Utendi 12 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Waagania wa kĩHelode; uPetelo wipũna mukĩtũngo

¹ Pantondo zaasio umutemi Helode nunansula ĩmĩkono yaakue kwiaagia ityũmpĩ lya antu ikyanisa.

² Numuulaga uYakobo umunũna wa kĩYohana kwiyũmba.

³ Pĩna nuona kĩna ĩAyahũdi aloeeligue, numuguĩla sunga uPetelo. Alĩ patondo za ugalĩ naugila igaaĩ.

⁴ Pĩna numuguĩla, numũingĩlia mukĩtũngo, numuĩĩkĩla mumĩkono ya maũmbĩ manĩĩ ma ĩlaasi, iyũmbĩ liensi ĩlaasi anĩĩ, amulindĩĩle, alusiiile wamupũnie wamũgyelelie ntongela ya antu pĩna ulutondo lwa Pasaka lwakĩla.

⁵ uPetelo nulindĩĩlua mukĩtũngo, nikyanisa nalyumulompa uNzua kuukamatĩkũ kunsooko yaakue.

⁶ Sunga pĩna uHelode nusiia kukumupũnia, uutiku uuoo uPetelo alugonile pakatĩ ya ĩlaasi abĩlĩ namutũngue matendele mabĩlĩ; nĩalindĩĩli pamulango naakĩlindĩlĩĩle ĩkĩtũngo.

⁷ Laaa, umalaĩka wa kĩShekulu numũgyeleela, weelu nawelia mukĩtũngo, numukua uPetelo mulualũ, numulaĩlia, nuũga, “Kaawa uuka!” ĩMatendele namalega mumĩkono yaakue.

⁸ uMalaĩka numuĩĩla, “Ĩtũnge, jiala niilaatu yaako.” Nutenda iio. Numuĩĩla, “Ĩkũmbe numunkũmbĩ waako, ntiata.”

⁹ Nupũna kunzi numutiata; sika numana kĩna aza tai namatendue nuMalaĩka, ĩpa alusĩĩgile kĩna nĩmbũge wiona maoni.

¹⁰ Pĩna naakĩla paulindĩĩli wa muandio nuwa kabĩlĩ, sunga naenda palyumulango lya kiuma lya kũingĩlĩla mukaa naligyulĩka ĩliene. Naapũna kunzi naakĩlĩla munzĩla ĩmuĩ, ĩkamuĩ umalaĩka numuleka.

¹¹ uPetelo pĩna nulĩnga munkolo yaakue, nuũga, “Ĩpaino naonaa tai kĩna ũShekulu azumutumile umalaĩka waakue nukwindeegia mumukono wa kĩHelode numuzensi ĩantu a kĩYahũdi naalĩ azilaaĩlĩĩle.”

¹² Pĩna alukumasĩĩga aya, nupika kunumba ya kĩMalia, unina wa kĩYohana, ĩliina liakue lya kabĩlĩ Maliko, muasio antu iingĩ alĩ ĩlundĩlĩĩle, nailompa.

¹³ Pĩna nukinintia pamulango wa mpongolo, mutugua ĩliina liakue Loda, nuuza kwitegeela.

¹⁴ Pĩna nululĩnga ululi lwa kĩPetelo sika nulũgyula uluĩgĩ kunsooko ya ulumbi, ĩpa numanka munumba, nuaĩĩla kĩna uPetelo wĩĩlĩ pamulango.

¹⁵ Naamuĩĩla, “Wishalane ue!” Ĩpa uyo nuũga; Tai kũgile. Naaũga, “Uyu umalaĩka waakue.”

¹⁶ uPetelo nwĩkakia kwikinintia, sunga pĩna naamũgyuĩla, naamuona, naakũmia.

¹⁷ Ninduyo nuaangaazĩlia umukono atuulie, nuaganuĩla kĩna ũShekulu azumupũnilie mukĩtũngo, nuũga. Mumuĩĩle uYakobo nĩanũna impola izi. Nulega, nuenda pĩngĩ.

¹⁸ Sunga pĩna naweela, ĩĩlaasi naakunguala zigi-zigi yatũla mbii uPetelo.

¹⁹ NuHelode pĩna numudũũma, sika numuona; nuakolekeelia ĩalindĩĩli, nulagĩĩlia aulague. Pĩna nulega muUyahũdi nuenda kuKaisalia nwikyala kuuko.

²⁰ nuHelode alĩ waatakĩlĩĩle dũũ ĩantu a Tilo nĩSidoni; ndĩo pĩna naakondia kukĩpaa ĩmbua nuBalasito, mukendegeeli wa migyuĩlo ma mutemi, naamuendeela kwishĩĩgo lĩmuĩ, naidũũma ĩmatiliga, kunsooko ĩnsĩĩ yaao alĩ yukuligagiaa india kwipũna kunsĩĩ ya mutemi.

²¹ Lutondo lumuĩ naalĩ lulagĩĩligue, uHelode nujiala majialo ma kĩtemi, nwikyalansa mwityengu lya ulamuli, nupũnia inkaani ntongela yaao.

²² ĩAntu naakulia ĩkĩlanga, naaũga; “Ĩngĩ luli lwa kĩnZua, sika luli lwa muntu!”

²³ Ĩkamuĩ umalaĩka wa kĩShekulu numukua kunsooko sika alumupĩĩle uNzua uukulu; nulĩĩgua ning'ũnuĩ, nutiĩka nkolo.

²⁴ uLukaani lwa kĩNzua nalulongoleka nukwishapatĩla.

²⁵ uBalinaba nuSauli pĩna naamala uwĩtumi waao, naashooka kwipũna kũYelusalemũ, naamusola palumuĩ ndĩo uYohana nukuĩtagua Maliko.