Tito 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Lugendo lwa KĩKilisito numukũlĩla waakue

¹ Ue gua, tambula nazijĩpĩĩle uumanigua wa kapanga.

² ĩAnampala ĩĩ akola kĩgilia, akola kyulio, akola masala akapanga muusuĩĩli numuuloogua numuukamatĩkũ.

³ Nĩakombi iio-iioo ĩĩ nulugendo nalũjĩpĩĩle ĩeelu, alekitũla asingĩĩlania, kangĩ alekitũla asese a lugaalo, ĩpa naakumanagiaa nanziiza;

⁴ koona aalange ĩasungu naa kĩnanso aaloogue ĩagoosia aao nukukualoogua ĩaana aao,

⁵ nukwitũla akola masala, atũle eelu, nukukuzikendegeela inumba zao, atũle aaza nukukĩniinupia paagoosia aao ĩeene, koona uLukaani lwa kĩNzua lulekitukĩlua.

⁶ ĩAgoosia naa kĩsumbatĩ uasugule ĩĩ akola kĩgilia,

⁷ ĩukĩlagĩĩla uuue muene mumpola tũlũ zĩ mpiani ya utendi nauuza, sunga muumanigua waako wĩlagĩĩle uukamĩnkĩĩlũ nuwijĩpĩli,

⁸ nuutambuli wa kapanga nasika wishũũmĩka kwishokigua, koona umukola kukungumia wakolue inshoni, waulie kalukani nalubĩĩ lwa kutambula mumpola tũlũ.

⁹ ĩAsese aagombie ishekulu aao, aaloeelie mumpola tũlũ; aleke inkungumi,

¹⁰ alekiiia, ĩpa alagĩĩle uusuĩĩli nauza tũlũ, awoogelie uumanigua wa kiNzua mugũni wĩĩtu mumpola tũlũ.

Masiio ma KĩKilisito

¹¹ Kuitĩ ukende wa kĩNzua kuugũnua wa antu tũlũ wigyelelaa;

¹² wakumania kwishiita uwĩĩtekeli nasika wa tai ninshula za unkũmbigyulu, nukukikyala muuumĩ wa masala nĩkulukuuluu nukukumukulia uNzua muna unkũmbigyulu wa paino,

¹³ ĩkuutũngĩĩle ulaaĩĩlĩ naukola uliukũ, nuukũnũkulua wa ukulu wa kĩKilisito Yesu, Nzua namukulu, kangĩ Mugũni wĩĩtu.

¹⁴ Uyu wayu nwĩpũnilie umuene kunsooko yĩĩtu, koona wakukomole kwipũna muuleki tũlũ, nukukĩeelelia umuene ĩantu atũle aakue, naatite wikamatĩkia kuutendi na uza.

¹⁵ Tambula inkaani izi, usugulĩkie nukwitakĩla kuusũũmi tũlũ. Nunumuĩ waleke kukumela ue.