Matayo 17 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwikaĩlĩka ikyelu

¹ Pĩna nazikĩla ntondo mutandatu, ũYesu nuasola palumuĩ nduyo uPetelo nuYakobo nuYohana umunũna waakue, nuatuala munkonko nandĩĩpũ ing'ene.

² Nukaĩlĩka ikyelu liakue ntongela yaao, nuusiu waakue naweela zĩmpasu, ni ntiila zaakue nazitũla nzelu zĩ weelu.

³ Laaa, naigyeleelua nuMusa nuElia naĩĩ kĩtambuĩla nduyo.

⁴ uPetelo nushookeelia numuĩĩla ũYesu, “Shekulu, iizaa ishie nakwĩĩpa. Malĩĩ umuloe, nĩkakupijenga pigyũnda pitatu ĩpa, kamuĩ kaako, kamuĩ kakĩMusa, kamuĩ ka kĩElia.”

⁵ Pĩna alĩ kĩlĩ witambula, ilyũnde lielu nalĩakũnĩkĩla; laaa, luli nalupũna mwilyũnde naluũga, “Uyu wayu Muana waane muloogua, nanumuloeeligue ninduyo; mũigiĩ umuene.”

⁶ Pĩna ĩamanigua naiigia, nagua pansĩ, naoopoka pũũ.

⁷ ũYesu nuuza, nuauukia, nuũga, “Ĩĩmĩkĩ, mulekioopooka.”

⁸ Pĩna naanansula ĩmiiso maao, sika naaona kamuntu, ĩpa ũYesu wing'ene dũũ.

⁹ Pĩna alĩ itima munkonko, ũYesu nualagĩĩlia, nuũga, “Muleke kumuĩĩla kamuntu aza naaza mwamaonaa, sunga pĩna uMuana-muntu ukiiiuka kwipũna muakiu.”

¹⁰ ĩAmanigua aakue naamukolia, naaũga, “Nĩkĩ ĩalangi akuũgaa, ‘Yumũjĩpĩĩle uElia waaze tangua?’

¹¹ ũYesu nushookeelia, nuaĩĩla, ‘Tai uElia upolokile, nduyo ukijĩpĩĩlia tũlũ;

¹² ĩpa namuĩĩla gua, uElia wakondile kwiiiza, sika naamulĩnga, ĩpa naamutendela yensi kĩna alĩ asiile. Iio-iioo nuMuana-muntu ukiaagigua ndĩo.’”

¹³ Paapo ĩamanigua naalĩnga kĩna ukuaĩĩla impola za kĩYohana Mubadĩĩzia.

Musumbatĩ munalĩsĩĩmuĩ wikamigua.

¹⁴ Pĩna naalĩpikĩĩla iyũmbĩ, muntu numuagaana, nutũngama pamuakue, nuũga,

¹⁵ “Shekulu, umukolelue kĩnishungu umuana waane, kunsooko muguankolo, nukwiaagigua ibĩĩ; nkua ningĩ ukuguĩlaa mumooto kangĩ nkua ningĩ mumaazĩ.

¹⁶ Aza numuleetile kuamanigua aako, sika asũũma kukumukamia.”

¹⁷ ũYesu nushookeelia, nuũga, “Kaaa, wĩleli nasika ukusuĩĩlaa, kangĩ wa uleki! Sunga nalĩ nĩĩ niniinie? Sunga nalĩ nĩkakĩuumĩĩlia niniinie? Muleetĩ kunu.”

¹⁸ ũYesu nulĩtakĩla; ĩlĩsĩĩmuĩ nalĩpũna, numusumbatĩ nukamia lĩĩlo tyũngo.

¹⁹ Pembele ĩamanigua naamuagaana ũYesu ing'ene, naamukolia. Nĩkĩ ishie sika kwa sũũma kukulĩĩnga?

²⁰ ũYesu nuaĩĩla, “Kunsooko ya uniino wa usuĩĩli waani.” Tai, namuĩĩla, kanga ĩmutĩĩte usuĩĩli zĩ kapeke ka mbeu ya haladali, mukumĩĩĩla ĩnkonko ĩĩ, “Lega ĩpa wende uko, ndĩo ilega kutilĩ nasika lũshũũmĩka kumiani.”

²¹ Ĩpa ĩlĩsĩĩmuĩ lya mpiani ĩĩ sika lishũũma kwipũna isiititũla kuulompi nukwilaalĩla.

Ukũnukuli wa kabĩlĩ wa nkia yaakue ũYesu

²² Pĩna alĩ ipilima-pilimaa kũGalilaya. ũYesu nuaĩĩla, “uMuana-muntu ulonguile kwiĩĩkĩlua mumĩkono ya antu,

²³ nĩndĩo ĩkakumuulaga; nulutondo lwa katatu ukiiiuka.” Naĩsũsũmĩkia.

ũYesu wilĩpa ĩkoodi ya Numba ya kĩNzua

²⁴ Pĩna naapika kuKapelinaũmũ, ĩasangulia a nũsũshekeli naamuagaana uPetelo, naaũga, “Mumania waani sikukulĩpaane ĩkoodi ĩĩ.” Nuũga, “Ukulĩpaa.”

²⁵ Nduyo pĩna nũingĩla munumba, ũYesu nutongela kukumukolia, nuũga, “Ue Simoni, usĩĩgileeii; ĩatemi a nsĩĩ akusangulagiaa kuaani ĩkoodi, kwipũma kuana aao katia kuagenda.”

²⁶ Pĩna nuũga, “Kuagenda,” ũYesu numuĩĩla, “Malĩĩ ĩiio, ĩaana ingĩ akolelua.

²⁷ Ĩpa koona kuleke kuakũmpia, lenda kunanza ugumĩle ĩndoana, umĩsole ĩnsiĩ nĩkakigyelela umuandio, nĩpĩna wamĩansamula umulomo waakue, ukiona shekeli muumo; mĩsole, uapeele kunsooko yaane nukunsooko yaako.”