Matayo 16 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu wishiita ilyompi lya kĩlĩngasĩĩlio

¹ ĩApalisayo nĩ Asadukayo naamuagaana, naaa kumugema, naamulompa waalagĩĩle kĩlĩngasĩĩlio nakĩpũnile kwigyulu.

² Nushookeelia, nuaĩĩla, “Nawiile namuũga, ‘Mudaau ukaa yeelu, kunsooko igyulu ingĩ kyasũkũ.’

³ Nĩdaau namuũgaa, ‘Nantende ukaa mbũla ya nzega, kunsooko malũnde ingĩ miilu kangĩ malũto.’ Muĩzĩ kwilĩnga uusiu wigyulu, ĩpa iilĩngasĩĩlio ya ntondo izi sika musũũmile kukuilĩnga.

⁴ Wĩleli naubĩĩ wa ogololia widũũma kĩlĩngasĩĩlio, ĩpa sika ukipeegua kakĩlĩngasĩĩlio isiititũla ĩkĩlĩngasĩĩlio kya kiYona.” Nualeka nulongola.

ũYesu ukuutakĩla uusiitilĩnga wa amanigua

⁵ ĩAmanigua aakue naenda kwityumbĩ naĩĩwa kwishola ĩmapũli.

⁶ ũYesu nuaĩĩla, “Ĩlaaĩkiĩ, ĩkendegeelĩ nĩngaasio ya Apalisayo nĩ Asadukayo.”

⁷ Naĩĩ kĩkunguma eene kueene, naaũga, “Ingĩ kunsooko sika aza kusolile ĩmapũli.”

⁸ ũYesu nulĩnga, nuaĩĩla, “Inie namwa usuĩĩli uniino, nĩkĩ mukĩkunguma niinie kuniinie kĩna muagila kamapũli.

⁹ Sika mwalalĩngane. Sunga sika mũjukilene ĩmapũli namataano kuantu naalĩ ĩmagana ma nzogũ matano, kangĩ itooto iinga naalĩ mũjuilie?

¹⁰ Sunga ĩmapũli namupũngatĩ kuantu naalĩ ĩmagana ma nzogũ manĩĩ, kangĩ matooto manga naalĩ mumijuilie?

¹¹ Sika mwalĩnga mbii ya kĩna sika ntambuĩle mpola za mapũli. Ĩkendegeelĩ nĩngaasio ya Apalisayo nĩAsadukayo.”

¹² Paapo naalĩnga kĩna sika alĩ waaĩĩlĩĩle ĩkendegeele nĩngaasio ya mapũli, ĩpa nuumania wa Apalisayo nĩ Asadukayo.

UKũmuuli wa kĩPetelo kĩna ũYesu ingĩ Kilisito

¹³ ũYesu pĩna nupika kunandĩ za Kaisalia ya Pilipi, nuakolia iamanigua aakue, nuũga, “ĩAntu akuũgaa uMuana-muntu muene waani?”

¹⁴ Naaũga, “ĩĨĩa akuũgaa, Yohana Mubadĩĩzia; ĩĩĩa naaũga, Elia; ĩĩĩa, Yelemia katia umuĩ wa anakĩdagu.”

¹⁵ Nuaĩĩla, “Ainie mukuũgaa neene wani?”

¹⁶ uSimoni Petelo numushookeelia, nuũga, “Ue uue Kilisito, Muana wa kĩNzua namupanga.”

¹⁷ ũYesu nushookeelia, numuĩĩla, “Umukembetue Simoni shiYona, kuitĩ sika ĩnama nĩmĩgali nazukukũnukulĩĩle izi, ĩpa uTata waane nwa kwigyulu.

¹⁸ Nineene nakuĩĩla, Ue uue Petelo, numukiania ipyampa ĩlĩ nikijenga ikyanisa liane, sunga ingũlũ za ukiu sika zĩkakĩlĩdula.

¹⁹ Nĩkakukupeela ĩmigyuilo ma utemi wa kwigyulu; luensi nukakulugilia muna nsĩĩ, lwakondile kwigiligua kwigyulu; luesi nukakulugomba muna nsĩĩ, lwakondile kwigoombigua kwigyulu.

²⁰ Paapo nuagilia ĩmaniigua aakue aleke kumuĩĩla umuntu wensi kĩna uyo muene Kilisito.”

ũYesu wikũnukula kĩna ukikia nukwiiiuka

²¹ Kwipũna paapo ũYesu nuandia kukualĩngia ĩamanigua aakue kĩna yumũjĩpĩĩle kwienda kũYelusalemũ, kũligia waagi wingĩ kuanampala nĩapolia naakulu nĩalangi, nukwiulagua, nulutondo lwa katatu kwiiiuka.

²² uPetelo numusola, nuandia kukumutakĩla, nuũga, “Taagi yaasio; Shekulu, izi zileke kukuagaana!”

²³ Nupĩluka, numuĩĩla uPetelo, “Lenda uko ue Shetani! Ue ukĩnkũpa kumuane; kuitĩ sika wishĩĩga ĩza kĩNzua, ĩpa ĩza kĩuntu udũũ.”

Wĩĩtua wa kĩiima

²⁴ Paapo ũYesu nuaĩĩla ĩamanigua akue, “Wensi nusiile kwintiata ĩne, nwĩiime ĩmakue, waukenke umusalaba waakue, wantiate ĩne.

²⁵ Kuitĩ wensi nusiiile kwigũna uumĩ waakue ukakuulimĩĩlia, ĩpa wensi nwakuulimĩĩlia uumĩ waakue kunsooko yaane ukakuuligia.

²⁶ uMuntu ukishaĩpigua kĩ, kanga wauligie uunkũmbigyulu sue nukwikapĩka uumĩ wakue? Katia umuntu ukikomolelia kiani uumi waakue?

²⁷ Kuitĩ uMuana-muntu wijile muukulu wa kĩTata wakue palumuĩ nĩamalaĩka aakue; paapo ukakumulĩpa wensi mũlika lya utendi waakue.

²⁸ Tai namuĩĩla, naĩĩmĩkile ĩpa, akoolĩ naĩngĩ nasika ikilũla kaukiu, sunga amuone uMuana-muntu wijile muutemi waakue.”