Matayo 22 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mpiani ya waanua kuwĩnga

¹ ũYesu nuaĩĩla kangĩ kumpiani, nuũga,

² “uUtemi wa kwigyulu wĩpianile numutemi umuĩ naalumuzĩpĩĩlie umuana waakue uwĩnga.

³ Nuatuma ĩĩtumi aakue aĩĩte naalĩ aanue kuwĩnga, ndĩo sika naaaza.

⁴ Nutuma kangĩ ĩĩtumi nĩĩĩa nuũga, ‘Aĩĩlĩ naalĩ aanue, laaĩ india zakondaa; ng'ombe nĩnaigĩnũ yakonda kwitemigua; tũlũ yensi yakondaa; nzuĩ kuwĩnga.’

⁵ Ĩpa sika naakeela; naalongola kĩna aloele, umuua kumugunda waakue, umuua kuusuluzia waakue;

⁶ naalĩ asaagile naaaguĩla ĩĩtumi naaagaalĩla naaaulaga.

⁷ Paapo umutemi nutaka; nuatuma ĩĩlaasi aakue nuamala sue ĩaulagani aasio, numĩsonsa ĩkaa yaao.

⁸ Paapo nuaĩĩla ĩĩtumi aakue, ‘uWĩnga wakondaa, ĩpa naaza aanue sika ijĩpĩĩle.

⁹ Iio gua, lendĩ mumĩsambi ya nzĩla nankulu; ensi namukakuaona, aanĩ kuwĩnga.’

¹⁰ ĩĨtumi aasio naalongola, naenda munzĩla nankulu, naailingĩĩla ensi naalĩ akuaona, abĩĩ nĩnaaza; ĩnumba ya wĩnga nijula ĩagenda.

¹¹ Pĩna nũingĩla umutemi waa laae ĩagenda, numuona muntu muasio mugila kantiila ya wĩnga;

¹² numuĩĩla, ‘Mbuane, azũingĩĩle mbii munu pĩna umugila kantiila ya wĩnga?’ Nukeleala.

¹³ Paapo umutemi nuaĩĩla ĩĩtumi aakue, ‘Mutũngĩ mĩgulu nĩmĩkono mutaagĩ mukiiti kya kunzi; kuasio kuuko ikitũla kĩlĩlo nukwikelia ĩmiino.’

¹⁴ Kuitĩ iingĩ naĩĩtue, ĩpa naasaagulue akeei.”

Kyolio mumpola za koodi

¹⁵ Paapo ĩApalisayo naalongola naakomia ĩkialo kya kumutega munkaani zaakue.

¹⁶ Naatuma kumuakue ĩamanigua aaao palumuĩ nĩantu a kĩHelode, naaũga, “Mumania, kumanile kĩna ue wĩmuntu wa tai, nĩnzĩla ya kĩNzua ukumĩmanagiaa mutai, kangĩ sikukusupaa kaukulu wa muntu wensi, kunsooko sikukulaaa kausiu wa antu.

¹⁷ Ĩpa gua, ukuĩĩle, usĩĩgile mbii; iizane kukumulĩpa uKaisali koodi kanga zũi?”

¹⁸ ũYesu pĩna nulĩnga uubĩĩ waao, nuũga, “Nĩkĩ mwingema inie anamampĩlu?

¹⁹ Naambiĩ ĩmpiia ya koodi.” Naamuleetela ĩshilinge.

²⁰ Nuaĩĩla, “aityũe ĩlĩ lya kuani munu nuolua uu.”

²¹ Naamuĩĩla, “Lya kĩKaisali.” Paapo nuaĩĩla, “Iio gua, iya kĩKaisali mupeelĩ uKaisali, niya kĩNzua muupelĩ uNzua.”

²² Pĩna naiigia naakulĩlua, naamuleka nalongola.

Kyolio mumpola za wiiuki kwipũna muakiu

²³ Lutondo luasio ĩAsadukayo naakuũgaa kutilĩ kawiiuki, naamuagaana, naamukolia,

²⁴ naaũga, “Mumania, uMusa aluũgile, ‘kanga umuntu wakie ĩmugila kaaana, umunũna waakue wamutoole umusungu waakue, wamulelelie umunũna waakue ĩaana.’

²⁵ Kunsĩĩtu gua, alĩ akoolĩ agoosia mupũngatĩ akĩnũna; nwa muandio nutoola, nukia nduyo alĩ mugila kaaana, umunũna waakue numusaala umusungu.

²⁶ Iio-iioo nunwa kabĩlĩ, nunwa katatu, sunga ensi naa mupũngatĩ.

²⁷ ĩMpelo ya ĩa tũlũ nukia numusungu

²⁸ Kuluulo gua, muwiiuki ũjilitũla musungu wa kuani muĩa naa mupũngatĩ, kuitĩ tũlũ alĩ amutoolile.”

²⁹ Paapo ũYesu nuashookeelia, nuaĩĩla, “Mulimĩlĩĩle, kunsooko sika mumanile uwandĩkua sunga ingũlũ za kĩNzua.

³⁰ Kuitĩ muwiiuki sika akutoolaa sunga kwitoolua, ĩpa akutũlaa zĩ amalaĩka a kwigyulu.

³¹ Kangĩ mumpola za wiiuki wa akiu sika mwalasomane naalĩ lutambulue nuNzua ya kĩna,

³² ‘Ĩne neene Nzua wa kĩIbũlahimu, nuNzua wa kĩIsaki, nuNzua wa kĩYakobo?’ uNzua sika Nzua wa akiu, ĩpa waa apanga.”

³³ Maũmbĩ pĩnanamiigia, namakulĩlua kuumania waakue.

Kyolio mumpola zilyagĩĩlio nikyulu

³⁴ ĩApalisayo pĩna naiigia kĩna waamũmagiaa ĩAsadukayo, naĩlundĩĩla palumuĩ.

³⁵ Umuĩ waao wa amanakialo, numukolia kukumugema, nuũga,

³⁶ “Mumania, lyagĩĩlio kĩ nikyulu muUlagĩĩlio?”

³⁷ Nduzo numuĩĩla, “Umuloogue ũShekulu Nzua waako kumoo waako tũlũ, nukunkolo yaako tũlũ, nukumasala maako tũlũ.

³⁸ Ĩlĩ lyolĩ lyagĩĩlio nikyulu, kangĩ lya muandio.

³⁹ Nĩlya kabĩlĩ lĩpianile ndĩlo. Umuloogue umunakaa waako kĩna ĩnkolo yaako.

⁴⁰ uUlagĩĩlio wensi nĩAnakĩdagu ukamantĩĩne mumalagĩĩlio aya namabĩlĩ.”

Kyolio mumpola za kĩMesia

⁴¹ ĩApalisayo pĩna naĩilingĩĩla, ũYesu nuakolia,

⁴² nuũga, “Mumusĩĩgile mbii uKilisito? Muana wa kuani?” Naamuĩĩla, “Muana wa kĩDaudi.”

⁴³ Nuaĩĩla, “Naitũla mbii gua, uDaudi mwa kĩMuau kukumuĩta Shekulu, nuũga,

⁴⁴ ‘ũShekulu numuĩĩla ũShekulu waane,’ Kyalansa pamukono waane wa kĩgoosia Sunga nĩaĩĩke ĩanaulugu aako Pansĩlĩlĩ ya mĩgulu yaako?”

⁴⁵ Malĩĩ uDaudi ĩumuĩtile, “Shekulu, waa muana waakue mbii gua?”

⁴⁶ Sika nusũũma nunumuĩ kukumushookeelia kalukaani; sunga kwipũna luulo lutondo sika nugagũlia kaumuĩ kukumukolia kalukaani kangĩ.