Matayo 25 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mpiani ya ananso kyumi

¹ “Kangĩ uutemi wa kwigyulu wĩpianile nĩananso kyumi nalĩ asolile intala zaao, naalongola kukumusĩngĩĩlia umutooli.

² Ataano aao alĩ anaulu, nĩnaataano alĩ anamasala.

³ ĩAasio naalĩ ĩulu naasola intala zaao, sika naasola kamakũta;

⁴ ĩpa naanamasala naasola ĩmakũta munsupa palumuĩ nintala zaao.

⁵ Pĩna umutooli nutinia, naiitindĩla naagona indoolo.

⁶ Muutiku wa katĩ, lyanga nalĩkula, ‘Ntuuyo umutooli wapika! Pũnĩ mumusĩngĩĩlie!’

⁷ Paapo naauuka ĩananso aasio tũlũ, naazĩpĩĩlia intala zaao.

⁸ iAnaulu naaaĩĩla ĩanamasala, ‘Kupunguĩlĩ ĩmakũta makeei, kunsooko intala zĩĩtu zidiba.’

⁹ iAnamasala naaashookeelia, naaũga, ‘Sika makuendile muumo ishie nuniinie; taazu gua, longolĩ kuagulia, mwĩgulĩlie.’

¹⁰ Pĩna naalongola kwigula, nuuza umutooli, ndĩo naalĩ ĩzĩpĩlĩĩlie naingĩla palumuĩ nduyo muwĩnga; uluĩgĩ nalũgyalĩlua.

¹¹ Pembele naaaza ĩananso naĩngĩ, naaũga, ‘Shekulu, Shekulu, kũgyuĩle!’

¹² Ĩpa nuashookeelia, nuũga, ‘Tai namuĩĩla, sika numuĩzĩ inie.’

¹³ Luulo gua, kengealĩ, kunsooko sika mumanile ulutondo sunga ityũngo.”

Mpiani ya talanta

¹⁴ “Kuitĩ ikitũla zĩ mpiani ya muntu naalutũngile umusĩnzo, nuĩĩta ĩĩtumi aakue, nuziĩĩka kumiao inshao zaakue.

¹⁵ Umuĩ numupeela talanta zitaano umuua zibĩlĩ, umuua ĩmuĩ, muntu wensi kuusũũmi waakue; pembele nulongola.

¹⁶ Ĩkamuĩ unuasio naalĩ waanũnkũile ĩtalanta zitaano nuendishuluuzĩlia, nuligia nsaĩlo ya talanta zitaano ninjia.

¹⁷ Iio nunuasio naalutĩĩte ĩtalanta zibĩlĩ, nuligia nsaĩlo ya talanta zibĩlĩ ninjia.

¹⁸ Ĩpa unuasio naalĩ waanũnkuĩle ĩtalanta ĩmuĩ nuenda numĩsĩmbĩla pansĩ ĩmpeesa ya kĩShekulu waakue.

¹⁹ Pĩna nazikĩla ntondo ningĩ, nuuza ũshekulu waa ĩtumi aasio, nũiialia palumuĩ nindĩo.

²⁰ Nuuza unuasio naalĩ waanũnkuĩle ĩtalanta zitaano nuleeta ĩtalanta ninjia zitaano, nuũga, ‘Shekulu, aluĩĩkile kumuane talanta zitaano ntiizi ninjia zitaano naligilie nsaĩlo.’

²¹ ũShekulu waakue numuĩĩla, ‘Iiza gua, umwĩtumi namuuza numusuĩĩli; alĩ umusuĩĩli kuna ikeei, nĩkakukuĩĩka wĩĩ umukulu wa mingĩ; ingĩla muulumbi wa kĩShekulu waako.’

²² “Nuuza naalĩ waanunkuĩle ĩtalanta zibĩlĩ, nuũga, ‘Shekulu, aluĩĩkile kumuane talanta zibĩlĩ; ntiizi ninjia talanta zibĩlĩ, naligilie nsaĩlo.’

²³ ũShekulu waakue numuĩĩla, ‘Iiza gua umwĩtumi namuuza numusuĩĩli; alĩ umusuĩĩli kuna ikeei, nĩkakukuĩĩka wĩĩ umukulu wa mingĩ; ingĩla muulumbi wa kĩShekulu waako.’

²⁴ Nuuza nunuasio naalĩ waanũnkuĩle ĩtalanta nĩmuĩ, nuũga, ‘Shekulu, alĩ manile kĩna ue wĩmuntu numukakũ, ukuogolaa nĩpĩna sikupandĩĩle, ukulundĩĩlaa nĩpĩna sikupeetile.

²⁵ Luulo nanoopoka, nanenda nanĩmĩsĩmbĩla ĩtalanta yaako pansĩ. Ntĩĩzĩ ĩniako, koo.’

²⁶ ũShekulu waakue nushookeelia, numuĩĩla, ‘Ue umwĩtumi namubĩĩ kangĩ umukata! Alumanile kĩna nukuogolaa nĩpĩna sika mpandĩĩle, nukulundĩĩla nĩpĩna sika mpeetile?

²⁷ Iio gua, alĩ yukũjĩpĩĩle kwiĩĩka ĩmpeesa yaane muasuluuzia, nĩpĩna naaza aza nijiliaanũnkula ĩniane palumuĩ nĩnsaĩlo.

²⁸ Luulo gua, muleegeliĩ ĩtalanta, mupeelĩ nutĩĩte ĩtalanta kyumi.

²⁹ Kuitĩ wensi nutĩĩte ukipeegua nukwiongeelekigua; namugila ukileegeligua, sunga nukĩtĩĩte.

³⁰ Ĩpa umwĩtumi nasika wijĩpĩĩle, mutaagĩ mukiiti kya kunzi; kuuko kikitũla kĩlĩlo nukwikelia ĩmiino.’”

Lutondo lwa ulamuli

³¹ “Pĩna ukiiiza uMuana-muntu muukulu waakue, nĩamalaĩka tũlũ palumuĩ nduyo, paapo ukakikyalansa mwityengu lya ukulu waakue,

³² nindugu zensi zikilundĩĩlua ntongela yaakue; ukakuzikamatuĩla kĩna iio umudĩĩmi nukuzikamatuĩlaa inkolo nimbuli.

³³ Ukakuziĩĩka inkolo pamukono wa kĩgoosia, nimbuli pamukono wa kĩkĩĩma.

³⁴ Paapo umutemi ukakuaĩĩla ĩaasio naĩĩlĩ pamukono waakue wa kĩgoosia, ‘Nzuĩ namwakembetilue nuTata waane, usaalĩ uutemi naalĩ muazĩpĩlĩligue kwipũna pautũndua wa unkũmbigyulu;

³⁵ Kuitĩ alĩ numukolue nzala, namumpeela kya kulĩa; alĩ numukolue noota, nampeela nankopa; alĩ numugenda, namunanũnkula.

³⁶ alĩ nĩkĩpuĩ, namuntũnga; alĩ numuluĩle namunsoolia; alĩ nĩĩlĩ mukĩtũngo namunzagaana.’

³⁷ Paapo ĩakola kulukuuluu ĩkakumushookeelia, aũge, ‘Shekulu, nzalĩ naalĩ kukuoonie umukolue nzala, nakukupeela india, katia umukolue noota nakukupeela ukope?

³⁸ Nzalĩ nalikukuoonie umugenda nakukuanũnkula, katia wĩkĩpuĩ nakukutũnga?

³⁹ Nzalĩ naalĩ kukuoonie umuluĩle katia wĩĩlĩ mukĩtũngo, nakukusoolia?’

⁴⁰ uMutemi ukakuashookeelia, ‘Tai namuĩĩla, kĩna alĩ mukumutendela umuĩ waao wa anũna aane naaniino, alĩ mukutndelaa uneene.’

⁴¹ “Paapo ukakuaĩĩla naĩĩlĩ pamukono wa kĩkĩĩma, ‘Legĩ kumuane namwazũmilue; ingĩlĩ mumooto wa kalĩ nakalĩ, naalĩ mukoleleligue ũShetani nĩamalaĩka aakue.

⁴² Kuitĩ alĩ numukolue nzala, sika namumpeela india, alĩ numukolue noota, sika namumpeela nkope;

⁴³ alĩ numugenda, sika namunanũnkula; alĩ numuluĩle numukĩtũngo, sika namunsoolia.’

⁴⁴ Paapo nĩaasio ikishookeelia, aũge, ‘Shekulu, nalĩ alĩ kukuoonie umukolue nzala nĩnoota, katia umugenda, katia ukĩpuĩ, katia umuluĩle, katia wĩĩlĩ mukĩtũngo sika nakukutumĩla?

⁴⁵ Paapo ukakuashookeelia. Tai namuĩĩla, kĩna sika alĩ mukumutendelaa umuĩ waao wa anũna aane naaniino, iio gua, sika alĩ mukutendelaa nineene.’

⁴⁶ Ĩa ikilega ingĩle muukasigua wa kalĩ nakalĩ, ĩpa ĩakola kulukuuluu muupanga wa kalĩ nakalĩ.”