Matayo 13 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mpiani ya muminzi

¹ Luulo lutondo ũYesu nupũna munumba nwikyalansa pananza.

² Maũmbĩ mingĩ namamulundĩkĩĩla; luulo nunankĩla mwipyango, nwikyalansa; umulundo wensi nawĩĩmĩka pityumbĩ.

³ Nuapũnĩlia mpiani ningĩ, nuũnga, “Muminzi alupũnile wende kwiminza.

⁴ Pĩna alĩ wiminza, imbeu injia nazigua panzĩla, inoni nazĩĩza nazizilĩa.

⁵ iNjia nazigua mwipyampa pĩna kutilĩ kamasalu namingĩ; ĩkamuĩ nazilia kuitĩ masalu alĩ makeei.

⁶ Pĩna ĩmpasu nĩlĩla, nazigũnda kunsooko ngila kamĩli, nazuuma.

⁷ iNjia nazigũĩla mumiigia, nĩmiigia namakula, namazishopa.

⁸ iNjia naziguĩla mumasalu namaaza, nazipĩa, injia gyana, injia makumi mutandatu, injia makumi matatu.

⁹ Nutĩĩte ĩakutuĩ nũige.”

Nsooko ya kutambula impiani

¹⁰ iAmanigua naaaza, naamuĩĩla; “Nĩkĩ witambula ndĩo kuung'enua?”

¹¹ Nushookeelia, nuũga, “Inie mwapĩĩlue kukuulĩnga unkũnkũ wa utemi wa kwigyulu, ĩpa ĩo sika apeegue.

¹² Kuitĩ wensi nutĩĩte ĩkĩntu ukiongeleligua ndee, kangĩ wensi namugila kakĩntu, sunga kĩĩkio nutĩĩte ukinamantulua.

¹³ Yoĩ nsooko gua nitambula ndĩo kumpiani, kunsooko naalaaa, sika iona; nĩpĩna igyũlia, sika akigyũlia nukwilĩnga.

¹⁴ Nukumiao uunakĩdagu wa kĩYesaya witimĩĩligua nauũgile, ‘Kukigyũlia mukakigyũlia tai, ĩpa sika mukilĩnga niyaani-yaani; kwilaaa mukilaa tai, ĩpa sika mukiona niyaani-yaani.

¹⁵ Kuitĩ inkolo za antu ĩa zakapũkile Nĩakĩtuĩ aao sika akigyũlagiaa kĩĩsa. nĩmiiso maao amatũtilie dii; Koona alekiona kumiiso maao Aleke kigyũlia kuakĩtuĩ aao, Alekilĩnga kunkolo zaao, Apĩluke, nĩakamie.’

¹⁶ “Ĩpa makembetue ĩmiiso maani, kuitĩ makuonaa; nĩakutuĩ aani, kuitĩ akũigagiaa.

¹⁷ Tai namuĩĩla. ĩAnakĩdagu nĩanakulukuuluu iingĩ alĩ atĩĩte nsula kwiona namukumaona inie, sika naamaona; nukwiiigia namukuziigia inie, sika naaiigia.”

Ndogolelio ya mpiani ya muminzi

¹⁸ “Inie, tegeelĩ gua, ĩmpiani ya muminzi.

¹⁹ Wensi nukulũigagiaa ulukaani lwa utemi walekilĩnga, ukuuzaa umubĩĩ nulupũla naluminzue munkolo yaakue; izi zozi naalĩ minzue panzĩla.

²⁰ Ndizo naalĩ minzue pipyampa, uyu wayu nukulũigagiaa ulukaani, nuluanũnkula ĩkamuĩ kuulumbi;

²¹ Kusinaga mugila kamĩli munsĩ yaakue, ukikyalaa ntondo nkeei, pĩna impatĩ zigyela katia nzago kunsooko ya lukaani, ĩkamuĩ nwĩkũmpia.

²² Ndizo naalĩ minzue mumiigia, uyu wayu nukulũigagiaa ulukaani; nuukunkunali wa unkũmbigyulu, nuupembeeligua wa ugolĩ naulusopa ulukaani, sika nalupĩa.

²³ Ndizo naalĩ minzue mumasalu namaaza, uyu wayu nukulũigagiaa ulukaani nukukululĩnga; uyu wayu ukupĩaa inkali, umuua gyana, umuua makumi mutandatu, umuua makumi matatu.”

Mpiani ya ngugu

²⁴ Nuapũnĩlia nĩmpiani nzĩa, nuũga, “uUtemi wa kwigyulu wĩpianile numuntu naaluminzile imbeu nanziiza mumugunda waakue;

²⁵ pĩna ĩantu naagona indoolo, nuuza umulugu waakue numinza ingugu pakatĩ ya upemba, nulongola.

²⁶ Pĩna upemba naulia nukwitula, nazigyelela ningugu.

²⁷ ĩĨtumi a mukola mugunda naamuagana, naamuĩĩla, ‘Shekulu, sika aluminzilene imbeu nanziiza mumugunda waako?’ Waligĩlia mpĩĩ gua, ingugu.

²⁸ Nuaĩĩla, ‘Mulugu muene alutendile itĩ.’ ĩĨtumi naamuĩĩla, ‘Usiiilene gua, kuende kukuziilingĩĩla.’

²⁹ Nuũga, ‘Zũi,’ pĩna ukaa mukuziilingĩĩla ingugu, ‘Katia mwikuulĩĩlia nuupemba.

³⁰ Lekĩ yensi ikule palumuĩ sunga pamaogola. Nĩpamaogola nĩkakuaĩĩla ĩaogoli, ziilingĩĩlĩ tangua ingugu makũnkũ makũnkũ, muzishonse; ĩpa uupemba muutaagĩle mũshagĩ liane.’”

Mpiani za kabeu ka haladali

³¹ Nuapũnĩlia nĩmpiani nzĩa, nuũga, “uUtemi wa kwigyulu wĩpianile nĩkapeke ka haladali, naalukasolile umuntu nukapandĩla mumugunda waakue;

³² Nindĩko kaniino kwikĩla imbeu zensi. Ĩpa pĩna nakakula nalĩtũla kyulu kwikĩla inani zensi; nalĩtũla kyota, sunga inoni za mukiania zukutũliishũũpĩlia muntambĩ zaakue.”

³³ Nuaĩĩla mpiani nĩnzĩa, “uUtemi wa kwigyulu wĩpianile niigaĩ naalũisholile umusungu nũishalĩnkania munungu zitatu za mũyuuuli, sunga umũyuuli wensi naugaasigua.”

³⁴ Izi zensi ũYesu alumaĩĩlĩĩle ĩmaũmbĩ mumpiani; sika alukuaĩĩla kalukaani isititũla kunzĩla ya mpiani;

³⁵ itĩ nalukondeeleka ulukaani naalĩ lutambulue numunakĩdagu, “Nikimũmuula umulomo waane mumpiani, Nikidunduula naalĩ mpisigue kwipũna iyuukĩ ĩkalĩ.”

Ndogolelio ya mpiani ya ngugu

³⁶ Paapo ũYesu numaleka ĩmaũmbĩ nũingĩla munumba ĩamanigua aakue naamuagaana, naaũga, “Ukulĩngie ĩmpiani ya ngugu za mugunda.”

³⁷ Nushookelia, nuũga, “Nukuziminzaa imbeu nanziiza ingĩ uMuana-muntu;

³⁸ uMugunda ingĩ uunkũmbigyulu. Nimbeu nanziiza ingĩ ĩaana autemi, ningugu ingĩ ĩaana a mubĩĩ,

³⁹ Numulugu naaluziminzile ingugu ingĩ ũShetani, nĩmaogola ingĩ ĩmpelo ya unkũmbigyulu, nĩaogoli ingĩ ĩamalaĩka.

⁴⁰ Iio gua, kĩna ingugu nazukuilingĩĩlaguaa nukwishonsua mumooto, iio ikitũla pampelo ya unkũmbigyulu.

⁴¹ uMuana-muntu ukakuatuma ĩamalaĩka aakue, ndĩo ikiilingĩĩla kwipũna muutemi waakue inkũmpa yensi nĩatenda mabĩĩ tũlũ,

⁴² nukukuagumĩla mulyuli lya mooto; kuasio ikitũla kĩlĩlo nukwikelia ĩmiino.

⁴³ Paapo ĩanakulukuuluu ikieeelia zĩ mpasu muutemi wa kĩTata waao. Nutĩĩte ĩakutuĩ nũigie.”

mpiani ya lũũlũ, ya kĩuto ĩkya ngele nkakũ, nijũĩlo

⁴⁴ “Kangĩ uutemi wa kwigyulu wĩpianile nĩkĩuto kya ngele nkakũ naalĩ kĩpisigue mumugunda; umuntu pĩna nukĩona nukĩtinĩĩla, nuuenda kuulumbi, nũigulia yensi naaluitĩĩte, nuugula umugunda nuasio.

⁴⁵ “Kangĩ uutemi wa kwigyulu wĩpianile numugulia, nukudũũmaa ĩnsanga ya lũũlũ nanziiza.

⁴⁶ Pĩna numĩona ĩlũũlũ ĩmuĩ nya uguli ukakũ, nuenda nũigulia yensi naalutĩĩte, numĩgula.

⁴⁷ Kangĩ uutemi wa kwigyulu wĩpianile nijũĩlo naligyumĩlue munanza, naliingĩlia nsiĩ zikyelu liensi.

⁴⁸ Pĩna nalijula, naalĩpũnia, naikyalansa, naazisholania nanziiza mũisheme, nambĩĩ naazitaaga kulĩ.

⁴⁹ Iio ikitũla pampelo ya unkũmbigyulu. ĩAmalaĩka ikiiza nukukuasolania ĩabĩĩ muanakulukuuluu,

⁵⁰ nukukuagumĩla mulyuli lya mooto. Kuasio ikitũla kĩlĩlo nukwikelia ĩmiino.

⁵¹ “Mwalĩngane izi zensi.” Naamushookeelia. “Eeze.”

⁵² Nuaĩĩla, “Kunsooko ĩĩ mulangi wensi namumanigue uutemi wa kwigyulu, wĩpianile numukola numba nukupũnagiaa mukĩuto kiakue naipia niya kalĩ.”

ũYesu wishiitua kuNazaleti

⁵³ Pĩna ũYesu numala impiani izi, nulega kuasio.

⁵⁴ Pĩna nupika munsĩĩ yaakue nuĩ kuamania mũshũnagogi liao, sunga naakũmia, naaũga, “Waligĩlia mpĩĩ uzu ĩmasaala aya ningũlũ izi?

⁵⁵ Sika wayu muana wa museesine? Nunina sika wayune nukuĩtaguaa Malia? Nĩanũna aakue sika uYakobone nuYosepu, nuSimoni, nũYuda?

⁵⁶ Nĩagũlĩ aakue akutilĩne pana nsĩĩtu. Aĩpa uzu waligĩlia mpĩĩ aza mensi?”

⁵⁷ Naakilua nduyo. ũYesu nuaĩĩla, “uMunakĩdagu sikukuulagia kikyulio isiititũla pana nsiao, numunumba yaakue.”

⁵⁸ Sika nutenda kamakula mingĩ kuasio, kunsooko ya usiitishuĩĩla waao.