Utendi 19 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Amanigua a kĩYohana Mubadĩĩzia kuEpeso

¹ Pĩna uApolo alĩ wĩĩlĩ kuKolinto, uPaulo nukĩlĩla paasio pankonko, nupika kuEpeso. Kuasio nuaagaana ĩamanigua naĩngĩ.

² Nuakolia, “Alĩ muanũnkuĩlene uMuau Muelu pĩna namusuĩĩla.” Naamushookeelia, “Sunga kwiigia sika kwaliigia kĩna uMuau Muelu ukoolĩ.”

³ Nuakolia, “Aĩpa muabadĩĩzigue ubadĩĩzo kĩ.” Naaũga, “Kuubadĩĩzo wa kĩYohana.”

⁴ uPaulo nuũga, “uYohana alukubadĩĩzagia kuubadĩĩzo wa upeli nukuaĩĩla ĩantu amusuĩĩle uyo nukiiiza kunũma yaakue, ninduyo ingĩ ũYesu.”

⁵ Pĩna naaziigia izi, naabadĩĩzigua muliina lya kĩShekulu Yesu.

⁶ pĩna uPaulo nuaĩĩkĩla ĩmĩkono yaakue mumiao, uMuau Muelu nwĩĩza mumiao, naiitambula kuntambo ng'enda nukwipũnia unakĩdagu.

⁷ Niyalo liao alĩ zĩ agoosia kyumi naabĩlĩ.

Paulo kuEpeso

⁸ Nũingĩla mũshũnagogi, nutambula kuukamatĩkũ mieli ĩtatu, naĩkĩtambuĩla impola za utemi wa kĩNzua nukukualũta ĩantu.

⁹ Ĩpa pĩna ĩĩĩa naĩkakia nukwishiita, naamĩtuka Ĩnzĩla niasio ntongela ya mulundo, nulega kumiao, nuasola ĩamanigua palumuĩ nduyo, naĩkĩtambuĩla nĩantu lutondo kulutondo mwishule lya muntu umuĩ, ĩliina liakue Tilano.

¹⁰ iMpola izi nazilongoleka iio miaka ĩbĩlĩ, sunga ĩAyahũdi nĩAgiliki ensi naĩkikyalaa muAsia naiigia ulukani lwa kĩShekulu.

¹¹ uNzua nutenda makula kwikĩlĩkĩĩla kunzĩla ya mĩkono ya kĩPaulo.

¹² sunga iideeo nintiila nazipũnile mumuĩlĩ waakue nazileetua kualuĩle, paapo ĩmauluĩle namalega nĩmasĩĩmuĩ namapũnigua mumiao.

¹³ Nĩĩĩa pakatĩ ya Ayahũdi naalĩ kuuzaa iumba-umba nukwiĩnga ĩmasĩĩmuĩ, naagema kukulĩtea ĩliina lya kĩShekulu Yesu kuaasio naiingĩĩlue nĩmasĩũmuĩ, naaũga, “Nakulapĩla kuliina lya kĩYesu, uyo nukutanantagiguaa nuPaulo.”

¹⁴ Alĩ akolĩ aana mupũngatĩ a kĩSikewa, Muyahũdi, mupolia namukulu, naalĩ atendile itĩ.

¹⁵ ĩpa ĩlĩsĩĩmuĩ nalĩashookeelia nalĩũga, “ũYesu numulĩngile, nuPaulo numuĩzĩ, ĩpa inie niinie aani.”

¹⁶ Numuntu naalĩ mũingĩĩlue nĩlĩsĩĩmuĩ nuapũũtĩla abĩlĩ nuasũũma nuadula, sunga naamanka kwipũna munumba niasio kĩpuĩ kangĩ naaalaalĩgua

¹⁷ iMpola izi naziigigua nĩAyahũdi nĩAgiliki ensi naalĩ ikyalile kuEpeso; ooa nauaingĩĩla ensi, nĩliina lya kĩShekulu Yesu nalĩkuligua.

¹⁸ Sunga iingĩ muaasio naalĩ asuĩlĩĩle, naaaza naakũmuula naigyelelia uutendi waao kualiĩ.

¹⁹ Kangĩ iingĩ muaasio naakulagulaa, naailingĩĩla imbũgũlũ zaao naazishonsa umooto ntongela ya antu ensi, naaalia ĩngele yaao, naaona zĩ mpiia magana ma nzogũ makumi mataano

²⁰ Yaasio iio ulukaani lwa kĩShekulu nalongeeleka kungũlũ nukwidula.

Shiio lya kĩPaulo

²¹ iMpola izi pĩna naziula, uPaulo nwĩsĩĩgia munkolo yaakue kĩna pĩna wakĩla pakatĩ ya Makedonia nĩAkaya wende kũYelusalemũ nuũga.

²² Nuatuma abĩlĩ naalĩ akumutumĩlaa, ũTimoteo nuElasito ende kuMakedonia, uzo umuene nudĩĩla ntondo nkeei muAsia.

Mukũlũkeke wa anakuEpeso

²³ Pantondo zaasio nawigyela mukũlũkeke sika muniino ku mpola za nzĩla niasio.

²⁴ Kuitĩ muntu umuĩ, ĩliina liakue Demetelio, mutiana-mpiia naalukupijĩpagiaa ipijumba pya mpiia kumpiani ya numba ya kumutekela uAlitema, uzo alualigĩĩlie ĩatiani nsaĩlo nkulu.

²⁵ Nuailingĩĩla ĩaasio palumuĩ nĩnaĩngĩ a mulĩmo waasio nuũga, “Agoosia inie, mumanile kĩna uugolĩ wĩĩtu ukupũnaa muna mulĩmo wau.

²⁶ Kangĩ muoonie nukwiigia kĩna sika muna Epeso udũũ, ĩpa numuAsia yensi, uPaulo alĩ waaputilie ĩantu iingĩ nukukuapĩlulĩlia ĩmasĩĩgo maao, nwiũga ya kĩna iyaaso nayukuzĩpagiguaa kumĩkono sika anzua.

²⁷ Ĩpa sika iio udũũ kĩna umulĩmo wĩĩtu ikimelua, sunga ĩnumba ya kumutekela nzua-musungu namukulu uAlitema likialĩĩligua zĩ sika kĩntu, kangĩ uukulu waakue ukileegigua, uuzo ĩAsia nuunkũmbigyulu wensi naakumutekelaa.”

²⁸ Pĩna naiigia izi naatakĩkia, naakulia ĩkĩlanga naaũga, “uAlitema nwa Aepeso ingĩ mukulu!”

²⁹ Ĩkaa yensi nĩkũlũganĩka, naamanka ensi naingĩla pawĩsĩgĩlo nishĩĩgo lĩmuĩ, naakuakuesa uGayo nuAlisitaliko palumuĩ nuPaulo.

³⁰ uPaulo nuloma kwiingĩla pakatĩ ya antu, ĩpa ĩamanigua naamugilia.

³¹ Nĩĩĩa akulu a kuAsia, naalĩ akĩsuakĩĩa, naatuma ĩantu kumuakue, naamusugula walekiingĩla paasio pawĩsĩgĩlo.

³² Paapo naakulia ĩkĩlanga, ĩĩĩa itĩ nĩĩĩa itĩ, kuitĩ umulundo alĩ woononekaa, uwingĩ waao sika alĩ amanile ĩnsooko ya kĩlundĩĩla yaasio palumuĩ

³³ Naamupũnia uAlekizando, ĩAyahũdi naamuĩĩka ntongela ya antu. uAlekizando nwĩangaazĩlia umukono, nuusiia wĩnene ntongela ya antu.

³⁴ Ĩpa pĩna naalĩnga kĩna uyo Muyahũdi, naakulia ĩkĩlanga tũlũ ensi kululi lumuĩ kwityũngo lya nsaa zibĩlĩ, naaiũga, “uAlitema nwa Aepeso ingĩ mukulu.”

³⁵ uMuandĩki wa kaa pĩna nuatuulia ĩaasio iyũmbĩ, nuũga, “Inie agoosia a Epeso, waani nasikumanile kĩna ikaa ya Epeso ingĩ nkendegeeli iJumba lya kĩAlitema namukulu, kangĩ nya lintu naalĩ lĩguile kwipũna kwigyulu.

³⁶ Kunsooko impola izi sika zishũũmile kwikungumigua, yumũjĩpĩĩle mutuulie muleke kĩkangasĩĩlia.

³⁷ Kuitĩ mualeetile ĩantu ĩa nasika iiile iintu iJumba lya kĩnzua wĩĩtu namusungu, sunga kukumutuka.

³⁸ Kuluulo gua, malĩ uDemetelio nĩatiani aakue ĩatĩĩte lukaani kuwensi, ĩmalindĩ makoolĩ, nĩalamuli akoolĩ; naĩsokie ĩeene kueene.

³⁹ Ĩpa kanga mudũũme nkaani za mpola zĩngĩ zikijĩpĩĩligua muna ĩkialo kĩlagĩĩligue.

⁴⁰ Kuitĩ kusũũmile kwishokigua kunsooko ya wĩleei wa nantende; kangĩ sika kukitũla nulukaani kukĩnena kunsooko ya mukũlũkeke uu.”

⁴¹ Pĩna nukondia kwitambula izi nuulaga umulundo.