Utendi 11 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uPetelo wilondoosia nsooko ya uutendi waakue

¹ ĩAtumua nĩanũna naalĩ ĩĩlĩ kuUyahũdi naaziigia impola kĩna indugu nazĩngĩ ndĩzo zaanũnkuĩle ulukaani lwa kĩNzua.

² NuPetelo pĩna nunankĩla wende kũYelusalemũ, ĩaasio naalĩ aalamigue naĩĩ kĩkunguma nduyo,

³ naaũga, “Wingĩla nĩkĩ kuantu nasika aalamigue sunga nukũlĩa nĩndĩo.”

⁴ uPetelo nuandia kukualondoosia kĩĩsa kĩĩsa nuũga,

⁵ “Alĩ nĩĩlĩ mukaa iYopa, alĩ nilompa, ĩnkolo yaane nĩkia mukanka namona maono; kĩseme nakĩtima zĩ ntiila nkulu nakiikigua kwipũna kwigyulu kumpembe zaakue zinĩĩ, nakĩnzagaana.

⁶ Nanĩkĩtuupĩĩlĩkia, naniishĩĩga, naniziona inimu za muna nsĩĩ ninkialu nĩnazĩkĩkuesaa ninoni za mukiania.

⁷ Naniigia nululi nalumbuĩla, Uuka Petelo, ulaga ulĩe.

⁸ Nambũga, ‘Leka yaasio Shekulu, kuitĩ ĩkĩntu nakĩdobũ katia nasika kieligue kikaalĩ kingĩle mumulomo waane sunga kainiino.’

⁹ uLuli nalunzagaana nkua ya kabĩlĩ kwipũna kwigyulu naluũga, ‘Nũyeelilie uNzua ue uleke kuyĩĩta idobũ.’

¹⁰ uLukaani ulu nalũngyeleela nkua zitatu, pembele iintu yensi naishookigua kwigyulu.

¹¹ Laaa, ĩkamuĩ antu atatu naĩĩmĩka ntongela ya numba muna alĩ kuĩlĩ, naalĩ atumue kumuane kwipũna kuKaisalia.

¹² uMuau numbuĩla kwĩtiate nĩndĩo, ndekitũla ninkankani. ĩAnũna ĩa naĩmutandatu nakwĩtiata nakũingĩla munumba ya muntu uuyo.

¹³ Nukuganuĩla kĩna alumuoonie uMalaĩka naalĩ wĩĩmĩkile munumba yaakue nukukumuĩĩla, Tuma antu ende kũYopa, umuĩte uSimoni nukuĩtaguaa Petelo,

¹⁴ nukakukuĩĩla inkaani nazĩkakukugũna ue nĩnumba yaako tũlũ.

¹⁵ Pĩna alĩ nandiilie kwitambula, uMuau Muelu nuatimĩĩla kĩna yoi naalukutimĩlĩĩle ishie pamuandio.

¹⁶ Nanulũjuka ulukaani lwa kĩShekulu kĩna aluũgile, uYohana alubadĩzilie kumazĩ ĩpa inie mukibadĩzigua kuMuau Muelu.

¹⁷ Ĩpa gua, anga uNzua ĩwaapĩĩle ĩkĩpeegua kĩĩkio-kĩĩkio naalukupĩĩle ishie pĩna alĩ kusuĩlĩĩle mwa kĩShekulu Yesu Kilisito, aĩne neene waani gua, nsũũme kukumugilia uNzua?”

¹⁸ Pĩna naigyũlia zaasio naatuulia, naamukulia, “uNzua naaũga, sunga kundugu nazĩngĩ uNzua waapĩĩle upeli aligie upanga.”

Kyanisa lya ndugu nazĩngĩ kuAntiokia

¹⁹ ĩAasio gua, naalĩ asapatĩĩle kunsooko ya luago naalĩ lũgyeliile kumpola za kĩSitepuano, naenda sunga kuPoiniki nĩKiipulo nĩ Antiokia, sika naatanantia ulukaani isiititũla kuAyahũdi udũũ.

²⁰ Mwiyũmbĩ liasio, ĩĩĩa alĩ antu a kuKiipulo nĩKilene; nĩndĩo pĩna naapika kuAntiokia, naĩtambuĩla nĩAgiliki gaa, naakuatanantĩlia iMpola na Nziiza za kĩShekulu Yesu.

²¹ uMukono wa kĩShekulu nawĩĩ palumuĩ nĩndĩo, nĩantu iingĩ naasuĩĩla, naamupĩlukĩĩla ũShekulu.

²² iMpola zaasio za antu aasio nazipika muakutuĩ ikyanisa naliĩlĩ kũYelusalemũ; naamutuma uBalinaba wende sunga kuAntiokia.

²³ Ninduyo pĩna nupika nuuona ukende wa kĩNzua, nulumba, nuakamia nkolo, ĩĩ ĩensi nũShekulu kwishĩĩgo lĩmuĩ,

²⁴ kunsooko alĩ muntu muuza nalĩ mũjulue nuMuau Muelu nuusuĩĩli. Iyũmbĩ kyulu naliongeeleka kwa kĩShekulu.

²⁵ Pembele uBalinaba nulongola kuTaliso kukumudũũma uSauli.

²⁶ Pĩna numuoona numuleeta kuAntiokia. Nayĩĩ kũtyũngo lya muaka koo naĩkĩilingĩĩlaa palumuĩ nikyanisa nukukulĩmania iyũmbĩ kyulu lya antu. Paasio pa Antiokia ĩamanigua alĩ nkua ya muandio kwiĩĩtua AKilisito.

Utumua wa kĩBalinaba nuSauli kũYelusalemũ

²⁷ Muntondo zaasio anakĩdagu naapũna kũYelusalemũ, naenda kuAntiokia.

²⁸ Nuĩmĩka umuĩ waao ĩliina liakue Agabo, nulagĩĩla kuusũũmi wa kĩMuau kĩna nzala nkulu ikiiiza muna unkũmbigyulu wensi; nigyelela pantondo za kĩKilaudio.

²⁹ ĩAmanigua naakamantana, wensi kwilika lya usũũmi waakue; wapũnie nsao, kukuatualĩla ĩanũna naikikyala kuUyahũdi.

³⁰ Naatenda iio, naaatualĩla ĩanampala kumĩkono ya kĩBalinaba nuSauli.