Matayo 24 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Ukũnukuli wa kĩYesu mumpola za ugũmulua wa Numba ya kĩNzua nĩmpelo ya unkũmbigyulu

¹ ũYesu nupũna muNumba ya kĩNzua, nuĩ ulonguile; ĩamanigua naamuagaana, itĩ amulagĩĩle uuza wa uuzengua wa Numba ya kĩNzua.

² ũYesu nuashookeelia, nuaĩĩla, “Sika mumaooniene aya tũlũ. Tai, namuĩĩla, Sika likishaaga kigyũe mukiania igyũe nasikalikigumulua.

³ Pĩna alĩ wikyalansile Munkonko ya Mĩzeituni, ĩamanigua aakue naamuagaana kĩmpelo, naaũga, ‘Kuĩĩle, izi zikitũla nzalĩ. Nĩkĩlĩngasĩĩlio kĩ kya kushooka kumuako, nĩkya mpelo ya unkũmbigyulu?’”

⁴ ũYesu nuashookeelia, nuaĩĩla, “Kengealĩ, muntu wensi waleke kumupembeelia.

⁵ Kuitĩ iingĩ ikiiiza kuliina liane, Ĩiuga, ‘Ĩne neene Kilisito,’ ndĩo ikipembeelia iingĩ.

⁶ Kangĩ mukiiigia mpola za ulugu nuukũmuuki wa ulugu; laaĩ, mulekitũmbua,

⁷ kuitĩ ĩndugu ikiuuka ĩkue nĩndugu, nuutemi wĩkue nuutemi; ikitũla nzala nĩmĩmanga uko nĩnduuko.

⁸ Aya mensi ingĩ muandio udũũ wa usungu naukulu.”

⁹ “Paapo ĩkakumusongeela inie muligie impatĩ, nukukumuulaga; kangĩ indugu tũlũ zĩkakumusuukĩlua kunsooko ya liina liane.

¹⁰ Paapo iingĩ ikishooka nũma nukukĩsongeela nukukĩsuukĩlua eene kueene;

¹¹ nĩanakĩdagu iingĩ a ulongo ĩkakigyelela nukwilimĩĩlia iingĩ.

¹² Nukunsooko ya kongeeleka uuleki, uulogua wa antu iingĩ ukipola.

¹³ Ĩpa nwakugigimĩlia sunga kumpelo, uuyo ukigũnĩka

¹⁴ niMpola naNziiza izi za utemi zikitanantigua muunkũmbigyulu tũlũ, wĩĩ ukuĩli kundugu zensi; paapo ĩmpelo ikipika.”

¹⁵ “Iio gua pĩna mukakukĩona ĩkĩolũ kya oononeki, kĩna alĩ kĩtambulue numunakĩdagu uDanieli, kiĩmĩka pana yeelu (nwishoma nwalĩnge),

¹⁶ Paapo ĩa muUyahũdi atalamĩle kunkonko;

¹⁷ nwa kwityembe walekitima nukwiingĩla munumba yaakue wasole kĩntu,

¹⁸ nunwa kumugunda walekishookela kantiila zaakue.

¹⁹ Ukĩa waao naamaimbi nĩnaukaa ionkia intondo zaasio!

²⁰ Lompĩ kona uutalami waani ulekitũla muntondo za mbula, sunga palutondo lwa wikyali.

²¹ Kuitĩ intondo zaasio lukitũla lumpatĩ lukulu nasika lwalakigyelela kwipũna umuandio wa unkũmbigyulu sunga nantende; sunga sika ijile kigyelela kainiino.

²² Kanga intondo zaasio ĩsika alĩ nkaguligue, sika alĩ wijiligũnĩka kamuntu wensi. Ĩpa kunsooko ya asaagulua zikikaguligua intondo zaasio.

²³ iTyũngo liasio kanga muntu wensi wamuĩĩla, ‘Laaĩ uKilisito ukoolĩ ĩpa, katia ukoolĩ uko, lekishuĩĩlĩ.’

²⁴ Kuitĩ mĩkakigyelela maKilisito ma ulongo, nĩmanakĩdagu ma ulongo; ndazo mikitenda ilĩngasĩĩlio ikulu nĩmakula, nukukualimĩĩlia malĩĩ ishũũmikile, sunga ĩasaagulua.

²⁵ Laaĩ, nakondagiaa kukumusugula.

²⁶ Luulo gua, malĩĩ amuĩĩla, ‘Ntuuyo kumbuga, lekipũnĩ; ntuuyo kumbele, lekishuĩĩlĩ.’

²⁷ Kuitĩ kĩna iio-iioo ulupĩĩto nalukupũnaa kukĩĩlĩma nalupĩĩta sunga kumueli, iio-iioo ikitũla kwiiiza kumuakue uMuana-muntu.

²⁸ Kuitĩ tũlũ pensi pĩna umuimba wĩĩlĩ, paapo indĩĩ zĩkakĩilingĩĩla.

²⁹ Pĩna lwakĩla ulumpatĩ lwa ntondo zaasio, ĩkamuĩ ĩmpasu ĩkakĩlyupigua, numueli sika ukipũnia uweelu waakue, ninshonda zikigua kwipũna kwigyulu, ningũlũ za kwigyulu zikishũngũsĩka.

³⁰ Paapo kĩkakigyelela ĩkĩlĩgasĩĩlio kya Muana-muntu kwigyulu; nindugu tũlũ zensi za unkũmbigyulu zikilĩla kĩlĩlo nukukumuona uMuana-muntu upolokile mukiania ya malũnde ma kwigyulu kungũlũ nuukulu wingĩ.

³¹ Ukakuatuma ĩamalaĩka aakue palumuĩ nululi lukulu lwidyede; ndĩo ĩkakualundĩĩla ĩasaagulua aakue kwipũna nandĩ zinĩĩ, kwipũna ĩmpelo igyulu sunga ĩmpelo nzĩa.”

Kĩna ijĩpĩĩle kwikengeala

³² “Ĩmanie mpiani kumukuu, pĩna ulutambĩ luakue lwasĩpuka nukũshonga ĩmalũka maakue mukulĩngaa kĩna ĩsongola yanũnkaa

³³ Iio gua niniinie, pĩna mwaona aya tũlũ mensi mikigyela, kulĩnge kĩna wĩ piipĩ pamĩlango.

³⁴ Tai namuĩĩla, uLuuli ulu sika lukiula sunga aya tũlũ mensi mikitendeka.

³⁵ iGyulu nĩnsĩĩ zikikĩla, ĩpa inkaani zaane sika zikikĩla kainiino.

³⁶ Ĩpa impola za ntondo zaasio nityũngo liasio kutilĩ numanile; sunga ĩamalaĩka a kwigyulu, nu Muana gaa, ĩpa uTata udũũ.

³⁷ Kĩna alĩ itũlile muntondo za kĩNoe, iio ikitũla pĩna ukiiiza uMuana-muntu.

³⁸ Kĩna iio naalĩ itũlile muntondo zaasio pĩna alĩ wikĩĩlĩ uwijuli wa maazĩ, antu nailĩa nukwikopa; naitoola nukwitoolua, sunga palutondo luulo pĩna uNoe nũingĩla mwipyango;

³⁹ sika naalĩnga sunga uwijuli wa maazĩ nawĩĩza, nuakapĩlia sue; iio ikitũla pĩna ukiiiza uMuana-muntu.

⁴⁰ iTyũngo liasio, antu abĩlĩ ukaa ĩĩlĩ mumugunda, umuĩ watualue, umuua walekue.

⁴¹ Asungu abĩlĩ ukaa ishia, umuĩ watualue, umuua walekue,

⁴² “Luulo, kengealĩ gua, kunsooko sika mumanile ulutondo kĩ ũShekulu waani pĩna wijile.

⁴³ Ĩpa lĩngĩ ulukaani ulu, umukola numba kanga ĩalumanile ityũngo umũii pĩna ũjile, alũjilikengeala, ĩnumba yaakue ĩlekishĩmbua.

⁴⁴ Luulo gua niniinie ĩzĩpĩĩlie, kuitĩ ityũngo nasika mulĩsĩĩgile, paapo uMuana-muntu wijile.”

Mpiani ya ĩtumi naaaza nĩnaabĩĩ

⁴⁵ “Waani gua umwĩtumi namusuĩĩli namunamasala naalĩ mupeegue umulĩmo nũShekulu waakue, waapeele ĩantu a numba yaakue india zaao pityũngo liao?

⁴⁶ Muliukũ umwĩtumi nuasio ũShekulu wakue pĩna ukakumuagaana witenda yaasio.

⁴⁷ Tai namuĩĩla, ukakumuĩĩka wĩĩmukulu munsao zakue tũlũ zensi.

⁴⁸ Ĩpa umwĩtumi nuasio namubĩĩ kanga waũge munkolo yaakue, ‘ũShekulu waane watinagiaa;’

⁴⁹ wandie kukuakua ĩĩtumi ĩĩĩa nukwilĩa nukwikopa palumuĩ nĩagaala ntulu,

⁵⁰ ũShekulu wa mwĩtumi nuasio ukiiiza palutondo nasikulusĩĩgile, nityũngo nasikulĩmanile,

⁵¹ ukakumutiĩnkanula; ukakumuĩĩkĩlia ityũmpĩ liakue palumuĩ nĩanamampĩlu; paapo ikitũla kĩlĩlo nukwikelia ĩmiino.”