Utendi 18 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kolinto

¹ Pĩna naikĩla yaasio, uPaulo nulega kuAtene, nupika kuKolinto.

² Numuona Muyahũdi umuĩ ĩliina liakue Akila, mukolakaa wa Ponto, ninduyo ziizo ntondo alupũnile kunsĩĩ ya Italia palumuĩ nuPilisila musungu waakue, kunsooko uKilaudio alĩ walagĩlĩĩlie ĩAyahũdi ensi alege kuLumĩ. Nuenda kumiao.

³ nukunsooko umulĩmo wao wa kutũma ĩmaheema alĩ umuĩ, nuĩ kikyalaa nĩndĩo nukukĩtuma umulĩmo ensi.

⁴ Nwĩtambuĩlaa nĩantu mũshũnagogi palutondo luensi lwa wikyali, nualũta ĩAyahũdi nĩAgiliki.

⁵ uSila nũTimoteo pĩa naapika kwipũna kuMakedonia, uPaulo nutuunua nulukaani luasio, nwitanantia nukukuapũnĩlĩkĩa ukuĩli ĩAyahũdi kĩna ũYesu ingĩ Kilisito.

⁶ Pĩna naĩkunguma nduyo nukukumutuka, nukũnũnta intiila zaakue, nuaĩĩla, “Ĩmĩgali yaani nayĩĩ mumatũe maani, ĩne numugila kautimu. Kwipũna nantende nikienda kundugu nazĩngĩ.”

⁷ Nulega kuasio nũingĩla munumba ya muntu umuĩ, ĩliiina liakue Tito Yusito, mukulia-Nzua; nĩnumba yaakue alĩ ikinĩnkĩĩne nishũnagogi.

⁸ uKilisipo, mukulu wishũnagogi nusuĩĩla mwa kĩShekulu palumuĩ nĩnumba yaakue yensi. ĩAkolinto iingĩ pĩna naiigia, naasuĩĩla, naabadĩĩzigua.

⁹ ũShekulu numuĩĩla uPaulo mumaoni muutiku, “Lekioopoka, ĩpa utambule udũũ, lekituulia,

¹⁰ kunsooko ĩne kwĩpalumuĩ ninduue, ukutilĩ nukakukuukĩĩla nukukukualaalia, kunsooko ĩne ntĩĩte antu iingĩ munakaa ĩĩ.”

¹¹ Nwikyala kuasio muaka umuĩ nĩmieli mutandatu, nwimania ulukaani lwa kĩNzua pakatĩ yaao.

Galio nuPaulo

¹² Ĩpa uGalio pĩna alĩ jũmbe wa kuAkaya, ĩAyahũdi naamuuukĩĩla uPaulo kwishĩĩgo lĩmuĩ, naamutuala kuntongela ityengu lya ulamuli,

¹³ naaũga, “uMuntu uyu ukualũta ĩantu amutekele uNzua kunzĩla nasika ĩkamantĩĩne nuUlagĩĩlio.”

¹⁴ uPaulo pĩna nusiia kwimũmuula umulomo waakue, uGalio nuaĩĩla ĩAyahũdi, “Iio gua, kanga ĩaza lukaani lwa kutenda ubĩĩ kamuĩ utimu naukulu, inie Ayahũdi, aza injĩpĩĩle ĩne kwitegeela kĩĩsa.

¹⁵ Ĩpa malĩĩ ikyolio lya nkaani nĩmiina nuUlagĩĩlio waani pakatĩ yaani, lukendegeelĩ uniinie akola, kuitĩ ĩne uneene sika numuloe nĩĩ mulamuli wa nkaani izi.”

¹⁶ Nuaĩnga ntongela ityengu lya ulamuli.

¹⁷ Nĩndĩo ensi naamuguĩla uSositene, mukulu wishũnagogi, naamukua ntongela ityengu lya ulamuli, ĩpa uGalio sika nuzikeela inkaani izi.

Paulo Wishooka kũShamũ

¹⁸ uPaulo nuĩmĩkia kuasio ntondo ningĩ, pembele naĩlaga nĩanũna, nupũũta ĩnanza wende kũSiria; uPilisila nuAkila naendania palumuĩ ninduyo. PaKenkelea numua ityũe liakue kunsooko aluĩkile ĩlyago.

¹⁹ Naapika kuEpeso, nualeka kuuko. Uzo umuene nũingĩla mũshũnagogi, naĩkĩtambuĩla nĩAyahũdi.

²⁰ Pĩna naamulompa wĩĩme ityũngo lyĩĩpũ, sika nugomba,

²¹ ĩpa naĩlaga nĩndĩo nuũga, “Nikishooka kangĩ kĩna nsiani kanga uNzua ĩmuloe.” Nupũũta ĩnanza kwipũna kuEpeso.

²² Pĩna nupika kuKaisalia, nunankĩla wende kualamukia ĩo ikyanisa, nutima kangĩ kuAntiokia.

²³ Pĩna nuĩma kuasio ntondo nkeei, nulega nukĩlĩla pakatĩ ya Galatia nĩFiligia kaa kukaa, nukukuakamĩnkĩĩlia ĩamanigua tũlũ.

Apolo kuEpeso

²⁴ Alukoolĩ Muyahũdi ĩliina liakue Apolo, mukolakaa wa Alekizandelia, nupika kuEpeso; alĩ mumani mukulu wa kutambula, naalumanikilie uwandĩkua.

²⁵ uNuasio alĩ mumanigue ĩnzĩla ya kĩShekulu, nukunsooko ĩnkolo yaakue alĩ kuuzaa yaakĩĩle nutambula nukukuzimania kĩĩsa-kĩĩsa impola za kĩYesu; ninduyo alĩ wĩĩzĩ uubadĩĩzo wa kĩYohana udũũ.

²⁶ Nuandia kwitambula kuukamatĩkũ mũshũnagogi; ĩpa uPilisila nuAkila, pĩna naamũigia, naamusũgamĩĩlia kunsiao, naamulĩngia ĩnzĩla ya kĩNzua kĩĩsa-kĩĩsa.

²⁷ Pĩna nuloma wamĩpũũte ĩnanza wende kuAkaya, ĩanũna naamukamia ĩnkolo, naaandĩkĩla ĩamanigua amusũgamĩĩlie. Pĩna nupika, nuaalĩĩlia dũũ ĩaasio naalĩ asuĩlĩĩle kunzĩla ya ukende.

²⁸ kuitĩ ukuakungumaa kualiĩ ĩAyahũdi, nwilagĩĩla kunzĩla ya wandĩkua kĩna ũYesu ingĩ Kilisito.