Tito 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Lugendo lwa kĩKilisito numukũlĩla waakue

¹ Uijukĩlie kukĩniinupia ntongela ya akola usũũmi ningũlũ, aagombie, nukukĩzĩpĩĩlia kuutendi wensi nauuza;

² aleke kumutukĩla kamuntu, alekitũla aleei, atũle aaza, ĩilagĩĩla uupolo tũlũ kuantu ensi.

³ Kuitĩ ĩpo pakalĩ, ishie nĩndiishie alĩ kuagila kamasala, aleki, nakukupuutagiguaa, asese a nsula nuwĩloeelia wa mpiani ningĩ, nakugendela muubĩĩ nuwĩĩlũ, nuusuukĩlua sunga kukĩsuukĩlua ndiishie kundiishie

⁴ Ĩpa itĩ uuza wa Mugũni wĩĩtu uNzua nuuloogua waakue kuantu pĩna alĩ wigyelĩĩle, nukugũna;

⁵ sika kunsooko ya utendi wa kulukuuluu naalĩ kuutendile ishie, ĩpa kwilika lya kĩnishungu kiakue, kunzĩla ya oogi wa ulelua wa kabĩlĩ nukwitendua upia mwa kĩMuau Muelu,

⁶ naalukũitĩĩle ishie kuwingĩ kunzĩla ya kĩYesu Kilisito, Mugũni wĩĩtu,

⁷ koona kualĩĩligue ĩkulukuuluu kuukende waakue, kutũle asaali a upanga wa kalĩ nakalĩ, kĩna wĩĩlĩ ulaaĩĩli wĩĩtu.

⁸ uLukaani ulu lwalu lwa tai. Nimpola zaasio nsiiile uzitambule kungũlũ, koona ĩaasio naamusuĩlĩĩle uNzua ijuke uwĩtumi muutendi nauuza. Izi ingĩ nziiza, kangĩ zitĩĩte nsaĩlo kuantu.

⁹ Ĩpa ĩmakolio ma ulu, nimpola za wĩleli wa kalĩ, ninkungumi nuwĩleei mumpola za miiko ĩsuga-nsuge ndizo; kuitĩ magila kansaĩlo, ingĩ nakanda udũũ.

¹⁰ uMuntu nukuleetaa uukamatuki, pĩna mwakondia kukumusugula nkua ya muandio sunga nkua ya kabĩlĩ, umusiite;

¹¹ umane umuuntu kĩna uyu wakoondaa kukĩkamatula nukwitimula, kangĩ wĩleetela ukaasigua umuene.

Nkaani za kĩlaga

¹² Pĩna nĩkakumutuma u Alitema katia uTikiko kumuako wĩkamatikie kwinjagana kuNikapoli, kuitĩ kuuko nsĩĩgile kukikyala pamatũngo ma mpepo.

¹³ uZeena, munakialo, nuApolo uazĩpĩlĩlie umusĩnzo aaze kuukaaũ; alekikeepeelua kakĩntu.

¹⁴ ĩAntu ĩĩtu ndĩo ĩmanie kukĩkamatĩkia muutendi nauuza kumĩtumĩlo namasiiwe, alekitũla zĩ makota namagila kankali.

¹⁵ ĩAasio nakwĩpalumuĩ nineene akukulamukia ue. Kulamukĩlie ĩaasio naakuloilue muusuĩĩli. uUkende wĩĩ niniinie tũlũ.