Utendi 17 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Tesaloniki

¹ Pĩna naakĩla pakatĩ ya Ampipoli nĩApolonia, naapika kuTesaloniki, paapo ishũnagogi lya Ayahũdi alĩ liĩlĩ.

² NuPaulo kĩna alĩ kuuzaa ntendo yaakue, nũingĩla muumo muna alĩ ĩĩlĩ, naĩĩ kĩtambuĩlakunkaani za wandĩkua kuntondo zitatu za wikyali,

³ nwilondoosia nukwikamĩnkĩĩlia kĩna alĩ yumũjĩpĩĩle uKilisito kwiaagigua nukuiuka kwipũna muakiu, nuũga, “ũYesu wayuuyu nanukumuganuĩla impola zaakue ingĩ muene Kilisito.”

⁴ ĨĨĩa pakatĩ yaao naagomba, naakamantana nuPaulo nuSila, nĩAgiliki akulia-Nzua naakamantana iingĩ dũũ, nĩasungu naatĩĩte ukulu sika akeei.

⁵ Ĩpa ĩAyahũdi naingĩĩlua wĩĩlũ, naaasola antu naabĩĩ naakata, nĩndĩo naalunda yũmbĩ, naakũlanga ĩkaa, naagaana ĩantu a numba ya kiYasoni, naakunga aatuale kuntongela ya antu.

⁶ Pĩna naaaulia, naamukuesa ũYasoni nityũmpĩ lya anũna kuntongela ya akulu a kaa, naakulia ĩkĩlanga, naaũga, “ĩAntu ĩa naakuugalula unkũmbigyulu apikaa nukunu,

⁷ nuYasoni waasũgamĩĩlagiaa. ĩa tũlũ asiitile kwiamba ĩmalagĩĩlio ma kĩKaisali, iũga kĩna ukoolĩ mutemi wĩngĩ nukuĩtaguaa Yesu.”

⁸ iYũmbĩ nĩakulu a kaa naakunguala pĩna naiigia ĩzaasio.

⁹ Pĩna naasola ĩkĩganza kyakĩ Yasoni nĩnaĩngĩ, naaleka ende.

Beloya

¹⁰ ĩkamuĩ muutiku ĩanũna naamutuala uPaulo nuSila kuBeloya; pĩna naapika kuasio, naingĩla mũshũnagogi lya Ayahũdi.

¹¹ Ĩasio alĩ aaza kwikĩla ĩa kuTesaloniki; alĩ aluanũnkuĩle ulukaani kunkolo nantontũ, mumeelele naikeesekia uwandĩkua, naona kĩna impola izi yoi zĩĩlĩ.

¹² Iio gua, iingĩ pakatĩ yaao naasuĩĩla, asungu a kĩGiliki naatĩĩte ukulu palumuĩ nĩagoosia sika akeei.

¹³ ĩpa ĩAyahũdi a kuTesaloniki pĩna alĩ iigilie ya kĩna ulukaani lwa kĩNzua lutanantigue sunga kuBeloya nuPaulo, nuenda kuuko nukuasio naazũga nukukuakungualia ĩantu.

¹⁴ Paapo ĩkamuĩ ĩanũna naamutuala uPaulo wende kunanza, ĩpa uSila nũTimoteo naasaaga paapo.

¹⁵ ĩAasio naalĩ amutindĩkĩlĩĩlie uPaulo naamutuala sunga kuAtene, nĩndĩo pĩna naalagĩĩligua aaĩĩle uSila nũTimoteo alekitinia kukumutiata, naalongola.

Atene

¹⁶ uPaulo pĩna alĩ waalindĩĩle ĩaasio kuAtene, ĩnkolo yaakue nĩĩĩpĩlua munsĩ yaakue pĩna nuona kĩna ĩkaa alĩ ijuile ĩanzegamĩla.

¹⁷ Mũshũnagogi naĩkĩtambuĩla nĩAyahũdi nĩakulia-Nzua nĩaasio naalukuagaana pigyulĩlo lutondo kulutondo.

¹⁸ Nityũmpĩ lya Aepukuleo nĩAstoiko, ĩakola masala naataagana nduyo. ĩĩĩa naaũga; “uMusolia umbodele uyu, muloe kwitambula yaani gile.” ĩĩa naaũga; “Wigyelĩĩle zĩ mutanantia wa anzua a kĩgenda.” Kunsooko alukumutanantia ũYesu nuwiiuki.

¹⁹ Paapo naamuamba, naamutuala pĩna yukuĩtanguaa Aleopago, naaũga, “Kusũũmilene kwilĩnga uumanigua uu naupia nukuutambula?

²⁰ Kuitĩ wiingĩlia nkaani ng'enda muakutuĩ ĩĩtu. Kualoe gua kwilĩnga ĩndogolelio ya npola izi.”

²¹ Kuitĩ ĩantu a Atene nĩagenda naĩkikyalaa paasio alĩ agila kalioma kulukaani naluĩngĩ isiititũla kwitambula nukwiigia impola nampia.

Utanantia wa kĩPaulo kuAleopago

²² uPaulo nuĩmĩka pakatĩ ya Aleopago, nuũga, “Inie agoosia a Atene, tũlũ pensi naonaa kĩna inie mwĩantu a wĩtekeli.

²³ Kuitĩ pĩna aza nikĩla uko ninduuko nukwilaaa iintu namukuitekelaa namona uupolelio pĩna alĩ yoolue itĩ, ‘KWA KĩNZUA NASIKA MUMANUE?’ Luulo gua, unuasio namukumutekelaa nasika mumuĩzĩ, uuzo ĩne nukumutanantĩlia inie.

²⁴ uNzua naalutũndile uunkũmbigyulu niintu yensi naikoolĩ, sikukikyalaa munumba za wĩtekelo nanzegue kumĩkono, kunsooko muene Shekulu wigyulu nĩnsĩĩ.

²⁵ Kangĩ siku kĩtumĩlaguaa kumĩkono ya antu zĩ musilĩlue kĩntu kiensi, kunsooko uzo muene ukuapeelaa ĩantu ensi uumĩ numuau niintu yensi.

²⁶ Ninduyo alutũndile ndugu yensi nya antu kwipũna mumuntu umuĩ, ĩĩme muusiu wa nsĩĩ, nuaĩĩkĩlia ĩmatũngo nimĩmbĩ za wikyalo waao kwipũna umuandio.

²⁷ amudũũme uNzua, anga ĩkunzĩla ya kuaapaatia-aapaatia amuone, ĩpa sika wĩĩmile kulĩ nuwensi kumiĩtu.

²⁸ Kuitĩ munsĩ yaakue ishie kukikyalaa, kukugendela, nukwitũla nuuumĩ. Kĩna iio umuĩ waani, muĩmbankumbu, aluũgile, ‘Kuitĩ ishie kwĩuleli waakue.’

²⁹ Luulo gua, kunsooko kwĩuleli wa kĩNzua, sika yukũjĩpĩĩle kukumupianĩkĩĩlia uNzua nĩ zahabũ katia mpĩa katia gyue, iintu naalĩ ijĩpigue kuutiani nĩmasĩĩgo ma kĩuntu.

³⁰ ĩMatũngo ma usiitimana, uNzua alĩ wĩtendile zĩ sikumaoonie; ĩpaino ualagĩlĩĩlie ĩantu ensi tũlũ kwensi apele.

³¹ Kunsooko uĩĩkile ulutondo lwa kulamula uunkũmbigyulu mukulukuuluu kumuntu naalumusaaguĩle; ninduyo nuapĩĩle ĩantu ensi ukamĩnkĩĩlia wa mpola izi kunzĩla ya kumũiukia kwipũna muakiu.”

³² Pĩna naiigia impola za wiiuki wa akiu, ĩĩĩa naaleeta mapana, ĩĩĩa naaũga, “Kukakukutegeela kangĩ mumpola izi.”

³³ Paapo uPaulo nulega kumiao.

³⁴ iTyũmpĩ lya antu naakamantana nduyo, naasuĩĩla, muaasio alumoolĩ Dionisio uMualeopago, numusungu umuĩ ĩliina liakue Damalisi nĩnaĩngĩ palumuĩ nĩndĩo.