Matayo 9 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

kwikamigua umukiigyandi

¹ Nunankĩla mwipyango, nupũũta, nupika kukaa yaakue.

² Paapo naamuleetela muluĩle wigyandi, ugonile muulĩlĩ. ũYesu pĩna nuona uusuĩĩli waao, numuĩĩla umukiigyandi, Kamia nkolo muanuane; “ĩmĩlandu yaako yalegagiguaa.”

³ Paapo tyũmpĩ Iya alangi naĩĩ kĩtambuĩla eene kuene, “Uyu witukĩla uNzua!”

⁴ Yesu pĩna numana ĩmasĩĩgo maao, nuũga, “Nĩkĩ mwishĩĩga namabĩĩ munkolo zaani.?

⁵ Yaani naipeelũ, kwiũga, ‘ĩMĩlandu yaako yaleegagiguaa,’ katia kwiũga, ‘Uuka, longola.’

⁶ Ĩpa mumane gua, kĩna uMuana muntu utĩĩte usũũmi muna nsĩĩ kwileegelania ĩmĩlandu.” Paapo numuĩĩla umukiigyandi, “Uuka, ĩtuĩke ulĩlĩ waako, wende kumuako.”

⁷ Nuuuka, nulongola kunumba yaakue.

⁸ ĩMaũmbĩ pĩna namaona naoopoka, naamukulia uNzua naalĩ waapĩĩle ĩantu usũũmi kĩna uu.

Wĩĩtua wa kĩMatayo

⁹ ũYesu pĩna nulega kuasio, numuona muntu wikyalansile panumba ya usangulĩlio wa koodi, nukuĩtaguaa Matayo; numuĩĩla, “Ntiata.” Nuuuka, numutiata.

¹⁰ Pĩna nwikyalansa pandia munumba, naaaza asangulia-koodi nĩanamĩlandu iingĩ, naikyalansa ensi nũYesu nĩamanigua aakue.

¹¹ ĩApalisayo pĩna naona, naaaĩĩla ĩamanigua aakue. Nĩkĩ umumania wani wilĩa palumuĩ nĩasangulia-koodi nĩanamĩlandu.

¹² ũYesu pĩna nũigia, nuũga, “Naapanga sika akusiiaa kamukilĩki, ĩpa naaluĩle.

¹³ Longolĩ mwĩmanie ĩndogolelio ya nkaani izi, ‘Nsiilie kĩnishungu, sika mapolia.’ Kuitĩ sika nijile kukuĩĩta ĩakola kulukuuluu, ĩpa ĩanamĩlandu.”

Ulaalĩli

¹⁴ Paapo naaza ĩamanigua a kĩYohana, naaũga. Nĩkĩ ishie nĩApalisayo kukulaalĩlaa, ĩpa ĩamanigua aako sika akulaalĩlaa?

¹⁵ ũYesu nuaĩĩla, “Naaanue kuwĩnga ishũũma mbii kwishuukua pĩna umutooli yĩensi ndĩo. Ĩpa intondo zijiliiiza pĩna ijilileegeligua umutooli; paapo ijililaalĩla.

¹⁶ Kutilĩ nunumuĩ nukutũmĩĩlaa ĩkĩtaaso nakĩpia muntiila nankulukulu, kuitĩ kiaso kĩkimomoola ĩntiila nankulukulu, nuluandala lutũla lugalĩ.

¹⁷ Kutilĩ nunumuĩ nukutaagĩla umubinio namupia mũyĩndĩ ya ndĩlĩ naikulukulu. Kanga uĩĩkĩlue, iyĩndĩ ya ndĩlĩ ikitanduka numubinio wiitĩka, niyĩndĩ ya ndĩlĩ ioononeka. Ĩpa umubinio namupia utaagĩlue mũyĩndĩ naipia, tũlũ naibĩlĩ ikendegeelue.”

NiYailo, numusungu naalukupũnagiaa ĩmĩgali

¹⁸ Pĩna alĩ witambula izi, nuuza jũmbe, nutũngama pamuakue, nuũga, “uMunanso waane wakia ino. Ĩpa nzuu uĩĩke umukono waako mumuakue, ukipangata.”

¹⁹ ũYesu nuuuka, numutiata palumuĩ nĩamanigua aakue.

²⁰ Laaa, ityungo liilo musungu naalutĩĩte uluĩle wa kupũnia ĩmĩgali kumiaka kyumi nĩbĩlĩ, nupũna kunũma, nuuza nulĩamba ishogolo lya ntiila yakue.

²¹ Kuitĩ alusĩĩgile munkolo yaakue; “Kanga mambe udũũ ĩntiila yaakue nikikamia.”

²² ũYesu nupĩluka, numuona, numuĩĩla, “Kamia nkolo muanuane, uusuĩĩli waako wakukamagiaa.” Numusungu nukamia lĩĩlo tyũngo.

²³ ũYesu nupika kunumba ya kĩjũmbe, nuona akuambuutu niyũmbĩ naalĩ ilĩla ĩsuuka.

²⁴ Nuaĩĩla, “Legĩ, kunsooko umunanso sikukiile, ĩpa ugonile ndoolo udũũ.” Naamusekekia.

²⁵ Pĩna iyũmbĩ nalĩpũnigua, nũingĩla, numũtyapa umukono; umunanso nuuuka.

²⁶ iMpola izi nazishapatĩla munsĩĩ niasio yensi.

Apokũ abĩlĩ

²⁷ ũYesu pĩna nulega kuasio, apokũ abĩlĩ naamutiata, naĩtunta, naaũga, “Kukolelue kĩnishungu, Muana wa kĩDaudi!”

²⁸ Pĩna nũingĩla munumba, ĩapokũ naamuagaana; ũYesu nuaĩĩla, “Musuĩlĩĩlene kĩna nsũũmile kwitende itĩ? Naamuĩĩla, ‘Eeze, Shekulu.’”

²⁹ Paapo nuaapaatia ĩmiiso maao, nuũga, “Kũlika Iya usuĩĩli waani mutendelue.”

³⁰ Ĩmiiso maao namalaĩlia; nũYesu nuakononteelia nuũga, “Keendegeelĩ, kaumuĩ walekimana.”

³¹ Paapo naapũna, naasapatĩlia ulukũmo luakue munsĩĩ niasio yensi.

Munalĩsĩĩmuĩ namunakĩmũũmĩ

³² Pĩna alĩ ilega, paapo naamuleetela munakĩmũũmĩ kangĩ munalĩsĩĩmuĩ.

³³ Nĩlĩsĩĩmuĩ pĩna nalĩĩngua, umunakĩmũũmĩ nutambula. ĩMaũmbĩ namakulĩlua, namaũga; “Sika yalakigyelela itĩ kainiino muna ĩSilaeli.”

³⁴ Paapo ĩApalisayo naaũga, “Kungũlũ za mukulu wa masĩĩmuĩ ukumaĩnga ĩmasĩĩimuĩ.”

³⁵ NũYesu alĩ wipilima mukaa zensi numũishaalĩ, nwimania mumasũnagogi maao, nukwitanantia iMpola na Nziiza za utemi, nukwikamia uuluĩle wensi nuuneketũ wensi.

Kĩsuusu kya kĩYesu kuantu

³⁶ Pĩna numaona ĩmaũmbĩ, nuaonela kĩsuusu, kunsooko alĩ akukoekagiaa nukwipalansana zĩ nkolo nangila kamudĩĩmi.

³⁷ Paapo nuaĩĩla ĩamanigua aakue ĩMaogola mingĩ, ĩpa ĩanamulĩmo akeei;

³⁸ Luulo gua, mumulompe ũShekulu wa maogola waatume ĩanamulĩmo muuogoli waakue.