Matayo 21 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu wiingĩla mũYelusalemũ zĩ mutemi

¹ Pĩna naasũgamĩĩla kũYelusalemũ nukwipika paBetipage muNkonko ya Mĩzeituni, paapo ũYesu nuatuma ĩamanigua abĩlĩ,

² nuaĩĩla, “Longolĩ mukĩsaalĩ namutungĩnkĩĩne; ĩkamuĩ mukiona ndoguĩ ntũngue ĩensi numuana. Mĩtũngulĩ, mundeetele.

³ Naamuntu wamukolia lukaani, ũgĩ, Shekulu uzishiiile; ĩkamuĩ ukakumupeela.”

⁴ Izi tũlũ nazitũla, koona lutimĩĩligue ulukaani lwa munakĩdagu naluũgile,

⁵ “Mumuĩĩle umunanso Sayuni, Laaa, umutemi waako upolokile kumuako, Mupolo, udaamĩlĩĩle ndoguĩ Nĩkaana-ndoguĩ, muana-ndoguĩ.”

⁶ ĩAmanigua naalongola, natenda kĩna ũYesu alĩ waalagĩlĩĩlie.

⁷ Naamĩleeta ĩndoguĩ numuana-ndoguĩ, naazaala intiila zaao mukiania yaao; nudaamĩĩla.

⁸ Antu iingĩ mũyũmbĩ liasio naazaala intiila zaao munzĩla; ĩĩĩa naatema intambĩ za makota, naazaala munzĩla.

⁹ ĩMaũmbĩ naalĩ matongĩĩle, nĩnaalĩ matiatile namĩtunta namaũga, “Osiana umuana wa kĩDaudi, nwakũmazukigue nũjile muliina lya kĩShekulu! Osiana kukiania!”

¹⁰ Pĩna nũingĩla mũYelusalemũ, ĩkaa yensi nĩsũngũsĩka, naaũga, “Uyu waani.”

¹¹ ĩMaũmbĩ namaũga, “Uzu ingĩ Yesu, umunakĩdagu wa kuNazaaleti ya Galĩlaya.”

ũYesu ukumielia ĩNumba ya kĩNzua

¹² ũYesu nũingĩla muNumba ya kĩNzua, nuaĩnga tũlũ ensi naalĩ igulia nukwigula muasio; nuzigalulanga imeeza za akaĩĩsia-mapeesa, nĩmatengu ma aasio naalĩ igulia inkunda,

¹³ nuaĩĩla, “Yandĩkue, ‘Ĩnumba yaane ikitũla numba ya wĩtekeli;’ inie gua, mwamĩtenda yĩĩ lyũlũ lya aleegelania.”

¹⁴ ĩApoku nĩanakĩtele naamuagaana muumo muNumba ya kĩNzua, nuakamia.

¹⁵ Ĩpa ĩapolia naakulu nĩalangi pĩna naamaona ĩmakula naalumatendile, nukukuaona ĩang'inia akĩtunta muasio muNumba ya kĩNzua naiũga, “Osiaana Muana wa kĩDaudi! Naataka,”

¹⁶ naamuĩĩla, “Wiigiliene kĩna ĩa iũga. ũYesu nuaĩĩla, Eeze,” sika mwalasomane, “Kumĩlomo ya aana naaniino nĩnaakonkaa wakamĩnkĩĩlia ulukũmo?”

¹⁷ Nualeka, nupũna mũYelusalemũ, nuenda kuBetania, nugona kuuko.

Mukuu nasika upĩĩle inkali

¹⁸ Nĩpadaau zigi pĩna alushookile kũYelusalemũ nukolua nzala.

¹⁹ Nuuona mukuu umuĩ panzĩla, nuwaagaana, sika nuona kakĩntu muasio ĩpa ĩmalũka udũũ; nuuĩĩla, “Zilekipĩa kankali kangĩ mumuako kainiino!” Ĩkamuĩ umukuu nauuma.

²⁰ ĩAmanigua akue pĩna naaona, naakulĩlua, naaũga, “uMukuu uu ĩkamuĩ uumaa mbii itĩ?”

²¹ ũYesu nushookeelia, nuaĩĩla, “Tai namuĩĩla, Kanga muĩnuusuĩĩli, ĩmuagila kankankani, mukitenda sika lĩĩlo dũũ ĩlya mukuu, ĩpa sunga kanga mumĩĩĩle ĩnkonko ĩĩ, Kuuluka, utaague munanza, ikitendeka.”

²² Tũlũ yensi namukuilompa muulompi, ĩmusuĩlĩĩle, mukiaanũnkula.

Kyolio mumpola za usũũmi wa kĩYesu

²³ Pĩna nũingĩla muNumba ya kĩNzua ĩapolia naakulu nĩanampala a antu naamuagaana pĩna alĩ wimania, naaũga, “Kuusũũmi kĩ ukutendaa aya. Kangĩ waani naalukupĩĩle uusũũmi uu.”

²⁴ ũYesu nushookeelia nuaĩĩla, “Nineene nĩkakumukolia lukaani lumuĩ; kanga munshookeelie, nineene nĩkakumushookeelia kuusũũmi kĩ nitenda aya.

²⁵ uUbadĩĩzo wa kĩYohana alĩ upũnile mpĩĩ? Alĩ upũnile kwigyulune kanga kuaana antu? Naĩĩ kĩsĩĩgia eene kueene, naiũga, Kanga kuũge upũnile kwigyulu, ukakukuĩĩla, ‘Nĩkĩ gua, sika namumusuĩĩla?’

²⁶ Katia kuũge upũnile kuaana antu, koopokile iyũmbĩ kuitĩ tũlũ ensi agombile kĩna uYohana ingĩ munakĩdagu.”

²⁷ Naamushookeelia ũYesu, naaũga, “Magu, sika kuĩzĩ.” Nduzo nuaĩĩla, “Sunga nineeni sika nukumuĩĩla kĩna kuusũũmi kĩ nanukutendaa aya.”

Mpiani ya aana abĩlĩ

²⁸ “Musĩĩgile mbii. Alukoolĩ muntu naalutĩĩte aana abĩlĩ, numuagaana nwa muandio nuũga, ‘Muanuane, nantende lenda wĩtume umulĩmo mumugunda wa mĩzabiibu.’

²⁹ Nushookeelia nuũga, ‘Sika nuunzie.’

³⁰ Numuagaana nwa kabĩlĩ numuĩĩla zizo-ziizoo. Nushookeelia, nuũga, ‘Sika numuloe.’ Pembele nupela, nuenda.

³¹ Muĩa naabĩlĩ, nuĩmbi naalutendile uulooa wa kishee?” Naaũga, “Nwa mwandio.” ũYesu nuaĩĩla, “Tai namuĩĩla, ĩasangulia-koodi nĩagololia atongĩĩle kuntongela yaani kwiingĩla muutemi wa kĩNzua.

³² Kunsooko uYohana alũjile kumiani kunzĩla ya kulukuuluu, niniinie sika namumusuĩĩla; ĩpa ĩasangulia-kooodi nĩagololia naamusuĩĩla; ĩpa inie pĩna namuona sika namupela pembele, koona mumusuĩĩle.”

Mpiani ya mugunda wa mĩzabiibu

³³ “Tegeelĩ ĩmpiani nĩnzĩa. Alukoolĩ muzengua, nduzo alupandĩĩle mĩzabiibu mumugunda, nuukitĩla kito; nusĩmbĩla tyulĩ lya kusokolela inkali; nuzenga kĩlĩngo; nualindĩĩlia ĩalĩmi; nulega munsĩĩ niasio.

³⁴ iTyũngo lya kupĩa inkali pĩna nalĩsũgamĩĩla, nuatuma ĩĩtumi aakue kualĩmi, aanũnkule inkali.

³⁵ ĩAlĩmi naaaguĩla ĩĩtumi aakue; uyu naamukua, umuua naamuulaga, umuua naamutũlanga ĩmagũe.

³⁶ Nutuma kangĩ ĩĩtumi nĩĩĩa iingĩ kwikĩla a muandio; naatenda iio-iioo.

³⁷ ĩMpelo yaakue numutuma umuana waakue kumiao, nuũga, ‘Ĩkakumukulia umuana waane.’

³⁸ Ĩpa ĩalĩmi pĩna naamuona umuana waakue, naĩĩ kĩtambuĩla eene kueene, ‘Uzu wazu musaali, kuĩnĩ kumuulage, kuusole uusali waakue.’

³⁹ Naamuguĩla, naamutaaga kunzi ya mugunda, naamuulaga.

⁴⁰ Pĩna ukiiza umukola mugunda, ukakuatenda yaani ĩalĩmi aasio?”

⁴¹ Naamuĩĩla, “Ukakuaulaga sue ĩabĩĩ aasio; ukakualindĩĩlia ĩalĩmi ĩngĩ umugunda, naĩkakumupeela inkali mumatũngo maakue.”

⁴² ũYesu nuaĩĩla Sika mwalasomane muwandĩkua, “iGyũe naalĩ alĩsiitile ĩazengi, ‘Lĩĩlo liazaa gyũe kyulu lya kuluũno; uLukaani ulu lupũnile kwa kĩShekulu, Ndulo lwa ukulĩlua pamiiso mĩĩtu?’

⁴³ “Kuitĩ yoi namuĩĩla ya kĩna uutemi wa kĩNzua ukileegigua kumiani, ikipeegua ndugu nyukupĩaa inkali zaakue.

⁴⁴ Nwakugua mwigyũe ĩlĩ ukiminanguka; nalĩkakumutũla lĩkakumutindĩkia.”

⁴⁵ ĩApolia naakulu nĩApalisayo, pĩna naiigia impiani zaakue naalĩnga kĩna ukuatambula ĩeeene.

⁴⁶ Pĩna naiikunga amuguĩle, naamoopoka ĩmaũmbĩ, kunsooko alĩ mamuoonie kĩna munakĩdagu.