Utendi 15 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

AKilisito a ndugu nazĩngĩ nuUlagĩĩlio wa kĩMusa

¹ Naaaza ĩantu kwipũna kuUyahũdi naakuamania ĩanũna, “Kanga musiitialamigua kukuzitiata intendo za kĩMusa sika musũũmile kwigũnĩka.”

² Pĩna uPaulo nuBalinaba naĩkunguma nukukĩtambuĩla nĩndĩo kunkaani ningĩ, naaaĩĩka uPaulo nuBalinaba nĩĩĩa pakatĩ yaao ende kũYelusalemũ kuatumua nĩanampala, ende kĩtambuĩla impola zikyolio ĩlĩ.

³ Iio gua; pĩna atumue nikyanisa, naakĩlĩla pakatĩ ya Poiniki nĩSamalia, naiganula impola za ukaĩlĩki wa ndugu nazĩngĩ naalumbĩĩlia ĩanũna tũlũ nkankanaa.

⁴ Pĩna naapika kũYelusalemũ, naasũgamĩĩligua nikyanisa nĩatumua nĩanampala, naaaganuĩla impola zensi, kĩna uNzua alutendile nĩndĩo.

⁵ Ĩpa ĩĩĩa mwityũmpĩ lya Apalisayo naasuĩlĩĩle naĩĩmĩka naaũga, “Kutilĩ kawĩnegelo kukuaalamia nukukualagĩĩlia auambe uUlagĩĩlio wa kĩMusa.”

Mulundo wi Yelusalemũ

⁶ ĩAtumua nĩanampala naĩlundĩĩla alusĩĩge ulukaani luasio.

⁷ Pĩna naĩtambuĩlĩkia, uPetelo nuuuka nuaĩĩla, “Agoosia anũna aane, inie mumanile kwipũna intondo za muandio, kĩna uNzua alusaaguĩle pakatĩ yaani ya kĩna indugu nazĩngĩ ziigie ulukaani lwa mpola na nziiza kumulomo waane, nukukulusuĩĩla.

⁸ uNzua numanile inkolo, nuakuĩla nuapeela uMuau Muelu kĩna yoi naalukupĩĩle nindiishie,

⁹ Kangĩ sika nukulekanula ishie nĩndĩo, ĩpa nwĩoogia inkolo zaao kuusuĩĩli.

¹⁰ Iio gua, nĩkĩ mukumugema uNzua nukukuatũngĩĩlia ipyĩmpĩ munkingo za amanigua, sunga ĩatata ĩĩtu nindiishie sika kusũũmile kukulĩkenka.

¹¹ Ĩpa kusuĩlĩĩle ya kĩna kwigũnua kunzĩla ya ukende wa kĩShekulu Yesu, lika lĩmuĩ nĩndĩo gaa.”

¹² uMulundo tũlũ wensi nautuulia, naamutegeela uBalinaba nuPaulo pĩna naaganuĩla impola za ilĩngasĩĩlio nĩmakula uNzua naalumatendile pakatĩ ya ndugu nazĩngĩ kuwĩtumi waao.

¹³ Pĩna naakondia inkaani zaao, uYakobo nushookeelia nuũga, “Agoosia anũna aane, ntegeelĩ.

¹⁴ uSimoni wakuganuĩlaa ya kĩna uNzua aluzagaanile indugu nazĩngĩ pakalĩ, koona waasaagule antu pakatĩ yaao kunsooko ya liina liakue.

¹⁵ Ninkaani za anakĩdagu zakamantana nĩzaasio, kĩna yandĩkue,

¹⁶ ‘Pĩna zakĩla zaasio nikishooka, Nineene nĩkakĩmĩzenga ĩnumba ya kĩDaudi nyaguile. Nikijenga kangĩ uutalũkũ wakue, nineene nĩkakumiĩmikia.

¹⁷ Koona ĩantu naasaagile amudũũme ũshekulu, nindugu zensi nazĩngĩ, kuaasio kĩna ĩliina liane tyeegue,

¹⁸ Uũgile ũShekulu, nuzilĩngilie ĩzaasio kwipũna ĩkalĩ.’”

¹⁹ “Kuluulo, ĩne nalamula kĩna kuleka kuakunkunalia ĩaasio a mundugu nazĩngĩ naamupĩlukĩlĩĩle uNzua;

²⁰ ĩpa kwĩandĩkĩle ĩsungansuge nuudobũ wa anzegamĩla, nuugololia nĩnama nangogue, nĩmĩgali.”

²¹ “Kuitĩ kwipũna ĩkalĩ sunga nunzuauu uMusa utĩĩte mukaa zensi nakutanantagiaa inkaani zaakue, kangĩ mumasũnagogi zukusomaguaa palutondo lwa wikyali.”

Mbalua kuAKilisito a ndugu nazĩngĩ

²² Paapo nayĩaloeelia ĩatumua nĩanampala palumuĩ nikyanisa liensi aasaagule antu pakatĩ yaao atume kuAntiokia palumuĩ nuPaulo nuBalinaba. Nĩndĩo ntĩĩa, ũYuda nukuĩtanguaa Balisaba, nuSila naalĩ atongeeli pakatĩ ya anũna.

²³ Naandĩka mbalua, amĩtuale kumĩkono yaao, itĩ, “Ishie anũna aani, atumua nĩanampala, kuanũna ĩĩtu naapũnile mundugu nazĩngĩ naĩĩlĩ kuAntiokia nukũShamũ nĩKilikia, kumulamukilie.

²⁴ Kunsooko kuigagiaa ya kĩna ĩĩĩa naalĩ apũnile mumuĩtu akumuzũga inie kunkaani zaao, akumuleetela inkankani munkolo zaani, nindiishie sika alĩ kualagĩlĩĩlie;

²⁵ pĩna kwakamantana kwishĩĩgo lĩmuĩ, ishie kwaona iiza kuasaagule ĩantu nukukuatuma kunsiani palumuĩ nĩaloogua ĩĩtu uBalinaba nuPaulo.

²⁶ Ĩantu naapũnilie uumĩ waao kunsooko ya kĩShekulu wĩĩtu Yesu Kilisito.

²⁷ Kuluulo, kuatuma ũYuda nuSila naĩkakumuĩĩla ĩeene kumĩlomo yaao inkaani zizo-ziizoo.

²⁸ Kuitĩ uMuau Muelu nindishie kukamantanile kuleke kumutuĩka umuligo isiitula ziizo dũũ nazijipĩle,

²⁹ mwĩsugansuge niintu naipoleligue kuanzegamĩla, nĩmĩgali, nĩnama nangogue, nuugololia. Kanga mwĩgilie niyasio mukitenda iiza. Mulamugua.”

³⁰ Iio gua, pĩna naatumua, naenda kuAntiokia, naauilingĩĩla umulundo, naapũnia ĩmbalua niasio.

³¹ Pĩna naamĩsoma, naalumba kunsooko ya kukamigua inkolo.

³² ũYuda nuSila naeene anakĩdagu, naakamia nkolo ĩanũna kunkaani ningĩ, nukukuakamĩnkĩĩlia.

³³ Nĩndĩo pĩna naĩĩma kuasio intondo nkeei naashookigua nĩmatiliga nĩanũna kuaasio nalĩ aatumile.

³⁴ Ĩpa uSila nuona iiza wikyale kuuko.

³⁵ uPaulo nuBalinaba naikyala muAntiokia naimania nukukulutanantia ulukaani lwa kĩShekulu palumuĩ nĩantu naĩngĩ iingĩ.

³⁶ Pĩna nazikĩla ntondo nkeei, uPaulo numuĩĩla uBalinaba, “Kushooke gua, kualaae ĩanũna mukaa zensi muna alĩ kutanantilie ulukaani lwa kĩShekulu, kuone impola zaao.”

³⁷ uBalinaba nukunga wamusole uYohana nukuĩtaguaa Maliko, ende palumuĩ nĩndĩo.

³⁸ Ĩpa uPaulo sika nuona iiza endanie nunuasio naalualekile kuPamfilia naalusiitile kwienda ensi nĩndĩo kumulĩmo.

³⁹ Luulo gua, nauuuka wĩkungumi sunga naalekanuka. uBalinaba numusola uMaliko nupũũta ĩnanza nuenda kuKiipulo.

⁴⁰ Ĩpa uPaulo numusaagula uSila, nulega pĩna nulompeelua nĩanũna wapeegue ukende wa kĩNzua.

⁴¹ Nukĩlĩla pakatĩ ya Shamũ nĩKilikia, nukukumakamĩnkĩĩlia ĩmakanisa.