Matayo 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwigemua kwa kĩ Yesu mumbuga

¹ Paapo ũYesu nutualua nuMuau kumbuga, wagemue nũShetani.

² Nulaalĩla intondo makumi manĩĩ, munsĩ nuutiku, pembele nukolua ĩnzala.

³ uMugemani numuagaana numuĩla, “Kanga ue ĩwĩMuana wa kĩNzua, umaĩĩle ĩmagũe aya matũle mapũli ma ugalĩ.”

⁴ Nushookeelia, nuũga; “Yandĩkue, uMuntu sika witũla muumĩ kuugalĩ udũũ, ĩpa kulukaani luensi nalukupũnaa mumulomo wa kĩNzua.”

⁵ Paapo ũShetani numutuala kukaa nanzelu, numuĩmĩkia kunsonge ya numba ya kĩNzua,

⁶ Numuĩĩla; “Kanga ue ĩwĩMuana wa kĩNzua, ĩgume pansĩ; kuitĩ yandĩkue; ‘Ukakukulagĩlĩlia ĩamalaĩka aakue,’ kangĩ, Ĩkakukukenka mumĩkono yaao, uleke kĩkũmpia umugulu waako mwigyũe.”

⁷ ũYesu numuĩĩla; “Yandĩkue kangĩ uleke kumugema ũShekulu Nzua waako.”

⁸ ũShetani numutuala kangĩ kunkonko nandĩĩpũ zigizigi, numulagĩĩla uutemi tũlũ wensi wa unkũmbigyulu nuukulu waakue,

⁹ numuĩĩla; “Aya tũlũ mensi nĩkakukupeela, kanga utũngame untekele.”

¹⁰ Paapo ũYesu numuĩĩla; “Lenda uko Shetani! Kuitĩ yandĩkue; Umutekele ũShekulu Nzua waako, ninduyo wing'ene dũũ umutumĩle.”

¹¹ Paapo ũShetani numuleka; ityungo liilo ĩamalaĩka naaaza naakumutumĩla.

ũYesu ukikyala muKapelinaũmũ nya kũGalilaya

¹² ũYesu pĩna nũigia kĩna uYohana watũngaguaa, nuenda kũGalilaya.

¹³ Nulega kuNazaleti nuenda nwikyala muKapelinaũmũ pananza, munsĩĩ ya Zabũloni nuNaptali,

¹⁴ itĩ lutimĩĩligue naalĩ lutambulue numunakĩdagu Yesaya, nuũga,

¹⁵ “Nsĩĩ ya Zabũloni nĩnsĩĩ ya Naptali, Nzĩla ya nanza, tyunbĩ liYolidani, Galĩlaya ya ndugu nazĩngĩ.

¹⁶ ĩAntu naalĩ ikyalile mukiti. Aonaa weelu ukulu, Ndĩo naalĩ ikyalile munsĩĩ numumulũle wa ukiu Weelu waamĩlĩkĩlaa.”

¹⁷ Kwipũna paapo ũYesu nuandia kwitanantia nukwiũga; “Pelĩ, kuitĩ uutemi wa kwigyulu wasũgamĩĩlaa.”

ũYesu ukuĩĩta ĩamanigua a muandio

¹⁸ Pĩna nũiumbaumba pananza ya Galĩlaya, nuaona antu abĩlĩ ĩkĩnũna, Simoni nukuĩtaguaa Petelo, nuAndelea mununũna waakue, igumĩla ijũĩlo munanza; kunsooko alĩ azũa-nsiĩ.

¹⁹ Nuaĩĩla; “Ntiatĩ, nineene nĩkakumutenda muĩ azũa-antu.”

²⁰ Ĩkamuĩ naamaleka ĩmazũĩlo maao, naamutiata.

²¹ Pĩna nulega paasio, nuaona nĩĩĩa abĩlĩ ĩkĩnuna, uYakobo ũsha Zebedayo nuYohana umunũna waakue, naalĩ ĩĩlĩ mũpyango palumuĩ nuZebedayo utata waao, naakumazĩpĩĩlia ĩmazũĩlo maao; nuĩĩta.

²² Ĩkamuĩ naamuleka ũshee nipyango naamutiata.

ũYesu ukĩtuma muGalĩlaya

²³ Nduyo alukupilimaa muGalĩlaya yensi, nwimania mumasũnagogi maao nukwitanantia iMpola naNziiza za utemi, nukwikamia uuluĩle wensi nĩmaulemua mensi muantu.

²⁴ Nulukũmo luakue nalukũmuuka mũSilia yensi, naamuleetela tũlũ naalĩ alemekigue nuuluĩle ninjago ningĩ, ĩanalĩsĩĩmuĩ, ĩaguankolo niakiigyandi, nuakamia.

²⁵ Namamutiata maũmbĩ makulu ma kũGalilaya, nĩma kuDekapoli, nĩma kũYelusalemũ nĩma kuUyahũdi, nukwityumbĩ liYolidani.