Matayo 15 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu wishookeelia ishokio lya kusiitikendegeela intendo za anampala

¹ Paapo ĩalangi nĩApalisayo kwipũna kũYelusalemũ naamuagaana ũYesu, naaũga,

² “Nĩkĩ ĩamanigua aako akuzitimulĩlaa intendo za anampala? Kunsooko sika akukalalaa ĩmĩkono pĩna aakiilĩa.”

³ Nuashookeelia, nuaĩĩla, “Nĩkĩ niniinie mukulĩtimulĩlaa ilyagĩĩlio lya kĩNzua kuntendo zaani?

⁴ Kuitĩ uNzua nuũga, ‘Mukulie utata waako numaau waako; kangĩ nwakumutuka ũshee katia nina, kwikia, nwakie.’

⁵ Ĩpa inie mukuũgaa gua, ‘Nukumuĩĩla ũshee katia nina. Kiensi naaza kinjĩpĩĩle kukumualĩĩlia inie kiazaa kya kwa kĩNzua,

⁶ iio gua, nwaleke kumukulia ũshee katia nina. Namuloononeelia ulukaani lwa kĩNzua kuntendo zaani.’

⁷ Inie neene inie namuanamampĩlu! Kaa luulo uYesaya alupũnĩĩlie uunakĩdagu kumiani, nuũga,

⁸ ‘ĩAntu ĩa akunkulagiaa kumĩlomo yaao, ĩpa inkolo zaao zĩĩlĩ kulĩ nineene.

⁹ Akĩntekelaa nakanda, Naimania uumanigua wa malagĩĩlio ma antu.’”

¹⁰ Nuĩĩta ĩantu nuaĩĩla, “Tegeelĩ nukũlĩnga,

¹¹ nakyukũingĩlaa mumulomo sika kĩĩkio nakyukumudobagiaa umuntu; ingĩ nakyukupũna mumulomo, kĩĩkio nakyukumudobagiaa umuntu.”

¹² Paapo ĩamanigua naamuagaana, naamuĩĩla, “Umanilene kĩna ĩApalisayo aza aĩĩpĩlaguaa pĩna iigia ulukaani luasio?”

¹³ Nushookeeliaa, nuũga, “Yensi nayĩliĩĩle nasika ipandĩlue nuTata waane nwa kwigyulu ikikuulua.

¹⁴ Alekĩ iio, ĩasio ingĩ atongeeli naapokũ a apokũ. Numupokũ kanga wamutongeele umupokũ muua, tũlũ naabĩlĩ iguĩla mwilyĩndĩ.”

¹⁵ uPetelo numushookeelia, numuĩĩla, “Ukulondoosie ĩmpiani ĩĩ.”

¹⁶ Nduyo nuũga, “Sunga nunzuauu sika mwalalĩngane?

¹⁷ Sika mulĩngilene kĩna kiensi nakyukũingĩlaa mumulomo kyukukĩlaa mundaa, nakĩtaagua kũbyaala?

¹⁸ Ĩpa nayukupũnaa mumulomo yukupũnaa munkolo, yaasio iio yukumudobagiaa umuntu.

¹⁹ Kunsooko munkolo makupũnaa masĩĩgo mabĩĩ, uulagi, ugololia, usambo, wii, ukuĩli wa ulongo, ituki;

²⁰ ii yoi nayukumudobagiaa umuntu. Ĩpa kwilĩa namĩkono nasika mĩkalaligue sika yukumudobagiaa umuntu.”

Munanso wa ndugu yĩngĩ wikamigua

²¹ ũYesu nulega paasio, nuenda nandĩ za Tilo nĩSidoni.

²² Kuasio nwigyela musungu muKananayo, numwĩtuntĩĩla, nuũga, “Unkolelue kĩnishungu, Shekulu, Muana wa kĩDaudi; umunanso waane mũingĩĩlue dũũ nĩlĩsĩĩmuĩ!”

²³ Nduyo sika numushookeelia kalukaani. ĩAmanigua naamuagaana, naamulompa, naaũga, “Muĩĩle washooke waleke kukuzogolelia.”

²⁴ Nushookeelia, nuũga, “Alĩ numutumue kunkolo nazilimĩlĩĩle ĩza numba ya ĩSilaeli udũũ.”

²⁵ Nduzo nuuza, nutũngama pamuakue, nuũga, “Shekulu unzalĩĩlie!”

²⁶ Nushookeelia, nuũga, “Sika iiza kukuusola uugalĩ wa aana nukukuzigumĩla imbua.”

²⁷ Nuũga, “Eeze Shekulu, ĩpa gua, sunga imbua zukumalĩla ĩmaminangulua namakugua pameeza ya ishekulu aao.”

²⁸ Paapo ũYesu nushookeelia, numuĩĩla, “Maau, uusuĩĩli waako ukulu! Nayĩĩ iio kĩna usiiile.” Numunanso waakue nukamia kwipũna lĩĩlo tyũngo.

Iingĩ ikamigua

²⁹ ũYesu nulega kuasio, nupika pananza ya Galĩlaya. Nunankĩla munkonko, nwikyalansa kuuko.

³⁰ Namamuagaana maũmbĩ mingĩ, naamuleetela pamĩgulu yaakue ĩanakĩtele, apokũ anakĩmũũmĩ, alema nĩnaĩngĩ iingĩ; nuakamia.

³¹ Sunga iyũmbĩ nalĩkulĩlua, pĩna nalĩona ĩanakĩmũũmĩ itambula, nĩalema akamagiaa, nĩanakĩtele igenda, nĩapokũ iona, naamukulia uNzua wa ĩSilaeli.

Kukualĩĩsia antu 4000

³² ũYesu nuĩĩta ĩamanigua aakue, nuũga, “Nalĩonelaa kĩnishungu iyũmbĩ kunsooko zaazaa intondo zitatu ikyalile palumuĩ nineene, agila kandia. Sika numuloe alongole alaalĩĩle, ikigua naweesa munzĩla.”

³³ ĩAmanigua aakue naamuĩĩla, “Kuligĩlie mpĩĩ mapũli namingĩ munu muna mbuga, sunga kulĩĩsie iyũmbĩ nikyulu kĩna ĩlĩ?”

³⁴ ũYesu nuaĩĩla, “Mutĩĩte mapũli manga?” Naaũga, “Mupũngatĩ, nipishiĩ pikeei.”

³⁵ Numalagĩĩlia ĩmaũmbĩ mikyalanse pansĩ.

³⁶ Numasola ĩmapũli nama mupũngatĩ nipishiĩ, nusongelia, numaega, nuapeela ĩamanigua aakue, ĩamanigua naalĩpeela iyũmbĩ.

³⁷ Naalĩa ensi naikyuta; naamasoleela ĩmaminangulua naalĩ masaagile, naijulia ĩmatooto mupũngatĩ.

³⁸ Ndĩo naalĩ alĩĩle alĩ agoosia magana ma nzogũ manĩĩ kwileka ĩakĩĩma nĩaana.

³⁹ Numalaga ĩmaũmbĩ, nunankĩla mwipyango, nuenda kunandĩ za Magadani.