwa kabĩlĩ uPaulo nũingĩla kwa kĩYakobo palumuĩ nindiishie, nĩanampala tũlũ alĩ akoolĩ.

¹⁹ Pĩna nakuaũgia, uPaulo nulondoosia impola zensi, lumuĩ lumuĩ, uNzua naalutendile pakatĩ ya ndugu nazĩngĩ kunzĩla ya wĩtumi waakue.

²⁰ Pĩna naaziigia, naamukulia uNzua. Naamuĩĩla, “Munũna wĩĩtu, uoonie ĩAyahũdi naasuĩlĩĩle kĩna aazaa magana ma nzogũ mingĩ; kangĩ ensi atĩĩte wĩĩlũ kunsooko ya Ulagĩĩlio.

²¹ Nĩndĩo aĩĩlaguaa impola zaako kĩna ukuamanagiaa ĩAyahũdi ensi naĩkyalaa pakatĩ ya ndugu nazĩngĩ amuleke uMusa, nukukuaĩĩla alekiaalamia ĩaana aao, kangĩ alekiamba intendo.

²² Aĩpa mbii. Ikiiigia kualiĩ kĩna waazaa.

²³ Luulo gua, tenda yoi kĩna kukukuĩĩla. Akoolĩ antu anĩĩ kunsĩĩtu naalĩ atũngue nilyapo;

²⁴ uasole ĩantu ĩa, mwĩeelie palumuĩ, ualĩpĩĩlie koona amue ĩmatũe maao. Itĩ tũlũ ikimana kĩna impola izi naalĩ aĩĩlue kunsooko yaako sika kĩntu, ĩpa ue umuene utĩĩĩte lugendo naluuza, kangĩ uuambile uUlagĩĩlio.

²⁵ Ĩpa mumpola za ndugu nazĩngĩ naalĩ asuĩlĩĩle, alĩ kuandĩkile nukwipũnia uulamuli wĩĩtu, ĩnege ĩeene niintu naalĩ ipoleligue kuanzegamĩla, nĩmĩgali, nĩnaigogue, nuugololia.”

²⁶ Paapo uPaulo nuasola ĩantu aasio, lutondo lwa kabĩlĩ nwĩeelia umuene palumuĩ nĩndĩo, nũingĩla muNumba ya kĩNzua nwitanantia impola za kutimĩĩlia intondo za weeligua, sunga ĩkĩpeelo kĩpũnigue kunsooko ya wensi mumiao.

Ukulũganĩki wa kũYelusalemũ nikwiguĩlua kwa kĩPaulo

²⁷ pĩna intondo zaasio nazĩmupũngatĩ alĩ zĩpiipĩ kwitimĩla, ĩAyahũdi naalĩ apũnile kuAsia naamuona muNumba ya kĩNzua naalĩsaalĩnkania iyũmbĩ liensi naamuguĩla,

²⁸ naakulia ĩkĩlanga naaiũga, “Agoosia aĨsilaeli, kualĩliĩ! Uyu wayu muntu nukumanagiaa ĩantu tũlũ pensi impola za kuakungumia ĩantu ĩĩtu nuUlagĩĩlio nĩndĩĩpa pana yeelu. Kangĩ kwikĩla izi, nũingĩlia ĩAgiliki munu muNumba yakĩNzua, nudobia ĩpa pana yeelu.

²⁹ Kuitĩ alĩ amuoonie uTilofimo Muepeso palumuĩ ninduyo mukaa, naasĩĩga kĩna uPaulo alumũingĩĩlie muNumba ya kĩNzua.”

³⁰ Kaa yensi nĩlũangĩlua, ĩantu naĩlundĩĩla, naamuguĩla uPaulo, naamukuesa, naamupũnia muNumba ya kĩNzua, ĩkamuĩ ĩmazĩĩgĩ namigyalĩlua.

³¹ ĩpa pĩna naiidũũma kukumuulaga, impola nazumupikĩĩla umukulu wa ulugu ya kĩna iYelusalemũ yensi yakulũganĩkaa.

³² Ĩkamuĩ nuasola ĩlaasi nĩakulu aao numanka kumiao. Nĩndĩo pĩna naamuona umukulu wa ulugu palumuĩ nĩĩlaasi, naleka kukumukua uPaulo.

³³ uMukulu wa ulugu nusũgamĩĩla, numuguĩla, nulagĩĩlia watũngue matendele mabĩlĩ. Nukolia, “Waani uyu, kangĩ utendile yaani.”

³⁴ Naakulia ĩkĩlanga, ĩĩĩa mwiyũmbĩ naaũga itĩ, nĩĩĩa iyaao. Pĩna nulemua kwilĩnga ĩtĩ kunsooko ya kĩlanga, nulagĩĩlia watualue munkĩlĩ.

³⁵ uPaulo pĩna nupika paunankĩlĩlo nukenkua nĩĩlaasi kunsooko ya muzũgo wiyũbĩ,

³⁶ Kuitĩ ĩantu iingĩ dũũ alĩ ĩtiatile, naakulia ĩkĩlanga, naaũga, “Muleegie uyu!”

³⁷ uPaulo pĩna alĩ wileetua munkĩlĩ numuĩĩla umukuulu wa ulugu, “Nsũũmilene nukuĩĩle lukaani.” Unuasio numuĩĩla, “Wĩĩzĩne ĩKĩgiliki;”

³⁸ ue sika uMumĩsili nuasioone naaluuukilie uluntampa intondo izo, nuatongeela mumbuga ĩantu magana ma nzogũ manĩĩ naakuĩtaguaa Aulagi?

³⁹ uPaulo nuũga, “Ĩne nuMuyahũdi wa kuTaliso, ĩkaa ya Kilikia; numukolakaa wa kaa nasika niino. Nakupeepia, undekele nĩtambuĩle nĩantu ĩa.”

⁴⁰ Pĩna numupeela ĩlioma, uPaulo nuĩmĩka paunankĩlĩlo nwĩaangaazĩlia umukono ĩantu; pĩna naatuulia, nuĩ kuatambuĩla kuntambo ya kĩEbũlania nwiũga,