Matayo 18 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Umania mumpoola za kĩniinupia

¹ iTyũngo liasio ĩamanigua aakue naamuagaana ũYesu, naaũga, “Waani namukulu muutemi wa kwigyulu.”

² Numuĩta umung'inia numuĩmĩkia pakatĩ yaao,

³ nuũga, “Tai namuĩĩla, kanga musiitipĩluka mutũle zĩ ang'inia, sika mukiingĩla kainiino muutemi wa kwigyulu.

⁴ Iio gua, wensi nukĩniinupagiaa zĩ umung'inia uyu, wayuyu mukulu muutemi wa kwigyulu.”

Usuguli mumpola za kuakũmpia naĩngĩ

⁵ “Wensi nwakumuanũnkula umung'inia umuĩ kĩna uyu kuliina liane unanũnkuĩle uneene.

⁶ Ĩpa wensi nwakumutimulia umuĩ wa ĩa naaniino naasuĩlĩĩle mumuane, taazu watũngĩĩligue lĩluala lya kushiela munkingo yaakue, wakapĩligue munsĩ ya nanza.

⁷ Ukĩa wa unkũmbigyulu kunsooko ya utimulia! Kutilĩ kawĩnegelo, ĩmagemua makuuzaa udũũ. Ĩpa ukĩa kumuakue umuntu nuasio nukuleetaa igyemua!

⁸ uMukono waako katia umugulu waako nawakutimulia, udumule uutage kulĩ ninduue; iiza nangũlũ kumuako kwiingĩla muupanga ĩumulema katia ĩwĩkĩtele, kwikĩla wĩĩ nĩmĩkono ĩbĩlĩ katia mĩgulu ĩbĩlĩ, nukwitaagua mumooto wa kalĩ nakalĩ.

⁹ Nĩliiso liako nalyakutimulia, lĩkuule, lĩtaage kulĩ ninduue; iiza nangũlũ kumuako kwiingĩla muupanga ĩwikyopo, kwikĩla wĩĩ nĩmiiso mabĩlĩ nukwitaagua muGehena ya mooto.”

Mpiani ya nkolo nĩlimĩlĩĩle

¹⁰ “Laaĩ, muleke kumumela umuĩ wa ĩa naaniino, kuitĩ namuĩĩla kĩna ĩamalaĩka aao kwigyulu ntondo zensi akuulaaa uusiu wa kĩTata waane nuĩlĩ kwigyulu.

¹¹ Kuitĩ uMuana-muntu alũjile kukukĩgũna nakĩlimĩlĩĩle.

¹² Ikitũla mbii, umuntu kanga ĩutĩĩte nkolo gyana, ĩmuĩ ĩlimĩĩle; sika ukakuzilekane nazĩ makumikyenda nikyenda munkonko, wende kukumĩdũũma nĩlimĩlĩĩle?

¹³ Kanga wamĩligie, tai namuĩĩla, ukumĩlumbĩĩlagiaa ĩĩ nangũlũ kwikĩla nazĩ makumi kyenda nikyenda nasika zilimĩlĩĩle.

¹⁴ Iio iioo uTata waani kwigyulu sika muloe nunumuĩ wa aniino ĩa alimĩĩle.”

Kĩna ijĩpĩĩle kukuatendela ĩatimulĩlani

¹⁵ “Numunũna waako kanga wakutimulĩle, lenda umusugule ue ninduzo ĩmwing'ene. Kanga wakũigie, wamuligagiaa kangĩ umunũna waako.

¹⁶ Kanga wasiite kukukũigia, sola muntu umuĩ katia abĩlĩ, itĩ kumĩlomo ya akuĩli abĩlĩ katia atatu lukaani luensi lukamĩnkĩĩligue.

¹⁷ Kanga wasiite kukuiigia nĩndĩo, ulĩĩĩle ikyanisa; kanga wasiite kukuliigia ikyanisa, wĩĩ zĩ ndugu nazĩngĩ numusanguliakoodi.”

Ukamantani wa ulompi

¹⁸ “Tai namuĩĩla, luensi namukakulugilia munansĩĩ, lwakondile kwigiligua kwigyulu; luensi namukakulugomba muna nsĩĩ, lwakondile kwigombigua kwigyulu.

¹⁹ Kangĩ namuĩĩla kĩna abĩlĩ aani naikikamantana munansĩĩ mulukaani luensi naĩkakululompa, ikitendelua nuTata waane nwa kwigyulu.

²⁰ Kuitĩ naabĩlĩ katia naatatu pĩna ĩlundĩlĩĩle kuliina liane, nineene nkolĩ paapo pakatĩ yaao.”

Munaijĩpĩĩle kukumulekela umuntu, nĩmpiani ya munamulĩmo namubĩĩ

²¹ Paapo uPetelo pĩna numuagaana, numuĩĩla, “Shekulu, umunũna waane wantimulĩĩle kanga, numulekele; sunga nkua mupũngatĩne?”

²² ũYesu numushookeelia, “Sikanukukuĩĩla sunga mupũngatĩ, ĩpa sunga makumi mupũngatĩ nkua mupũngatĩ.

²³ Kuluulo uutemi wa kwigyulu wĩpianile numutemi umuĩ naluaĩĩlĩĩle ĩĩtumi aakue apũnie iyalo.

²⁴ Pĩna nuandia kwiala, nuleetelua umuĩ waao naalulĩĩle ĩmpaa magana manzogũ kyumi ma talanta.

²⁵ “Pĩna nuulia ya kulĩpa, ũshekulu waakue nulagĩĩlia waguligue, uzo numusungu waakue nĩaana aakue, nĩnayensi naalutĩĩte, ĩmpaa ĩlĩpue.

²⁶ Iio gua umwĩtumi nuasio nugua pamuakue, numupeepia, nuũga, ‘Shekulu ungigimĩlie, nĩkakukulĩpa tũlũ zensi.’

²⁷ ũshekulu waakue numukolelua kĩsuusu numutũnguĩla, numulekela ĩmpaa.

²⁸ Ĩpa umwĩtumi nuasio nupũna numuona umwĩtumi muua naalulĩĩle ĩmpaa ya shilinge gyana kumuakue; numuguĩla, numugoga, nuũga, ‘Lĩpa naalulĩĩle!’

²⁹ Iio umwĩtumi nuasio nutũngama pamĩgulu yaakue, numupeepia, nuũga, ‘Ungigimĩlie, nĩkakukulĩpa tũlũ zensi.’

³⁰ Nduyo nusiita, nuenda numugumĩla mukĩtũngo sunga wamĩlĩpe ĩmpaa niasio.

³¹ Iio gua, ĩĩtumi ĩĩa pĩna naaziona naalĩ zitendekile, naĩsũsũmĩkia, naenda naamulondooselia ũshekulu waao zensi naalĩ zitendekile.

³² Paapo ũshekulu waakue numuĩta, numuĩĩla, ‘Umwĩtumi mubĩĩ ue!’ Alĩ nukulekĩĩle ĩmpaa niasio yensi pĩna numpeepia;

³³ aue gua, sika aza yukũjĩpĩĩlene kukumukolelua kĩnishungu umĩaako, kĩna ĩne naalĩ nukukolĩĩlue kĩnishungu ue?

³⁴ ũShekulu waakue nutaka, numutuala kuatũngani sunga pĩna ukakumĩlĩpa ĩmpaa yaakue yensi.

³⁵ Iio-iioo nuTata waane nwa kwigyulu ukakumutendela inie, malĩĩ ĩsika mulekĩĩle kunkolo zaani muntu wensi umunũna waakue.”