Matayo 14 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwiulagua kwa kĩYohana Mubadĩĩzĩa

¹ Pantondo zaasio umutemi Helode pĩna nũigia impola za kĩYesu, nuaĩĩla ĩĩtumi aakue,

² “Uyu wayu Yohana Mubadĩĩzia, wiiukaa kwipũna muakiu; luulo ingũlũ izi zaakĩtuma munsĩ yaakue.”

³ Kunsooko uHelode alĩ wamuguĩlile uYohana numutũnga, numugumĩla mukĩtũngo, kunsooko ya kĩHelodia, umusungu wa kĩPilipo umunũna waakue.

⁴ Kunsooko uYohana alumuĩĩlĩĩle, “Mũiko kumuako kukumutoola unuasio.”

⁵ Pĩna nusiia kukumuulaga, nwĩoopooka ĩantu, kunsooko alĩ aoonie kĩna alĩ munakĩdagu.

⁶ Pĩna nalupika ulutondo nalukulu lwa kulelua kumuakue uHelode, umunanso wa kĩHelodia alĩ wiina ntongela ya antu, numuloeelia uHelode.

⁷ Paapo nupũnia ilyago nukwilapa ukakumupeela kiensi nukakukĩlompa.

⁸ Kuupambua shala nunina, nuũga, “Mpeela ityũelya kĩYohana Mubadĩĩzia muna kĩsela.”

⁹ uMutemi nuĩ nuusungu, ĩpa kunsooko ilyapo liakue, nukunsooko ya aasio naalĩ ikyalansile nduzo pandia, nulagĩĩlia wapeegue;

¹⁰ nutuma muntu, numudumula ityũe uYohana mukĩtũngo.

¹¹ ityũe liakue nalĩleetua mukĩsela, nupeegua umunanso, numutualĩla unina.

¹² ĩamanigua aakue naenda naausola umuĩlĩ waakue, naauĩĩka, naenda namuĩĩla ũYesu impola zaasio.

Kukualĩĩsia antu 5000

¹³ ũYesu pĩna nũigia izi, nulega kuasio nipyango, nwĩũna wing'ene kuutuulũ pĩna kutilĩ kaantu. Nĩmaũmbĩ pĩna namiigia, namapilima ĩnanza namĩgulu kwipũna kukaa zaao.

¹⁴ ũYesu pĩna nupika kũtyumbĩ nulĩona iyũmbĩ kyulu, nuakolelua kĩnishungu, nuakamia ĩaluĩle aao.

¹⁵ Pĩna niĩ mpĩndĩ ĩamanigua aakue naamuagaana naaũga, “Ĩpa mbuga ntilĩ, nuutiku wiilaa; Malage ĩmaũmbĩ malongole kũishaalĩ, ĩgulĩlie india.”

¹⁶ Paapo ũYesu nuaĩĩla, “Yaa kĩ kwienda kũishaalĩ; apeelĩ uniinie india.”

¹⁷ Paapo naamushookeeli, “Kuagila kakĩntu, isiititũla ĩmapũli mataano ninshiĩ zibĩlĩ.”

¹⁸ Nuuaĩĩla, “Ndeetelĩ.”

¹⁹ Numalagĩĩla ĩmaũmbĩ mikyalanse pamasanzĩ, numasola ĩmapũli namataano ninshiĩ nazibĩlĩ, nulangamĩla kwigyulu, numakembeta, numaega ĩmapũli, nuapeela ĩamanigua aakue, nĩamanigua naamapeela ĩmaũmbĩ.

²⁰ Naalĩa tũlũ ensi, naikyuta. Naapisholeela ipiminangulua naalĩ pishaagile, naijulia itooto kyumi naibĩlĩ.

²¹ Naalĩ alĩĩle alĩ zĩ agoosia magana manzogũ mataano, kwileka ĩakĩĩma nĩaana.

ũYesu wigenda munanza

²² Ĩkamuĩ ũYesu nuakangasĩĩlĩa ĩamanigua aakue ingĩle mwipyango atongele kwityumbĩ, pĩna uzo alukumalaga ĩmaũmbĩ.

²³ Pĩna numalaga ĩmaũmbĩ nunankĩla munkonko wing'ene, wendilompa. Pĩna niĩ mpĩndĩ alĩ wĩkuuko wing'ene.

²⁴ Nipyango pĩna alĩ liĩlĩ pakatĩ ya nanza naliiunguigua nĩmaĩngo, kuitĩ ĩnzega alĩpũnĩlĩĩle kuntongela.

²⁵ Mũgyĩngu ũYesu nuaagaana, wigenda mukiania ya nanza.

²⁶ ĩAmanigua pĩna naamuona wigenda mukiania ya nanza, naatunduala, naaũga, “Muntũnga!” Naakuuta kuooa.

²⁷ Ĩkamuĩ nuatambulia, nuũga, “Kamiĩ nkolo ingĩ neene, lekioopokĩ!”

²⁸ uPetelo numushookeelia, nuũga, “Shekulu, malĩĩ ĩuue, ndagĩĩlia nĩĩze kumuako mukiania ya maazĩ.”

²⁹ Nuũga, “Nzuu!” uPetelo nũika mũpyango, nugenda mukiania ya maazĩ, wamuagaane ũYesu;

³⁰ Pĩna numĩona ĩnzega, noopooka, nuandia kwisheketela, nukuuta, nuũga, “Shekulu, ngũna!”

³¹ Ĩkamuĩ ũYesu nuambĩĩlĩa umukono waakue, numũtyapa, numuĩĩla, “Ue nwa usuĩĩli uniino, nĩkĩ watũla ninkankani?”

³² Pĩna naingĩla mũpyango, ĩnzega nĩtuula.

³³ Ndĩo naalĩ ĩĩlĩ mũpyango naatũngama pamuakue, naaũga. Tai-taaii, ue uue wĩMuana wa kĩNzua.

³⁴ Pĩna naapũũta, naapika kunsĩĩ ya Genesaleti.

³⁵ Nĩantu a paasio pĩna naamumana, naatuma ĩantu tũlũ pensi munsĩĩ niasio, naamuleetela tũlũ ensi naalĩ aluĩle,

³⁶ naamupeepia alĩapaatie udũũ ishogolo lya ntiila yaakue; ensi naalĩ alĩpaatilie naakamigua.