Utendi 14 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uPaulo nuBalinaba kuIkonio

¹ Kuasio kuIkonio naingĩla palumuĩ mũshũnagogi lya Ayahũdi. Naatambula, sunga ĩAyahũdi nĩAgiliki, iingĩ dũũ naasuĩĩla.

² Ĩpa ĩAyahũdi nasika alĩ asuĩlĩĩle naaalũangĩla ĩantu a ndugu nazĩngĩ nukukuapandĩlĩlia inkolo nambĩĩ mumpola za anũna.

³ Naikyala kuuko ntondo ningĩ, naitambula kunkolo ya kĩgoosia mwa kĩShekulu, naalukuĩlĩĩle ulukaani lwa ukende wakue, nukuasũũmia sunga ilĩngasĩĩlio nĩmakula matendue kumĩkono yaao.

⁴ Ĩpa ĩantu a mukaa naĩkamatula, ĩĩĩa alĩ ĩĩlĩ kuluandĩ lwa Ayahũdi, ĩĩĩa kuluandĩ lwa atumua.

⁵ Ĩpa indugu nazĩngĩ nĩAyahũdi palumuĩ nĩakulu aao naauukia ulugu kumiao, aagaalĩle nukukuatũla ĩmagũe.

⁶ Ĩo naaziigia impola izi, naatalamĩla kuLisitĩla nĩDelibe, kaa za Likaonia ninshĩĩ naalĩ zĩpiipĩ.

⁷ Nukuasio naazitanantia impola na nziiza.

uPetelo nuBalinaba kuLisitĩla

⁸ Kuasio kuLisitĩla alukoolĩ muntu alĩ mulemue mĩgulu, munakĩtele kwipũna mundaa yakĩ nina, alĩ wikĩĩlĩ kalagenda.

⁹ Uyu alumũigilie uPaulo pĩna alĩ witambula; uPaulo numutuupĩĩla, nuona kĩna utĩĩte usuĩĩli wa kukamigua,

¹⁰ nuũga kululi lukulu, “Ĩĩmĩka kumĩgulu yaako, ĩgolole!” Nuuka kuukaaũ, nũigenda.

¹¹ Niuũmbĩ pĩna nalĩona kĩna uPaulo alutendile, naĩtunta kutambo ya kĩLikaonia, “ĨAnzua akũikĩĩlaa kumpiani ya antu!”

¹² uBalinaba naamutea ĩliina liakue Zeu, nuPaulo, Helime, kunsooko muene mutambuli.

¹³ uMupolia wa kĩZeu, ijumba liakue naalĩ liĩlĩ ntongela ya kaa, nuleeta ing'ombe ningala za ukelu sunga pamamĩlango, nukunga wapũnie ipyolia palumuĩ niyũmbĩ.

¹⁴ Ĩpa ĩatumua Balinaba nuPaulo pĩna naiigia impola naatandula intiila zaao, naamanka kuukaaũ naingĩla mumulundo. Naĩtunta,

¹⁵ naaũga, “Agoosia inie, nĩkĩ mwitenda itĩ. Ishie nindiishiie kwĩantu kwilika lĩmuĩ niniinie, kukumutanantĩlia inie iMpola na Nziiza, koona mukaĩlĩke nukukuzileka intendo izi nangila kansaĩlo, mutungĩnkane nuNzua namupanga, naalutũndile igyulu nĩnsĩĩ nĩnanza niintu tũlũ yensi naikooolĩ.

¹⁶ Pakalĩ nuzileka indugu tũlũ zensi zigendele munzĩla zaao inene.

¹⁷ Ĩpa sika nwĩleka ĩmugila kaukuĩli kunsooko ukutendaa namaaza nukukumupeela ĩmbũla kwipũna kwigyulu nĩmatũngo ma uogoli, nukumupeela india nazendile muumo, nuulumbi wa nkolo zaani.”

¹⁸ Pĩna alĩ atambuĩle izi, naishaaga iniino udũũ alemue kukumagilia ĩmaũmbĩ maleke kuapũnĩlia ipyolia.

¹⁹ Ĩpa ĩAyahũdi naapika kuasio kwipũna kuAntiokia nĩIkonio, naamasisikĩĩlia ĩmaũmbĩ, naamutũla ĩmagũe uPaulo naamukuesa kunzi ya kaa, naishĩĩga kĩna wakiaa.

²⁰ Ĩpa pĩna ĩamanigua naamupilimikĩĩlia nuĩmĩka, nũingĩla mukaa; palutondo lwa kabĩlĩ nulega, nuenda palumuĩ nuBalinaba kuDelibe.

uPaulo nuBalinaba ishooka kuAntiokia

²¹ Pĩna naatanantia impola na nziiza mukaa niasio nukwiligia amanigua iingĩ, naashooka kuLisitĩla nĩIkonio nĩAntiokia,

²² naakuzĩkamĩnkĩĩlia inkolo za amanigua nukukuasugula ĩkamatĩkie muusuĩĩli, naiũga ya kĩna yukũjĩpĩĩle kwiingĩla muutemi wa kĩNzua kuwaagi wĩngĩ.

²³ Pĩna naamasaagulĩlia ĩmakanisa tũlũ ĩanampala, naalompa nukwilaalĩla palumuĩ, naaaĩĩka mumĩkono ya kĩShekulu naalĩ asuĩlĩĩle mumuakue.

²⁴ Naakĩlĩla pakatĩ ya Pisidia, napika kuPampulia.

²⁵ Pĩna naalutanantia ulukaani muPelige, naenda sunga kuAtalia.

²⁶ Kwipũna kuasio naapũũta ĩnanza ende kuAntiokia; kuasio kuuko alĩ aĩĩkue muukende wa kĩNzua kumulĩmo waasio naalĩ autumile.

²⁷ Pĩna naapika, naalĩlundĩĩla ikyanisa, naaganuĩla impola zensi naaluzitendile uNzua ni ndĩo, nikina alĩ uigyuĩlĩĩle ĩa ndugu nazĩngĩ umulango wa usuĩĩli.

²⁸ Naĩĩma kuuko palumuĩ nĩamanigua kũtyũngo sika iniino.