Matayo 7 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mpola za kualamula naĩngĩ

¹ “Lekilamulĩ koona mulekilamulua.

² Kuitĩ uulamuli uo namukulamulaa, uuo mũjililamulĩlua; nĩngele ĩo namukugelelelaa, ĩĩo-ĩĩoo mukigelelelua niniinie.

³ Nikĩ ukukalaaa ĩkapalala muliiso Iya munũna waako, numugamba naukoolĩ muliiso liako sikukuukeesagiaa?

⁴ Katia wishũũma mbii kukumuĩĩla umunũna waako, ‘Ndeka nĩkaleegie ĩkapalala muliiso liako;’ kusĩnaga ukoolĩ umugamba muliiso liako?

⁵ Ue munamampĩlu, leegia tangua umugamba muliiso liako; paapo ukiona iiza kukukaleegia ĩkapalala muliiso Iya munũna waako.

⁶ “Muleke kuzipeela imbua nakielu, sunga muleke kuzigumĩla ingũlũĩ inshanga zaani za lũũlũ koona zileke kuzitilangĩla kumĩgulu yaao, nukukumugomokeela zumulume.”

Kwikamia nkolo muulompi

⁷ “Lompĩ gua, mukipeegua; dũũmĩ gua, mukiona, ũgiĩ gua, mukakigyuĩlua.

⁸ Kuitĩ wensi nukulompaa ukuanũnkulaa; nduyo nukudũũmaa ukuonaa; nduyo nukuũgagiaa ukigyuĩlaguaa.

⁹ Muntu kĩ kumiani, kanga muana waakue wamulompe ugalĩ ukakumupeelane igyũe?

¹⁰ Katia walompe nsiĩ, ukakumupeelane ĩnzoka?

¹¹ Malĩ uniinie gua, namuabĩĩ, mumanile kukuapeela ĩaana aani ipeegua naiiza, sika nangũlũne uTata waani nukoolĩ kwigyulu ukakuapeelaa naiiza naakumulompaa!”

Lyagĩĩlio nikyulu

¹² “Iio gua, tũlũ mensi namumasiiile mutendelue nĩantu niniinie muatendele iio-iioo; kuitĩ uu wau Ulagĩĩlio nĩAnakĩdagu.”

Nzĩla zibĩlĩ

¹³ “Ingĩlĩlĩ kumulango namupinĩ; kuitĩ umulango ingĩ mugalĩ nĩnzĩla ngalĩ nĩlunziĩ kuulimĩĩli, nĩaasio naakuingĩlĩlaa muasio akoolĩ iingĩ.

¹⁴ Kuitĩ umulango ingĩ mupinĩ nĩnzĩla ĩtunĩnkĩĩle nĩlunziĩ kuupanga, nĩaasio naakumĩonaa akoolĩ akeei.”

Tai nuulongo

¹⁵ “Ĩkendegeelĩ kuanakĩdagu a ulongo, naakumuagaanaa ĩkũmbile mĩkunza ya nkolo, ĩpa munkolo zaao iyĩngi naataki.

¹⁶ Mukakualĩngĩla kunkali zaao. ĩAntu akukalaane izabiibu mwikyota Iya miigia, katia inkuu mumĩtula?

¹⁷ “Itĩ yoi ikyota liensi naliiza lyukupĩaa inkali nanziiza, nikyota nibyĩĩ lyukupĩaa inkali nambĩĩ.

¹⁸ iKyota naliiza sika lĩsũũmile kwipĩa inkali nambĩĩ, sunga ikyota nibyĩĩ kwipĩa inkali nanziiza.

¹⁹ iKyota liensi nasika lyukupĩaa ĩnkali nanziiza lyukudumulaguaa nukwitaagua mumooto.

²⁰ Kuluulo gua, kunkali zaao mukakualĩnga.”

Nkaani nuutendi

²¹ “Sika wensi nukumbuĩla, ‘Shekulu, Shekulu,’ nũjiliingĩla muutemi wa kwigyulu; ĩpa wayu dũũ nukuutendaa uulooa wa kĩTata waane nwa kwigyulu.

²² Iingĩ ijilimbuĩla palutondo luasio, ‘Shekulu, Shekulu sika alĩ kukupũnagiaane uunakĩdagu kuliina liako, nukuliina liako kwiĩnga ĩmasĩĩmuĩ, nukuliina liako kwitenda ĩmakula mingĩ!’

²³ Paapo nijile kuaĩĩla kualiĩ, ‘Sika alĩ numuĩzĩ inie kainiino; legĩ kumuane, namukutendaa namabĩĩ.’”

Mĩkũlĩla ĩbĩlĩ

²⁴ “Luulo gua, tũlũ wensi nukũigagiaa inkaani izi ĩzaane nukukuzitenda, ukakĩpiana numuntu nwa masala naaluzengile ĩnumba yaakue mwipyampa.

²⁵ ĩMbũla nĩkua, ĩmaazĩ namĩlunda, ĩnzega nĩkũnka, nyĩmĩkua ĩnumba niasio; sika nĩgua, kunsooko ĩmĩkũlĩla yaakue alĩ yĩĩlĩ mukiania ipyampa.

²⁶ Wensi nukũigagiaa inkaani izi ĩzaane, wasiite kuzitenda, ukakĩpiana numuntu nwĩulu, naaluzengile ĩnumba yaakue mumunsanga.

²⁷ Mbũla nĩkua, maazĩ namĩlunda, nzega nĩkũnka, nyĩmĩkua ĩnumba niasio; nĩgua, nuugui waakue alĩ ukulu.”

²⁸ ũYesu pĩna nukondia kwitambula inkaani izi ĩanamulundo naakũmĩkia kuumania waakue.

²⁹ Kuitĩ alukuamania zĩ mukola usũũmi, sika kĩna ĩalangi aao.