Utendi 10 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Petelo nuKolinelio

¹ Alukoolĩ muntu wa kuKaisalia, ĩliina liakue Kolinelio, mukulu wiyũmbĩ lya ĩlaasi nalyukuĩtaguaa kiItalia;

² muntu namusuĩĩli, mukulia-Nzua umuene nĩnumba yaakue yensi; ninduyo alukuapeela ĩantu sadaka ningĩ nukukumulompa uNzua intondo tũlũ.

³ Nuona mumaono tengetenge zĩ nsaa ikyenda ya munsĩ, malaĩka wa kĩNzua numuagaana numuĩĩla, “Kolinelio.”

⁴ Numutuupĩĩla dũũ, noopooka pũũ; nuũga, “Yaani Shekulu.” Numuĩĩla, “uUlompi waako nishadaka zaako zapikile kukiania, zaalĩĩ kijukĩlo ntongela ya kĩNzua.

⁵ Tuala gua ino-iinoo antu kũYopa, umuĩte uSimoni nukuĩtaguaa Petelo.

⁶ Uzo mugenda wa muntu umuĩ ĩliina liakue Simoni muzĩpia-ndĩlĩ, ĩnumba yaakue yĩpiipĩ nĩnanza.”

⁷ Pĩna uMalaĩka naalĩ ĩkĩtambuĩla ninduyo nulega, uKolinelio nuĩĩta ĩĩtumi aakue abĩlĩ numwĩlaasi umuĩ, muntu mukulia-Nzua mwiyũmbĩ lya aasio naakumutumĩlaa intondo zensi.

⁸ Pĩna nualondoosia impola zensi, nuatuma ende kũYopa.

⁹ Lutondo lwa kabĩlĩ pĩna alĩ alonguĩle nukukumĩsũgamĩla ĩkaa, uPetelo alunankĩĩle kwityembe walompe, alĩ zĩ nsaa ya mutandatu ya munsĩ.

¹⁰ Nukolua nzala nusiia walĩe; ĩpa pĩna alĩ ijĩpĩĩlia, ĩnkolo yaakue nĩkia mukanka,

¹¹ nuona igyulu lyakũnukuka, ĩkĩseme nakĩtimigua sunga pansĩ zĩ ntiila nkulu, namambigue impembe zaakue nazinĩĩ.

¹² Munsĩ yaakue alĩ zikoolĩ nimu za makelu tũlũ naza mĩgulu ĩnĩĩ, nĩnazĩkĩkuesaa, ninoni za mukiania.

¹³ Paapo ululi nalumuagaana naluũga, “Uuka Petelo; ulaga ulĩe.”

¹⁴ Ĩpa uPetelo nuũga, “Leka yaasio Shekulu, kuitĩ nikaalĩ ndĩe kiensi nakĩdobũ kamuĩ nasika kieligue.”

¹⁵ uLuli nalumuagaana nkua ya kabĩlĩ, nalumuĩĩla, “Nayeeligue nuNzua, leka kwiĩĩta idobũ.”

¹⁶ uLukaani ulu nalũgyelela nkua zitatu, paapo ĩkĩseme nakĩshookigua kangĩ kwigyulu.

¹⁷ Pĩna uPetelo nuĩ ninkankani munkolo yaakue, ĩmaoni naazumaoonie kĩna matĩĩte ndogolelio kĩ, laaa, ĩantu naalĩ atumue nuKolinelio, pĩna naamĩkolia ĩnumba ya kĩSimoni, naĩĩmĩka pamulango,

¹⁸ naĩĩtana, naakolia kĩna uSimoni nukuĩtaguaa Petelo ukoolĩ muasione.

¹⁹ uPetelo pĩna alĩ kĩlĩ wishĩĩga impola za maoni, uMuau numuĩĩla, “Akoolĩ antu atatu akukudũũma.

²⁰ Uuka, utime wĩtiate nĩndĩo, ulekitũla ninkankani kunsooko neene nĩatumile.”

²¹ uPetelo nutima, nuaagaana ĩantu aasio, nuũga, “Ĩne neene gua namwindũũma;” mũjile kunsooko kĩ?

²² Naaũga, “uKolinelio, mukulu wa ulugu, munakulukuuluu, mukulia-Nzua, nutĩĩte ulukũmo luuza mundugu yensi nya Uyahũdi, alĩ mulagĩligue numalaĩka namuelu waatume antu kumuako, ue wende kumuakue, waziigie inkaani kwipũna kumuako.”

²³ Paapo nuasũgamĩĩlia ĩĩ agenda aakue. Lutondo lwa kabĩlĩ, uPetelo nulongola palumuĩ nĩndĩo nĩanũna naĩngĩ a kũYopa naamutiata.

²⁴ Mudaau nzĩa naapika kuKaisalia, nuKolinelio alĩ waatũngĩĩle nuailingĩlĩĩle ĩantu nĩasuaĩĩa.

²⁵ uPetelo pĩna alũpikĩĩlaa, uKoloneli numusĩngĩĩlia numutũngamĩĩla pamĩgulu yaakue numukulia.

²⁶ Ĩpa uPetelo numuuukia nuũga, “Ĩĩmĩka, ĩne nuneene numuntu udũũ.”

²⁷ Pĩna alĩ ĩkĩtambuĩla nunduyo, nũingĩla munumba nuona antu iingĩ ĩlundĩlĩĩle.

²⁸ Nuaĩĩla, “Inie mumanile kĩna mũiko umuntu naMuyahũdi wakamantane nukukumuagaana umuntu nwa ndugu yĩngĩ, ĩpa uNzua wansugula ndeke kumwĩta umuntu wensi mudobũ katia sika mueligue.

²⁹ Kunsooko ĩĩ ĩne napika kwanu, pĩna aza numuĩtue, sika nasiita; luulo gua, namukolia lukaani kĩ naaza munzĩtĩĩle.”

³⁰ uKolinelio nuũga, “Nantende lutondo lwa kanĩĩ, nsaa yoĩ-yooĩĩ, nsaa ikyenda, alĩ nilompa munumba yaane; laaa, muntu nuĩmĩka ntongela yaane nujialile ntiila mpĩmpĩmũ,

³¹ nuũga, ‘Kolinelio, uulompi waako wiigagiguaa, nishadaka zaako zijukaguaa ntongela ya kĩNzua.

³² Luulo gua, tuma antu ende kũYopa, umuĩte uSimoni nukuĩtaguaa Petelo, wĩĩlĩ munumba ya kĩSimoni, muzĩpia ndĩlĩ, piipĩ nĩnanza; nduzo pĩna ukiiza mukakĩtambuĩla.’

³³ Ĩkamuĩ naatuma ĩantu kumuako, nunduue watenda iiza kwiiza. Luulo gua, ishie kukoolĩ papa ensi ntongela ya kĩNzua kuziigie inkaani zensi naazumulagĩĩligue nuNzua.”

Utanantia wa kĩPetelo

³⁴ uPetelo numũmuula umulomo waakue, nuũga, “Tai nalĩnga kĩna uNzua mugila kauloeelia,

³⁵ ĩpa wensi nwa ndugu yensi nukumoopookaa nukwitenda ĩkulukuuluu ukumugombagia.

³⁶ Mulumanile ulukaani naalĩ waatualĩĩle ĩaana a Ĩsilaeli, nwitanantia impola nanziiza za matiliga kwa kĩYesu Kilisito, muene Shekulu wa antu ensi;

³⁷ ulukaani nalwasapatĩĩle muUyahũdi wensi, naalĩ luandĩlĩĩlie kũGalilaya, pĩna naukĩla ubadĩĩzo naalutanantilie uYohana,

³⁸ impola za kĩYesu wa kuNazaleti, kĩna uNzua alumupakile ĩmakũta kuMuau Muelu ningũlũ; nduyo nupilima uko ninduuko nukwitenda naiiza nukukuakamia tũlũ naalemeeligue nũShetani, kunsooko uNzua alĩ ĩpalamuĩ ninduyo.

³⁹ Nindiishie kuakuĩli a mpola zensi naaluzitendile munsĩĩ ya Uyahũdi nukũYelusalemũ. Naamuulaga naamusũntia mwikyota.

⁴⁰ uNuasio uNzua numũiukia palutondo lwa katatu, numũgyelelia,

⁴¹ sika kuantu tũlũ, ĩpa undiishie naalĩ kuasaagulue nuNzua kuĩ akuĩli, nindiishie naalĩ kulĩĩle nukwikopa ensi ninduyo pĩina alĩ wiiukile kwipũna muakiu.

⁴² Nukulagĩĩlia kuatanantĩlie ĩantu nukukuakuĩla kĩna uyu wayu naalĩ muĩĩkue nuNzua wĩĩ Mulamuli wa apanga nĩnaakiu.

⁴³ uUyo ĩanakĩdagu tũlũ ensi akumukuĩlaa kĩna kuliina liakue wensi nusuĩlĩĩle mumuakue wiligia uleegeligia wa mĩlandu.”

A ndugu nazĩngĩ iaanũnkula uMuau Muelu nukwibadĩĩzigua

⁴⁴ uPetelo pĩna alĩ kĩlĩ witambula inkaani izi, uMuau Muelu nuatimĩĩla ensi aasio naalĩ akulutegeela ulukaani luasio.

⁴⁵ Nĩasuĩĩli kwipũna kuaasio.

⁴⁶ Kuitĩ naigyũlia aitambula kutambo sia-sia nukukumukũmazukia uNzua. Paapo uPetelo nushookeelia nuũga,

⁴⁷ “Waani nusũũmile kwigilia ĩmaazĩ, ĩa alekibadĩĩigua naaza aanũnkulaa uMuau Muelu zĩ undiishie.”

⁴⁸ Nulagĩĩlia abadĩĩzigue muliina lya kĩYesu Kilisito. Paapo naamulompa wadĩĩle ntondo nkeei.