Matayo 27 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu ntongela ya kĩPilatu, mutemi wa kĩLumĩ

¹ Pĩna naweela, ĩapolia naakulu tũlũ nĩanampala a antu naamukomelia ĩkialo ũYesu, koona amuulage.

² Naamutũnga, naamutuala naamuĩĩka mumĩkono ya kĩPilato naalĩ mutemi.

Kwikia kwa kĩYuda

³ Paapo ũYuda naalumusakilie, pĩna nuona kĩna walamulaguaa, nuona usungu, nuashookelia ĩapolia naakulu nĩanampala impiia nazĩmakumi matatu.

⁴ nuũga, “Aza ntimuĩle pĩna aza nuusakilie umugali naugila kautimu.” Naaũga, “Maakĩ maasio ishie kumiĩtu? Malaae uue mukola!”

⁵ Nuzigumĩla impiia muNumba ya kĩNzua, nulega, nuenda nwĩgoga.

⁶ iApolia naakulu naazishola, naaũga, “Ingĩ mũiko kukuziĩĩkĩla muuĩkĩlo wa masongelio, kunsooko za ngele ya mugali.”

⁷ Naakomia ĩkialo, naazishola, naagula umugunda wa muumba utũle pakuaĩĩka ĩagenda.

⁸ Iio gua, umugunda waasio ukuĩtaguaa mugunda wa mugali sunga nantende.

⁹ Paapo nazitimĩĩlĩka naalĩ ntambule numunakĩdagu Yelemia nuũga, “Naazishola impiia makumi matatu, ngele yaakue naalĩ mugelelelue, naalĩ amugelĩĩle ityũmpĩ lya aana a Ĩsilaeli,

¹⁰ naazipũnia kumugunda wa muumba kĩna ũShekulu alundagĩlĩĩlie.”

ũYesu ntongela ya kĩPilato

¹¹ ũYesu nuĩmĩka ntongela ya mutemi. UMutemi numukolia, nuũga, “Ue uuene umutemi wa Ayahũdi?” ũYesu nuũga, “Uue wiũga.”

¹² Pĩna nusokigua nĩapolia naakulu nĩanampala, sika nushookeelia kalukaani.

¹³ Paapo uPilatu numuĩĩla, “Sika wiiigiane naakukukuĩla mingĩ kumuako?”

¹⁴ Sika numushookeelia kalukaani, sunga umutemi nukulĩlua zigizigi.

¹⁵ Palutondo nalukulu umutemi kuntendo yaakue ukulĩtũngulĩlagiaa iyũmbĩ mutũngua umuĩ naamusiiile.

¹⁶ Paapo alĩ atĩĩte mutũngua umuĩ nwa lukũmo lubĩĩ, nukuĩtaguaa Balaba.

¹⁷ Pĩna naĩlundĩĩla, uPilatu nuaĩĩla, “musiiile numutũngulĩlie waani, Balaba katia Yesu nukuĩtaguaa Kilisito.”

¹⁸ Kuitĩ alumanile kĩna alĩ amupũnilie kuwĩĩlũ.

¹⁹ Pĩna alĩ wikyalansile mwityengu lya ulamuli, umusungu waakue nutuma impola kumuakue, nuũga, “Ulekitũla nulukaani numuntu nuasio nwa kulukuuluu, kuitĩ aza naagĩkilie mundooti utiku uu kunsooko yaakue.”

²⁰ iApolia naakulu nĩanampala naamapeema ĩmaũmbĩ mamutee uBalaba, amuulage ũYesu.

²¹ uMutemi nuaĩĩla kangĩ, “Muĩa naabĩlĩ musiiile numutũngulĩlie waani?” Naaũga, “uBalaba.”

²² uPilatu nuaĩĩla, “Aĩpa gua, numutendele yaani ũYesu nukuĩtaguaa Kilisito?” Tũlũ ensi naaũga, “wakononteelue mumusalaba!”

²³ Nuũga, “Nĩkĩ, alutendile ubĩĩ kĩ.” Naakaka kwikuutĩĩla, naaũga, “Nwakononteelue mumusalaba!”

²⁴ uPilatu pĩna nuona kĩna nayĩĩ nakanda udũũ, ĩpa umuzũgo wikula, nusola ĩmaazĩ, nukalala ĩmĩkono yaakue ntongela iyũmbĩ, nuũga, “numugila kautimu mumugali wa muntu uyu nwa kulukuuluu. Muzilaae uniinie!”

²⁵ Antu tũlũ naashookeelia, naaũga, “umugali waakue nawĩĩ mumiĩtu numuaana ĩĩtu.”

²⁶ Paapo nuatũngulĩlia uBalaba. Pĩna numukua ũYesu namĩkoa, numupũnia wakononteelue mumusalaba.

ũYesu wikononteelua mumusalaba

²⁷ Paapo ĩĩlaasi a mutemi naamutuala ũYesu kwijumba lya kĩtemi; kaũmbĩ keensi nakamulundĩkĩĩla.

²⁸ Naamujiula intiila naamukũmba lyumunkũmbĩ kyasũkũ,

²⁹ naamĩtaa ngala ya miigia naamujiala mwityũe, naamupeela lunangi naatuũngama pamuakue, naaa kumupopota, naũga, “Weela, mutemi wa Ayahũdi!”

³⁰ Naamutiĩla ĩmatĩ, naalusola ulunangi naamukuanga mwityũe.

³¹ Pĩna naakonda kukumupopota, naamujiula ĩlyumunkũmbĩ, naamujiala intiila zaakue, naamulongolia kukumukononteela mumusalaba.

³² Pĩna alĩ ipũna naataagana numuntu wa kuKilene, ĩliina liakue Simoni; naamukankanĩka wamukenkelie umusalaba.

³³ Naapika pana yukuĩtaguaa Goligota (ĩndogolelio yaakue, panungulu ityũe).

³⁴ Naamupeela mubinio namusaalĩnkanigue nĩntundu. Pĩna nulũla, sika nulooa kwikopa.

³⁵ Pĩna naamukononteela mumusalaba naoomolana intiila zaakue, naazikuĩla nsimbi (koona lutimĩĩligue ulukaani naalĩ lutambulue numunakĩdagu. Naoomolana intiila zaane pakatĩ yaao, nĩlyumunkũmbĩ liane naalĩkuĩla nsimbi).

³⁶ Naikyalansa, naamulindĩĩla paasio.

³⁷ Naaĩĩka shokio pityũe liakue naalĩ liandĩkue, “UYU INGĨ YESU, MUTEMI WA AYAHŨDI.”

³⁸ Paapo ĩaleegelania naabĩlĩ naakoononteelua ensi ninduyo, umuua pamukono waakue wa kĩgoosia, umuua pamukono waakue wa kĩkĩĩma.

³⁹ Ndĩo naalĩ ikĩla paasio naamutuka, naiangaazia ĩmatũe maao,

⁴⁰ Naaũga, “Ue nukumĩtaula ĩNumba ya kĩNzua nukukumĩzenga kangĩ kuntondo zitatu, ĩgũne uue! Malĩĩ ĩwĩMuana wa kĩNzua, tima mumusalaba.”

⁴¹ Iio nĩapolia naakulu naamupopota palumuĩ nĩalangi nĩanampala, naaũga,

⁴² “Alukuagũnaa naĩngĩ; uyo sika wishũũma kukĩgũna. Uyo ingĩ mutemi wa Ĩsilaeli; nwatime ĩpaino mumusalaba, nindiishie kukakumusuĩĩla.

⁴³ Umusanilie uNzua nwamugũne ĩpaino kanga ĩumuloilue, kunsooko alukuũgaa. Ĩne nĩMuana wa kĩNzua.”

⁴⁴ Iio nĩaleegalania naalĩ akononteelue ensi ninduyo naamutukĩla iio-iioo.

Kwikia kwa kĩYesu

⁴⁵ Kwipũna ĩnsaa ya mutandatu nayĩĩ kiiti munsĩĩ yensi sunga ĩnsaa ikyenda.

⁴⁶ Nayĩĩ zĩ ĩnsaa ikyenda, ũYesu mwĩtunta kululi lukulu nuũga, “Eli, Eli, lama sabakitani?” Ĩndogoilelio yaakue, “Nzua waane, Nzua waane nĩkĩ wandekaa?”

⁴⁷ Naĩngĩ kumiao naalĩ ĩĩmĩkile paasio, pĩna naiigia naaũga, “Uyu ukumuĩta uElia.”

⁴⁸ Ĩkamuĩ umuĩ numanka, nusola ĩsipongo numijulia umubinio namukalĩ numĩtungĩla mulunangi, numukopia.

⁴⁹ Naĩngĩ naaũga, “Lekĩ, kulaae malĩĩ uElia ĩukiiza kukumugũna.”

⁵⁰ Paapo ũYesu mwĩtunta kangĩ kululi lukulu, nutiĩka ĩnkolo.

⁵¹ Paapo gua, ipyupa lya Numba ya kĩNzua nalĩtanduka pakatĩ kwipũna kukiania sunga pansĩ. ĩNsĩĩ nĩsũngũsĩka ĩmapampa namatanduka;

⁵² iibĩĩla naikũnukuka, niiuka miĩlĩ mingĩ ya antu naeelu naalĩ agonile;

⁵³ naapũna mũibĩĩla yaao pĩna wiiuki waakue naukĩla, naingĩla mukaa nanzelu, naaigyeleela iingĩ.

⁵⁴ Paapo umukulu wa ulugu palumuĩ nindĩo naalĩ amulindĩlĩĩle ũYesu, pĩna naauona umumanga nimpola naalĩ zigyelĩĩle naoopoka pũũ, naaũga, “Tai-taaii, uyu alĩ Muana wa kĩNzua.”

⁵⁵ Alĩ akoolĩ nĩasungu iingĩ paasio, naalĩ ilaaĩla kulĩ aao naalĩ amutiatile ũYesu kwipũma kũGalilaya nukukumutumĩla.

⁵⁶ Mumiao alĩ akoolĩ Malia nwa kuMagidala, nuMalia unina wa kĩYakobo nuYosepu, nunina wa aana a kĩZebedayo.

ũYesu wiĩĩkua mukĩbĩĩla

⁵⁷ Pĩna niĩ mpĩndĩ nuuza muntu mugolĩ wa kuAlimatea, ĩliina liakue Yosepũ, ninduyo umuene alĩ mumanigua wa kĩYesu.

⁵⁸ Numuagaana uPilatu, numulompa umuĩlĩ wa kĩYesu. Paapo uPilatu nulagĩĩlia wapeegue.

⁵⁹ uYosepu nuusola umuĩlĩ, nuutũnga muntiila nanzelu nankakũ,

⁶⁰ nuuĩĩka mukĩbĩĩla kiakue nakĩpia naalukĩsĩmbile mwipyampa, nupingilitia igyũe kyulu pamulango wa kĩbĩĩla, nulongola.

⁶¹ Alĩ akoolĩ paapo uMalia nwa kuMagidala, nuMalia muua, naikyalansile naatungĩnkĩĩne nĩkĩbĩĩla.

⁶² Mudaau, alĩ lutondo nalutiatile uwĩzĩpĩĩlia, ĩapolia naakulu nĩApalisayo naĩlundĩĩla pakĩPilatu,

⁶³ naaũga, “Shekulu, kwijukaa kĩna unuasio umupembeelia aluũgile pĩna alĩ kĩlĩ muumĩ.” Pĩna zakĩla ntondo zitatu nikiiiuka.

⁶⁴ Luulo gua, lagĩĩlia ĩkĩbĩĩla kĩlindĩĩlue sunga kulutondo lwa katatu, alekiiza ĩamanigua aakue kukumũia nukukuaĩĩla ĩantu, “Wiiukaa kwipũna muakiu; nuupembeelia wa mpelo ukitũla ubĩĩ nangũlũ kwikĩla wa muandio.”

⁶⁵ uPilatu nuaĩĩla, “Mutĩĩte ĩĩlaasi alindĩĩli; lendĩ mukĩlindĩĩle kĩĩsa kĩna musũũmile.”

⁶⁶ Naalongola, naakĩlindĩĩla ĩkĩbĩĩla kĩĩsa, naalĩĩĩkĩla igyũe muhuli, palumuĩ nĩĩlaasi aasio naalindĩĩli.