Utendi 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kĩpeegua kya Muau Muelu

¹ Lutondo lwa Penteskote pĩna nalupika, alĩ akoolĩ tũlũ ensi palumuĩ nailundilĩĩle.

² Kumpũmpũkĩli kwipũna kwigyulu nauuza mulũgũũzo zĩ mulũgũũzo wa nzega nkulu nĩkũnkile kungũlũ, naumijulia ĩnumba tũlũ muna alĩ ikyalansile.

³ Naziigyeleela nĩmĩ naalĩ zĩtemanukile zĩ nĩmĩ za mooto naalĩ zĩĩmile mumuntu wensi.

⁴ Tũlũ naijulua nuMuau Muelu, naandia kwitambula kuntambo nazĩngĩ kĩna uMuau alĩ waatongelĩĩle kwilikitia.

⁵ Alĩ akoolĩ kũYelusalemũ Ayahũdi naikyalile, antu akulia-Nzua a ndugu zensi nsĩlĩlĩ igyulu.

⁶ uMulũgũũzo pĩna nũigigua, maũmbĩ namĩlundĩkĩĩla namatunduala, kuitĩ wensi waao alĩ wiigilie kĩna itambula kuntambo yaakue yaakuee.

⁷ Naakũmia tũlũ, naakulĩlua, naaũga, “Ĩa tũlũ naitambula, sika Agalĩlayane.

⁸ Yatũla mbii ishie kwiiigia ĩntambo yĩĩtu naalĩ kualelue ndĩzo?

⁹ ĩApaliti nĩAmedi nĩAelamani, nĩndĩo naikyalile kuMesopotamia, kuUyahũdi nukuKapadokia, Ponto nĩAsia,

¹⁰ Piligia nĩ Pampilia, Mĩsili ninandĩ za Libia piipĩ nukuKilene, nĩagenda kwipũna kuLumĩ, ĩAyahũdi nĩ aasio naalĩ atiati a wĩtekeli waao,

¹¹ ĩAkelete nĩAlabu; kukiigyũlia ĩa itambula kuntambo zĩĩtu uutendi naukulu wa kĩNzua!”

¹² Naakũmia tũlũ, naingĩĩlua ninkankani naĩĩ kĩtambuĩla ĩeene kueene, “Aaizi itĩ ndogolelio yaakue yaani.

¹³ ĩĨĩa naakuapopota nukwiũga, ‘Agaalile mubinio mupia.’”

Utanantia wa kĩPetelo palutondo lwa kĩMuau Muelu

¹⁴ Ĩpa uPetelo nuĩmĩka palumuĩ nĩnaikyumi numuĩ, nwitunta ululi luakue nuaĩĩla, “Ĩnie agoosia a Uyahũdi niniinie namwikyalile mũYelusalemũ, manĩ ulukaani ulu, tegeelĩ inkaani zaane.

¹⁵ Sika iio kĩna musĩĩgile; ĩa sika agaalile, kuitĩ ingĩ nsaa ya katatu ya munsĩ;

¹⁶ ĩpa ulukaani ulu lualu naalĩ lutambulue numunakĩdagu Yoeli.

¹⁷ ‘Ikitũla pantondo za mpelo, uũgile uNzua, nĩkakuiitĩla ĩantu tũlũ uMuau waane, nĩaana aani, agoosia nĩnaakĩĩma, ikipũnia unakĩdagu; nĩasumba aani ikiona maono; nĩanampala aani ikiloota ndooti

¹⁸ Sunga pantondo zaasio nĩkakuiitĩla ĩĩtumi aane, 2 agoosia nĩnaasungu, uMuau waane, Ndĩo ikipũnia uunakĩdagu.

¹⁹ Nikipũnia makula mukiania mwigyulu niilĩngasĩĩlio muna nsĩlĩlĩ ya nsĩĩ, mugali numooto numulũke wa liukĩ.

²⁰ ĩMpasu ijilikaĩlĩka kwitũla wiilu, numueli kwitũla mugali pĩna ulutondo lwa kĩShekulu lũkĩĩlĩ kalaaza, ulutondo nalukulu nalukigyelela kualiĩ.

²¹ Kangĩ ikitũla wensi nukakulĩtekela ĩliina lya kĩShekulu ukigũnua.’

²² “Agoosia a Ĩsilaeli, tegeelĩ inkaani izi; ũYesu Munazaleti, muntu naalĩ mũgyeleligue kumiani nuNzua kuutendi kwa kĩuyo pakatĩ yaani, kĩna uniinie akola namumanile;

²³ wa yuuyu naalĩ mupũnigue kũshiio lya kĩNzua nuumani waakue kwipũna iyuukĩ; inie namumukononteela mumusalaba nukukumuulaga kumĩkono ya antu naabĩĩ.

²⁴ Ĩpa uNzua numũiukia, numutũnguĩla muuwai wa nkia, kunsooko sika alĩ ishũũmĩkile waguĩlue nduo.

²⁵ Kuitĩ uDaudi uũgile mumpola zaakue, ‘Kuuzaa numuoonie ũShekulu ntongela yaane intondo zensi, Kunsooko wĩĩlĩ pamukono waane wa kĩgoosia ndekishũngũsĩka.

²⁶ Luulo gua ĩnkolo yaane nĩlumba, ululĩmĩ luane nalulumbĩĩligua; Kangĩ umuĩlĩ waane ukakikyala muulaaĩĩli.

²⁷ Kunsooko sikukindekelia ĩnkolo yaane kuulungu; Sunga sikukakumuleka uMuelu waako wauone uoononeki.

²⁸ Unĩngilie injĩla za upanga; Ukakinjulia ulumbi pausiu waako.’

²⁹ “Agoosia anũna aane, kantambule kuukamatĩkũ ntongela yaani impola za munampala wĩĩtu uDaudi, ya kĩna nukia, nuĩĩkua; nĩkĩbĩĩla kiakue kĩkoolĩ kunsĩĩtu sunga nantende.

³⁰ Iio gua kunsooko alĩ munakĩdagu, nwimana ya kĩna uNzua alumulapĩĩle kwilyapo kĩna ukakumunansulĩlia umuĩ wa wĩleli wa kĩĩno kiakue wikyalanse mwityengu luakue lya kĩtemi;

³¹ umuene mukoleka pĩna nutoongela kukuzioona izi, alutambuĩle impola za wiiuki wa kĩKilisito ya kĩna sika nulekua kuulungu, sunga umuĩlĩ waakue sika nauona uoononeki.

³² “ũYesu wayu uNzua naalumũiukilie, nindiishie tũlũ kuakuĩli a mpola izi.

³³ Iio gua, pĩna nunankĩligua sunga kumukono nwa kĩgoosia nwa kĩNzua nukwiligia kwa kĩTata ilyago lya Muau Muelu, ukiitile ĩkĩntu ĩkĩ namukĩoonie nukukukiigia.

³⁴ Kuitĩ uDaudi sika alunankĩĩle kwigyulu, ĩpa umuene mukoleka uũgile, ‘Shekulu alumuĩĩlĩĩle ũShekulu waane, Kyalansa pamukono waane nwa kĩgoosia

³⁵ Sunga pĩna nĩkakuaĩĩka ĩanaulugu aako nsĩlĩlĩ ya mĩgulu yaako.’

³⁶ “Luulo gua, ĩnumba tũlũ nya Ĩsilaeli amane kutai ya kĩna uNzua wamutendile ũYesu unuasio naalĩ mumukonontelĩĩle mumusalaba kwitũla Shekulu, kangĩ Kilisito.”

³⁷ Pĩna naiigia izi naasonsua munkolo zaao, naamuĩĩla uPetelo nĩatumua naĩngĩ, kutendeii, agoosia anũna ĩĩtu.

³⁸ uPetelo nuashookeelia, “Pelĩ, mubadĩĩzigue wensi mumiani muliina lya kĩYesu Kilisito, muleegeligue ĩmĩlandu yaani, niniinie mukiligia ĩkĩpeegua kya Muau Muelu.

³⁹ Kuitĩ ilyago ingĩ kumiani nukuaana aani nukuaasio naĩĩlĩ kulĩ tũlũ ensi, ĩaasio ũShekulu Nzua wĩĩtu ukuĩĩtaa kumuakue.”

⁴⁰ Nuakuĩla kunkaani nazĩngĩ ningĩ, nukukuasugula nuũga, “Ĩgũnĩ kwipũna muwĩleli uu wa uleki.”

⁴¹ Iio gua, ĩaasio naalĩ aanũnkuĩle ulukaani luakue naabadĩĩzigua; nulutondo luasio naĩongeela antu magana ma nzogũ matatu.

Wikyaalĩ wa nkamĩ ya kĩKilisito

⁴² Naĩkamatĩkia muumanigua wa atumua, numuukamamtani, nukukuuega uugalĩ numuulompi.

⁴³ Muntu wensi nũingĩĩlua nuooa; makula mingĩ niilĩngasĩĩlio naitendua nĩatumua.

⁴⁴ Tũlũ naalĩ asuĩlĩĩle alĩ akoolĩ palumuĩ, niintu tũlũ alĩ asangĩĩle,

⁴⁵ nukwigulia inshao zaao niintu yaao naalĩ kuuzaa atĩĩte nukukuoomolania tũlũ kwilika lya usilĩlua wa muntu wensi.

⁴⁶ Lutondo kulutondo kunkolo ĩmuĩ alĩ kuuzaa akoolĩ muNumba ya kĩNzua nukwilĩa uugalĩ munumba zaao. Nailĩa ndia zaao kuulumbi nukunkolo nanzelu,

⁴⁷ naakumukũmazukia uNzua nukukualoeelia ĩantu tũlũ. ũShekulu nongeeelia lutondo kulutondo iyalo lya aasio naalĩ igũnua.