Matayo 20 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mpiani ya alĩmĩĩzia mumugunda wa mĩzabiibu

¹ “uUtemi wa kwigyulu wĩpianile numuntu mukola numba, naalupũnile kĩlĩ daau kwidũũma ĩalĩmĩĩzia waatuale mumugunda waakue wa mĩzabiibu.

² Pĩna naĩgombia nĩalĩmĩĩzia kukĩpeela shilinge ĩmuĩ munsĩ pii, nuatuma kumugunda waakue

³ Pĩna nayĩĩ zĩ nsaa ya katatu, nwĩaagaana nĩĩĩa ĩĩmĩkile pigyulĩlo nakanda;

⁴ nĩaasio nuaĩĩla, ‘Lendĩ niniinie kumugunda, nayumũjĩpĩĩle nĩkakumupeela.’ Naenda.

⁵ Nayĩĩ zĩ nsaa ya mutandatu nĩnsaa ikyenda nwĩaagaana nĩĩĩa, nutenda iio-iioo.

⁶ Nayĩĩ zĩ nsaa ikyumi nĩmuĩ, nupũna, nuaona nĩnaĩngĩ ĩĩmĩkile, nuaĩĩla, ‘Nĩkĩ muĩmĩkile ĩpa munsĩ pii muagila kamulĩmo?’

⁷ Naamuĩĩla, ‘Kunsooko kutilĩ nwakukupeela umulĩmo.’ Nuaĩĩla, ‘Lendĩ niniinie kumugunda wa mĩzabiibu.’

⁸ Pĩna niĩ mpĩndĩ umukola mugunda numuĩĩla umulindĩĩla mugunda, ‘ĩĩte ĩatiĩkia, uapeele ĩkĩnamulĩmo kiao, wandĩĩlie ĩa mumalĩĩlio sunga ĩa muandio.’

⁹ Pĩna naaaza naalĩ a nsaa ikyumi nĩmuĩ, wensi nuanũnkula shilinge ĩmuĩ.

¹⁰ Pĩna naaaza naalĩ a muandio, naasĩĩga kĩna ikiaanũnkula kwikĩlĩkĩĩla; nĩndĩo, gaa wensi nuanũnkula shilinge ĩmuĩ.

¹¹ Pĩna naaanũnkula gua, naĩĩ kumusũsũmĩla umukola numba

¹² naaũga, ‘Ĩa a mumalĩĩlio ĩtumile mulĩmo nsaa ĩmuĩ udũũ waalĩganĩĩlia nindiishie naaza kugigimĩlĩĩlie munsĩ pii uluago niyĩla nĩmpasu.’

¹³ Nushookeelia, numuĩĩla umuĩ waao, ‘Mbuane, sika nukukapile; sika aza kwĩgombiliene nineene kushilinge ĩmuĩ?

¹⁴ Sola ĩshilinge yaako, ulongole. Ĩne neene numuloe kukumupeela uyu nwa mumalĩĩlio lika lĩmuĩ udũũ ninduue.

¹⁵ Sika injĩpĩĩlene kukĩtumĩla inshao zaane mĩna numuloele? Mbaa wailua wĩĩlũ kunsooko ya ukende waane?’

¹⁶ Iio-iioo naa mumalĩĩlio ikitũla a muandio, nĩa muandio ikitũla a mumalĩĩlio.”

Ukũnukuli wa katatu wa nkia yaakue ũYesu

¹⁷ ũYesu pĩna alũnankĩla kwienda kũYelusalemũ, nuasola ĩamanigua naikyumi naabĩlĩ, naĩũna ing'ene munzĩla, nuaĩĩla,

¹⁸ “Laaĩ, kwinankĩla kulunziĩ kũYelusalemũ; nuMuana-muntu ukiĩĩkĩlua mumĩkono ya apolia naakulu nĩalangi, ndĩo ĩkakumulamula kwiulagua,

¹⁹ nukukumuĩĩkĩla mumĩkono ya ndugu nazĩngĩ koona amupopote, nukukumukua namĩkoa, nukukumukononteela mumusalaba; nulutondo lwa katatu ukiiukigua.”

Lyompi lya kukuligua muna unkũmbigyulu

²⁰ Paapo unina wa aana a kĩZebedayo numuagaana palumuĩ nĩaana aakue, nutũngama pamuakue nukukumulompa ulukaani.

²¹ ũYesu numuĩĩla, “Usiiile yaani?” Numuĩĩla, “Lagĩĩlia ĩaana aane ĩa, ikyalanse muutemi waako, umuĩ kumukono waako wa kĩgoosia, umuua kumukono waako wa kĩkĩĩma.”

²² ũYesu nushookeelia, nuũga, “Sika mumanile namukululompa. Musũũmilene kwikopela ĩkĩĩko nanĩkakukĩkopela ĩne.” Naamuĩĩla, “Kusũũmile.”

²³ Nuaĩĩla, “ĩKĩĩko kiane mukakukĩkopela, ĩpa kukikyalansa kumukono wa kĩgoosia nukumukono wa kĩkĩĩma sika mulĩmo waane kwipeelana, ĩpa akupeegagua naalĩ azĩpĩlĩligue nuTata waane.”

²⁴ Ĩa naikyumi, pĩna naiigia, naaatakĩĩla ĩanũna naabĩlĩ.

uUkulu nawa tai

²⁵ Paapo ũYesu nuĩĩta, nuũga, “Mwamanile kĩna ĩatemi a ndugu nazĩngĩ akĩoonatĩĩlagiaa, nĩakulu aao akuademelaa.

²⁶ Ĩpa kumiani ilekitũla itĩ, ĩpa wensi nusiile kwitũla mukulu kumiani, wĩĩ mwĩtumi waani;

²⁷ wensi nusiiile kwitũla wa muandio kumiani wĩĩ musese waani.

²⁸ Kĩna iio uMuana-muntu sika wijile kukĩtumĩlua, ĩpa kukĩtuma, nukwipũnia uuumĩ wakue wĩĩ kĩkomoli kunsooko ya iingĩ.”

Apokũ abĩlĩ ikamigua

²⁹ Pĩna alĩ ilega kũYeliko, yũmbĩ kyulu nalĩmutiata.

³⁰ Laaa, apokũ abĩlĩ naalĩ ikyalansile panzĩla; pĩna naiigia kĩna ũYesu ukĩlile, naĩtunta naaũga, “Shekulu, Muana wa kĩDaudi, ukukolelue kĩnishungu!

³¹ ĩYũmbĩ nalĩakalamukĩla atuulie. Ĩpa ĩo naĩkakia kukĩtunta, naaũga, Shekulu, Muana wa kĩDaudi, ukukolelue kĩnishungu!”

³² ũYesu nuĩma, nuĩĩta, nuũga, “Musiile numutendele yaani?”

³³ Naamuĩĩla, “Shekulu, kusiile ĩmiiso mĩĩtu malaĩligue!”

³⁴ ũYesu nuaonela kĩsuusu, nuapaatia ĩmiiso maao; ĩkamuĩ naaona naamutiata.