Utendi 13 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kyanisa lya kuAntiokia

¹ Nukuasio kũkyanisa naalĩ liĩlĩ kuAntiokia alĩ akoolĩ anakĩdagu nĩamania. Balinaba nuSimoni nukuĩtagua Nigeli, nuLukio Mukilene, nuManaeni musuamuua wilindĩ lyakĩ jũmbe Helode, nuSauli.

² Pĩna alĩ akumutekela uNzua nukwilaalĩla, uMuau Muelu nuũga, “Nkamatulĩliĩ gua uBalinaba nuSauli kumulĩmo uo naalĩ nĩĩtĩĩle.”

³ Papo pĩna naalaalĩla nukwilompa, naaaĩĩkĩla ĩmĩkono mumuao, naatuma ende.

Balinaba nuSauli kuKiipulo

⁴ Pĩna ĩaasio naatualua nuMuau Muelu, naenda kuSeleukia nukwipũna kuasio naatũnga umusĩnzo munanza sunga kuKiipulo.

⁵ Pĩna naapika kuSalami, naalutanantia ulukaani lwa kĩNzua mumasũnagogi ma Ayahũdi. Nĩndĩo alĩ ĩensi nuYohana wĩĩ mualĩĩlia waao.

⁶ Pĩna alĩ akĩlile pakatĩ ya kĩsiwa kiensi sunga kuPapo, naamuona muntu wa kĩYahũdi, lyagu, munakĩdagu wa ulongo, ĩliina liakue Baliyesu;

⁷ unuasio alĩ ĩensi nũjũmbe Selegio Paulo, muntu munamasala; nduyo nũlagilia uBalinaba nuSauli aletue kumuakue, nusiia walũigie ulukaani lwa kĩNzua.

⁸ Ĩpa uElima, ũlyagu, kuitĩ yoĩ ndogolelio ya liina liakue, naĩĩ kĩkunguma nĩndĩo, nwishiia wamupandĩlĩlie ĩnkolo ũjũmbe nuasio, wauleke uUsuĩĩli waasio.

⁹ Ĩpa uSauli, namuene Paulo, namũjulue nuMuau muelu, numutuupĩĩla,

¹⁰ nuũga, “Ue muana wa mubĩĩ nũjuile upembeelia nuubĩĩ wensi, mulugu wa kulukuuluu yensi, sika wilekane kukuzipeta injĩla za kĩShekulu nangolokũ?

¹¹ Laaa gua, umukono wa kĩShekulu wĩĩlĩ kumuako, nunduue ukipokũla, sika ukakĩmĩona ĩmpasu kwityũngo. ĩkamuĩ lunguĩ nuwiilu naumuagaana, nwiaapaatia-aapaatia nukukumudũũma umuntu wa kumuamba umukono wamutongeele.”

¹² Paapo ũjũmbe, pĩna nuona kĩna alĩ itendekile nusũĩĩla, nukũmia mumpola za umanigua wa kĩShekulu.

kuAntiokia nya kuPisidia utanantia wa kĩPaulo kuAyahũdi

¹³ uPaulo nĩĩĩa naalĩ ĩensi ninduyo naatũnga umusĩnzo munanza kwipũna kuPapo naapika kuPelige ya Pampilia. uYohana nualeka, nushooka kũYelusalemũ.

¹⁴ Ĩpa ĩo naalega kuPelige naakĩlĩla pakatĩ ya nsĩĩ, naapika kuAntiokia ya Pisidia; naingĩla mũshũnagogi palutondo lwa wikyali, naikyalansa.

¹⁵ ĩMatũmpĩ ma Ulagĩĩlio nĩma Anakĩdagu pĩna namasomua, ĩakulu ishũnagogi naatuma muntu kumiao nukukuaĩĩla, “Agoosia anũna ĩĩtu, malĩĩ ĩmutĩĩte lukaani lwa kukamĩnkĩĩlia inkolo za antu, lutambulĩ.”

¹⁶ uPaulo nuuka nuangaazĩlia umukono, nuũga, “Agoosia a Ĩsilaeli niniinie namukumoopokaa uNzua, tegeelĩ.

¹⁷ uNzua wa antu ĩaĨsilaeli alĩ waasaaguĩle ĩatata ĩĩtu, nuakulia ĩantu aasio pĩna alĩ ĩĩlĩ munsĩĩ ya ugenda nya Mĩsili, nukumukono naalĩ munansulue nuapũnia alege kuasio.

¹⁸ Kumiaka makumi manĩĩ nuagigimĩlia mumbugi-melemele.

¹⁹ Pĩna nuzoonoona indugu mupũngatĩ za nsĩĩ ya Kanani, nuapeela ĩnsĩĩ ya usaali kumiaka zĩ magana manĩĩ nĩmakumi mataano.

²⁰ Pembele nuapeela alamuli sunga pantondo za munakĩdagu Samueli.

²¹ Paapo naalompa aligie mutemi, nuNzua nuapeela Sauli muana wa kĩKishi muntu wa kĩntua kya kĩBenjamini, kumiaka makumi manĩĩ.

²² Pĩna numuleegia nuasio, numunansula uDaudi wĩĩ mutemi waao, naalumukuĩlĩĩle, nuũga, ‘Namuona uDaudi muana wa kiYese, muntu nukumĩloeelagiaa ĩnkolo yaane nukwitenda uuloa waane wensi.’

²³ Muwĩleli waakue umuntu nuasio, uNzua wamĩleetĩĩle ĩĨsilaeli Mugũni, ingĩ ũYesu, kĩna alupũnilie ilyago.

²⁴ Pĩna alĩ wikaalĩ kalaaza nuasio, uYohana alutanantilie impola za ubadĩĩzo wa upeli kuantu tũlũ a Ĩsilaeli.

²⁵ uYohana pĩna nuumala umulĩmo waakue, nuũga, ‘Musĩĩgile ĩne neene waani. Ĩne sika nuasio. Ĩpa laaĩ, wijile umuĩ kunũma yaane; ĩne sika nijĩpĩĩle kukumutũngulĩlia ilaatu ya mĩgulu yaakue.’”

²⁶ “Agoosia anũna aane, aana a luuli lwa kĩIbũlahimu, niniinie pakatĩ yaani namumoopokile uNzua, ulukaani ulu lwa ugũnua lwaleetaguaa kumiĩtu.

²⁷ Kuitĩ ĩaasio naakikyalaa mũYelusalemũ nĩakulu aao, kunsooko sika alĩ amumanile uyo, sunga inkaani za anakĩdagu nazukusomaguaa palutondo luensi lwa wikyali, alĩ azitimĩlĩĩlie kukumulamula.

²⁸ Kanga ĩsika alĩ aoonie kansooko ya kumuulaga nakĩ, naamulompa uPilatu waulague.

²⁹ Sunga pĩna naamala zensi naalĩ nandĩkue mumpola zaakue, naamũikia mwikyota, naamuĩĩka mukĩbĩĩla.

³⁰ Ĩpa uNzua numũiukia kwipũna muakiu;

³¹ nwigyelela kuntondo ningĩ kuaasio naalĩ apũnile palumuĩ ninduyo kũGalilaya ende kũYelusalemũ, nunzuauu ingĩ eene akuĩli aakue ntongela ya antu.

³² Nindiishie kukumutanantĩlia inie iMpola na Nziiza zilyago ĩlo naalĩ waapĩĩle ĩatata,

³³ ya kĩna uNzua watimĩlĩĩlie ilyago liasio kuaana ĩĩtu kukumũiukia ũYesu; kĩna yandĩkue muMalumbĩĩlio, mulango wa kabĩlĩ, ‘Ue uue wĩMuana waane ĩne nantende nakulelaa.’

³⁴ Kangĩ ya kĩna uyo numũiukia kwipũna muakiu, walekishookela uoononeki, uũgile itĩ, ‘Nĩkakumupeela inie uukende naweelu nawa tai wa kĩDaudi.’

³⁵ ‘Iio gua, utambuĩle nĩpĩĩa, Sikukakumuleka umuelu waako waone oononeki.’

³⁶ Kuitĩ uDaudi pĩna aluutumĩkĩĩle uulooa wa kĩNzua muwĩleli waakue, nugona nuĩĩkua palumuĩ nĩatata aakue, nuona uoononeki.

³⁷ Ĩpa uyo naalĩ mũiukigue nuNzua sika aluoonie kaononeki.

³⁸ Luulo gua mumane, agoosia anũna aane, kĩnakwa kĩuyu muatanantĩĩligue uleegeligua wa mĩlandu.

³⁹ Kwa kĩuyo wensi nusuĩlĩĩle ukualĩĩlagiguaa ĩkulukuuluu kuUlagĩĩlio wa kĩMusa.

⁴⁰ Luulo gua laaĩ, mulekiaagaanua nimpola izo naalĩ ntambulue nĩanakĩdagu.

⁴¹ Laaĩ inie namukumelaa, kulĩluĩ, musile; Kunsooko nĩkĩtuma umulĩmo muntondo zaani, Mulĩmo nasika mukishuĩĩla kaiiniino Anga umuntu wamuganuĩle.”

⁴² Pĩna alĩ ipũna, ĩantu naaapeepia aĩĩlue inkaani izi palutondo lwa wikyali nalũjile.

⁴³ Pĩna umulundo wishũnagogi nausapatĩla, ĩAyahũdi iingĩ nĩatiati naakumukulagiaa uNzua muwĩtekeli wa kĩYahũdi naaatiatĩĩla uPaulo nuBalinaba naalĩ akĩtambuĩla nĩndĩo, naaakamia inkolo ĩkamatĩkie muukende wa kĩNzua.

Atumwa ienda kundugu nazĩngĩ

⁴⁴ Palutondo lwa wikyali lwa kabĩlĩ, piipĩ ĩkaa yensi naĩlundĩĩla kukulutegeela ulukaani lwa kĩNzua.

⁴⁵ Ĩpa ĩAyahũdi pĩna naamaona ĩmaũmbĩ, naijulua nuwĩĩlũ naazikaania inkaani naalĩ zitambulua nuPaulo nukukumutukĩla.

⁴⁶ uPaulo nuBalinaba naatambula kunkolo ya kĩgoosia, naaũga, “Alĩ yumũjĩpĩĩle inie mutambuĩlue tangua ulukaani lwa kĩNzua, ĩpa kunsooko mukuluguma kulĩ nukukukĩona kĩna uupanga wakalĩ nakalĩ sika umũjĩpĩĩle inie, laaĩ, kwauuka kundugu nazĩngĩ.

⁴⁷ Kuitĩ yoi alĩ kualagĩĩligue nũShekulu, ‘Nakuĩĩkaa ue wĩĩ weelu wa ndugu nazĩngĩ, Utũle ugũnua waao sunga kumpelo ya nsĩĩ.’”

⁴⁸ iNdugu nazĩngĩ pĩna nazigyũlia yaasio, nazilumba, nazulukulia ulukaani lwa kĩShekulu; ndĩo naalĩ aĩĩkue kuupanga wa kalĩ nakalĩ naasuĩĩla.

⁴⁹ uLukaani lwa kĩShekulu nalusapatĩla munsĩĩ niasio tũlũ yensi.

⁵⁰ Ĩpa ĩAyahũdi naakinĩla ĩasungu analukũmo, akulia uNzua, sunga ĩakulu a kaa. Naatũla kuaagia uPaulo nuBalinaba naaaĩnga kwipũna mumĩmbĩ yaao.

⁵¹ Ndĩo naakũnũntila ulunkundĩ lwa mĩgulu yaao, naalongola kuIkonio.

⁵² ĩAmanigua naijulua nuulumbi nuMuau Muelu.