Utendi 16 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Timoteo wamuagaana uPaulo kuLisitĩla

¹ Nupika kuDelibe nĩLisitĩla. Kuasio alukoolĩ mumanigua, ĩliina liakue Timoteo, muana wa musungu wa kĩYahũdi nusuĩlĩĩle, ĩpa ũshee alĩ Mugiliki.

² ũTimoteo alĩ mukuĩlue iiza nĩanũna naalĩ ĩĩlĩ muLisitĩla nĩIkonio.

³ uPaulo nukunga ĩtiate ninduyo, numusola numualammia kunsooko ya Ayahũdi naalĩ akoolĩ kunandĩ zaasio, kuitĩ tũlũ alĩ amanile kĩna ũshee alĩ Mugiliki

⁴ Pĩna alĩ akĩlĩĩle pakatĩ ya kaa zaasio, naapeela ĩmalagĩĩlio naalĩ malagĩĩligue nĩatumua nĩanampala naĩĩlĩ mũYelusalemũ, amakendegeele.

⁵ Iio gua, ĩmakanisa namakamĩnkĩĩligua muusuĩĩli; iyalo liao naliongeeleka ntondo zensi.

Musĩnzo wa kĩPaulo muAsia naniino

⁶ Pĩna naakĩla pakatĩ ya nsĩĩ ya Piligia nĩGalatia, pĩnanaasiitĩligua nuMuau Muelu aleke kulutambula ulukaani munsĩĩ ya Asia.

⁷ Pĩna naapika kwitungĩnkana kuMisia, naagema kwilongola kuBitinia, ĩpa uMuau wa kĩYesu sika nuagombia;

⁸ naakĩla muMisia, naatinintĩkĩla kuTiloa.

⁹ uPaulo nwigyeleelua nĩmaoni muutiku numuona umuntu wa kuMakedonia wĩĩmĩkile ukumupeepia, nwiũga, “Pũũta wĩĩze kuna Makedonia ukualĩĩlie!”

¹⁰ Pĩna numaona ĩmaoni, ĩkamuĩ nakuloma kwienda kuMakedonia, nakumana kutai kĩna uNzua ukuĩtile ishie kuatanantĩlie impola na nziiza.

Paulo wipũũta kuMakedonia nu kuFilipi

¹¹ Nakulega paTiloa, nakũingĩla mwipyango, nakulongola nakutunga ĩkĩsongela kya kuSamotialeke; sunga mudaau nukupika kuNeapoli.

¹² Kwipũna kuasio nakupika kuPilipi, ikaa nankulu nyaMakedonia, kangĩ muasio muna Alumĩ alĩ atemile. Nakuĩma mukaa niasio ntondo nkeei.

¹³ Palutondo lwa wikyali nakupũna kunzi ya kaa nakuenda piipĩ pamoongo pĩna alĩ kusĩĩgile kĩna ikoolĩ pawĩtekelelo, nakũkyalansa nukukĩtambuĩla nĩasungu naalĩ, ĩlundĩlĩĩle paasio.

¹⁴ Musungu umuĩ, ĩliina liakue Lidia, naalukugulagiaa intiila nantitimũ, mukolakaa wa kuTiatila, mukulia Nzua, nukuiigia. Ninduyo uNzua numukũnukula ĩnkolo wazikendegeele nazitambulua nuPaulo.

¹⁵ Pĩna nubadĩĩzigua nĩa numba yakue sue, nukupeepia nuũga, “Kanga ĩmwamonaa kĩna naazaa musuĩĩli mwa kĩShekulu, ingĩlĩ munumba yaane, mwikyale.” Nukukankanĩka.

¹⁶ Pĩna alĩ kulonguĩle paasio pawĩtekelelo, mutũgua umuĩ naalutĩĩte lĩsĩĩmuĩ lya uganga wityaĩle nukuagaana; naalĩ waaligĩĩlie ishekulu aakue nsaĩlo ningĩ kuutaĩĩlia.

¹⁷ Numutiatĩĩla uPaulo nindiishie, nuzoguĩlie, nuũga, “ĩAntu ĩa ingĩ ĩtumi a kĩNzua nwa kukiania, naakumutanantĩlagiaa ĩnzĩla ya ugũnua.”

¹⁸ Nutenda iio ntondo ningĩ. ĩpa uPaulo nuĩĩpĩlua, nupĩluka, nulĩĩĩla ĩlĩsĩĩmuĩ, “Nakulagĩĩlia ue, kuliina lya kĩYesu Kilisito, pũna mumuakue,” Nalĩpũna lĩĩlo tyũngo.

Paulo nuSila itũngua nukwitũnguĩlua

¹⁹ Pĩna iishekulu aakue naaona kĩna uulaaĩĩli wa nsaĩlo yaao yalega, naamuguĩla uPaulo nuSila, naakuesa sunga kũgyulaanĩlo ntoongela ya akulu.

²⁰ pĩna naatuala kualamuli naaũga, “ĩAntu ĩa ingĩ Ayahũdi, naakumĩzũga ĩkaa yĩĩtu,

²¹ Kangĩ itanantia itendo naza miiko kumuĩtu kukuzigomba nukukuzitenda kunsooko ishie kwĩAlumĩ.”

²² ĩAntu iyũmbĩ naaauukĩĩla; nĩalamuli naaajiula intiila zaao kungũlũ, naalagĩĩlia akuue nkome.

²³ Pĩna naaakua makuo mingĩ, naagumĩla mukĩtũngo, naamulagĩĩlia umulindĩĩli wa kĩtũngo waalindĩĩlĩkie.

²⁴ Pĩna nuligia ilyagĩĩlio ĩlĩ, nuagumĩla kwityando lya mukatĩ nuatũnga ĩmĩgulu kumatendele.

²⁵ Muutiku wa katĩ uPaulo nuSila alĩ ilompa nukukumuĩmbĩla uNzua ĩmĩmbo, nĩatũngua naĩngĩ alĩ akuategeela.

²⁶ Kumpũmpũkĩli umumanga namukulu nausũngũsia ĩnsĩĩ, sunga ĩmĩkũlĩla ya kĩtũngo nĩsũngũsĩka, ĩkamuĩ injĩĩgĩ zensi nazigyulĩka nĩmatendele tũlũ mensi namatũngulua.

²⁷ Pĩna umulindĩĩli wa kĩtũngo nulaĩla mundoolo nukwiona kĩna injĩĩgĩ za kĩtũngo zigyulĩkaa, nusopoola iyũmba liakue nusiia wĩulage, nusĩĩga nĩmbũge ĩatũngua amankaa.

²⁸ ĩpa uPaulo nwĩtuntĩkia ululi luakue nuũga, “Leka kĩalalia, kuitĩ ishie tũlũ kukoolĩ mwanu.”

²⁹ Nulagĩĩlia iintala zileetue, nũingĩlanga mukatĩ nwikĩkĩma kuooa, nuaguĩĩla Paulo nuSila,

³⁰ nuapũnia kunzi, nuũga, “Agoosia inie, injĩpĩĩle ntende yaani koona ngũnĩke.”

³¹ Naamuĩĩla, “Suĩĩla mwa kĩShekulu Yesu, nunduue ukigunĩka,” nĩaasio naĩĩlĩ munumba yaako.

³² naamuĩĩla ulukaani lwa kĩShekulu, uzo nĩensi naalĩ ĩĩlĩ munumba yaakue.

³³ Nuasũgamĩĩlia ityũngo lĩlo-lĩĩloo lya utiku, nwĩoogelia inkomele zaao za ukuua, tũlũ ensi.

³⁴ Nuatuala kunumba yaakue, nualũgĩla india, nulumbĩkia umuene nĩnumba yaakue tũlũ yensi, kunsooko alĩ wasuĩĩlaa mwa kĩNzua.

³⁵ Pĩna naweelaa, ĩalamuli naatuma ĩĩlaasi, naaũga, “Atũnguĩlĩ ĩantu aasio.”

³⁶ uMulindĩĩli wa kĩtũngo numuĩĩla uPaulo inkaani izi, nuũga, “ĩAlamuli aatumile ĩantu mutũnguĩlue;” kuluulo gua, pũnĩ kunzi, lendĩ nĩmatiliga.

³⁷ Ĩpa uPaulo nuaĩĩla, “Aza akukuile ntongela ya antu sika kualamulue nipilindĩ, nindiishie kuAlumĩ, kangĩ naakugumĩla mukĩtũngo, ĩpaino akupũnie kukĩmpisĩ-mpisĩne. Sika iio; naaze ĩeene akupũnie.”

³⁸ ĩĨlaasi naatualĩla ĩalamuli inkaani izi, nĩndĩo naoopooka pĩna naiigia ya kĩna alĩ Alumĩ.

³⁹ naaaza naapeepia; pĩna naapunia, naaaĩĩla alege mukaa niasio.

⁴⁰ Pĩna naapũna mukĩtũngo naingĩla munumba ya kĩLidia; pĩna naĩona nĩanũna, naapumbulia, naalongola.