Matayo 19 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kyolio lya wĩleki

¹ Pĩna ũYesu nuzimala inkaani izi, nulega kũGalilaya, nupika kunandĩ za Uyahũdi, kwityumbĩ liYolidani.

² maũmbĩ mingĩ namamutiata, nuakamia kuasio.

³ ĩApalisayo naamuagaana naĩĩ kumugema, naamukolia, “Usũũmilene umuntu kukumuleka umusungu waakue kunsooko yensi?”

⁴ Nuashookeelia, “Sika musomilene kĩna uzo naalutũndile umuandio, nuaumba mugoosia numusungu.

⁵ Nuũga, ‘Kunsooko ĩĩ, umuntu ukakualeka ũshee nunina, ukikamantana numusungu waakue, ndĩo naabĩlĩ ikitũla muĩlĩ umuĩ.’

⁶ Sika kĩlĩ abĩlĩ kangĩ, ĩpa muĩlĩ umuĩ. Luulo gua, naalukamantĩĩnie uNzua, umuntu walekikamantuula.”

⁷ Naamuĩĩla, “Nĩkĩ gua, uMusa alulagĩlĩĩlie ĩkieti kya wĩleki, nukukumuleka umusungu.”

⁸ Nuaĩĩla, “Kunsooko ya ukakũ wa nkolo zaani, uMusa numugombia inie mualeke ĩasungu aani, ĩpa kwipũna umuandio sika alĩ itĩ.

⁹ Ĩne gua namuĩĩla, wensi nukakumuleka umusungu waakue kanga isiititũla kunsooko ya usambo, nukukumutoola wĩngĩ, wagololagiaa. Nduyo nwakumutoola naalĩ mulekue wagololagiaa.”

¹⁰ ĩAmanigua naamuĩĩla, “Kanga yĩĩ yoi mumpola za mugoosia numusungu, kutilĩ kansaĩlo kwitoola.”

¹¹ Paapo nuaĩĩla, “Sika tũlũ ensi naasũũmile kukuluanũnkula ulukaani ulu, ĩpa aao naapeegue.

¹² Akoolĩ ĩagumba naalelue itĩ kwipũna mundaa za anina; akoolĩ ĩagumba naatendue ugumba nĩantu; akoolĩ ĩagumba naĩtendile agumba ĩeene kunsooko ya utemi wa kwigyulu. Nusũũmile kukuluanũnkula ulukaani ulu nwaluanũnkule.”

ũYesu ukuakembeta ĩang'inia

¹³ Paapo ang'inia naaleetua kumuakue waĩĩkĩle ĩmĩkono yaakue mumiao nukukualompeela, ĩpa ĩamanigua aakue naaakuagilia.

¹⁴ Ĩpa ũYesu nuũga, “Alekĩ ĩang'inia aze kumuane, muleke kuagilia, kuitĩ naĩkĩna ĩa, uutemi wa kwigyulu ingĩ waao.”

¹⁵ Nuĩĩkĩla ĩmĩkono yaakue mumiao; nulega kuasio.

Musumbatĩ namugolĩ widũũma uupanga wa kalĩ nakalĩ

¹⁶ Laaa, muntu umuĩ numuagaana, numuĩĩla, “Mumania, ntende utendi kĩ nauuza ndigie uupanga wa kalĩ nakalĩ.”

¹⁷ Numuĩĩla, “Nĩkĩ winkolia ĩne impola za uza. Namuuza ingĩ umuĩ. Kanga uusiiile kwiingĩla muupanga umakendegeele ĩmalagĩĩlio.”

¹⁸ Numuĩĩla, “Namĩmbi?” ũYesu nuũga, “Ulekiulaga, Ulekigololia, Ulekiiia, Ulekikuĩla uulongo,

¹⁹ Kulia utata waako numaau waako, kangĩ, Umuloogue umunakaa waako kĩna ĩnkolo yaako.”

²⁰ uMusumba numuĩĩla, “Aya mensi namakendegelĩĩle; kĩĩlĩ numukeepeelue yaani?”

²¹ ũYesu numuĩĩla, “Kanga ĩusiiile kwitũla mukamĩnkĩĩlũ, longola ugulie nutĩĩte, uapeele ĩatũka; ninduue ukitũla utĩĩte ĩkĩuto kwigyulu; kangĩ nzuu, ntiata.”

²² uMusumba pĩna nulũigia ulukaani luasio, nulongola nuusungu, kunsooko alutĩĩte inshao ningĩ.

Igilia ya ugolĩ

²³ Paapo ũYesu nuaĩĩla ĩamanigua aakue, “Tai namuĩĩla ikitũla ikakũ dũũ kumugolĩ kwiingĩla muutemi wa kwigyulu.

²⁴ Kangĩ namuĩĩla, ingĩ itontũ kungamĩa kwishelela munsungĩĩli ya lusinge kwikĩla umugolĩ kwiingĩla muutemi wa kĩNzua.”

²⁵ ĩAmanigua aakue pĩna naiigia, naakulĩlua zigizigi, naaũga, “Waani gua nusũũmile kwigũnĩka?”

²⁶ ũYesu nualaaa, nuaĩĩla, “Kuantu sika ishũũmĩkile, ĩpa kwa kĩNzua tũlũ ishũũmĩkile.”

²⁷ Paapo uPetelo nushookeelia numuĩĩla, “Laa gua, ishie kwalekile tũlũ yensi nukukukutiata; kukiligia yaani.”

²⁸ ũYesu nuaĩĩla, “Tai namuĩĩla, pĩna uMuana-muntu ukakikyalansa mũtyengu lya kĩtemi lya ukulu waakue muunkũmbigyulu naupia, inie naalĩ muntiatile, niniinie mukakikyalansa mumatengu makitemi na mikyumi namabĩlĩ, ĩmukuzilamula induuli kyumi nazibĩlĩ za ĩSilaeli.

²⁹ Wensi nwalekile ĩnumba, katia anũna nĩagũlĩ, katia shee nunina nĩaana, katia mĩgunda kunsooko ya liina liane, ikiligia nukwiongeeligua nkua gyana, nukwishaala uupanga wa kalĩ nakalĩ.

³⁰ Ĩpa iingĩ naa muandio ikitũla a mumalĩĩlio nĩa mumalĩĩlio ikitũla a muandio.”