Matayo 12 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwikendegeela ulutondo lwa wikyali

¹ Pantondo zaasio ũYesu nukĩlĩla mumĩgunda palutondo lwa wikyali; ĩamanigua aakue naakolua nzala, naandia kũpikisa, upikisua naalĩa.

² ĩApalisayo pĩna naaaona, naamuĩĩla, “Laaa kati, Ĩamanigua aako aitenda nasika ijĩpĩĩle palutondo lwa wikyali.”

³ Nuaĩĩla, “Sika alĩ musomilene kĩna uDaudi alutendile, pĩna alĩ mukolue ĩnzala, nĩnaalĩĩensi nduyo;

⁴ kĩna alĩ wingĩĩle munumba ya kĩNzua numalia ĩmapũli naalĩ mĩkũmbĩkĩlo kwa kĩNzua, naalĩ mũiko kwilĩĩgua ninduyo nĩnaalĩ ĩensi, isiititũla ĩapolia udũũ.

⁵ Kangĩ sika alĩ musomilene muUlagĩĩlio, kĩna pantondo za wikyali ĩapolia muNumba ya kĩNzua akoononeelagiaa lutondo lwa wikyali, sika naatimula.?

⁶ Namuĩĩla gua kĩna, ukoolĩ ĩpa namukulu kwikĩla ĩNumba ya kĩNzua.

⁷ Kanga ĩalĩ mulĩngile ĩndogolelio ya nkaani izi, ‘Nishiia kĩnishungu sika pyolia,’ sika aza mũjile kualamula nasika atimuĩle.

⁸ Kuitĩ uMuana-muntu ingĩ shekulu wa lutondo lwa wikyali.”

Muntu wa mukono mulema wikamigua

⁹ Nulega kuasio, nũingĩla mũshũnagogi liao.

¹⁰ Alukoolĩ muntu wa mukono mulema, naamukolia, naaũga, “Mũikone kwikamia palutondo lwa wikyali? Koona amusokie.”

¹¹ Paapo nuaĩĩla, “Muntu kĩ kumiani kanga ĩutĩĩte ĩnkolo ĩmuĩ ĩguĩle mũlyĩndĩ palutondo lwa wikyali, wasiite kukumĩambane nukukumĩleegia?

¹² iTyũmbĩ lya muntu ingĩ kyakũ kwikĩla ĩnkolo! Luulo gua kutilĩ kamũiko kwitenda naiiza palutondo lwa wikyali.”

¹³ Paapo numuĩĩla umuntu nuasio, “Golola umukono waako!” Nuugolola, naukamigua, naulĩganĩĩla numuua.

Kialo kya kumuulaga ũYesu

¹⁴ Paapo ĩApalisayo naapũna naamukomelia ĩkialo amuulage kunzĩla kĩ.

¹⁵ ũYesu pĩna nulĩnga izi, nulega kuasio. Iingĩ naamutiata, nuakamia tũlũ ensi,

¹⁶ nualagĩĩlia aleke kukumukũmuula;

¹⁷ koona lutimĩĩligue ulukaani naalĩ lutambulue numunakĩdagu Yesaya, ya kĩna,

¹⁸ “Laaa, umwĩtumi waane nanumusaaguĩle, Muloogua waane; nkolo yaane yukuloeelagiguaa nduyo. nĩkakumuĩĩkĩla uMuau waane mumuakue, Nduyo ukakuzitanantĩlia indugu nazĩngĩ ĩkulukuuluu.

¹⁹ Sikukikungumia katia sikukakĩtunta; Tilĩ nunumuĩ nukiiigia ululi luakue munzĩla.

²⁰ Sikukakuluũna ulutinde nalunũkĩkile, Katia sikukakukĩdibia ĩkĩtinde nakitũunkia ĩliuki Sunga pĩna ukileeta ĩkulukuuluu ĩdule.

²¹ Numuliina liakue indugu nazĩngĩ zikilaaĩĩla.”

ũYesu wishookeelia ishokio ya kĩna ukĩtumaa kungũlũ za kĩShetani

²² Paapo naamuleetela mupokũ, munalĩsĩĩmuĩ, kangĩ ukĩmũũmi; numukamia; numunakĩmũũmi nuasio nũitambula nukwiona.

²³ uMulundo wensi naukulĩlua, naaũga, “Uyu sika wayune muana wa kĩDaudi?”

²⁴ Ĩpa ĩApalisayo pĩna naiigia, naaũga, “Uu usũũmi wa kĩBelizebuli udũũ umukulu wa masĩĩmuĩ, umuntu uyu wiĩnga ĩmasĩĩmuĩ.”

²⁵ ũYesu pĩna numana ĩmasĩĩgo maao, nuaĩĩla, “Utemi wensi kanga wĩĩ kĩpũka nkaani uweeene, ukupalansanaa. Nĩkaa yensi katia numba, kanga yĩĩ kĩpũka nkaani ĩnene, sika ikiĩĩmĩka.

²⁶ Kanga ũShetani wamuĩnge ũShetani, ukĩpũka nkaani umuene! Aĩpa uutemi waakue ukiĩĩmĩka mbii?

²⁷ Nineene kanga nĩmaĩnge ĩmasĩĩmuĩ kuusũũmi wa kĩBelizebuli, aĩaana aani akumaĩngaa kuusũũmi wa kuani. Luulo gua, ĩana aani ikitũla alamuli aani.

²⁸ Ĩpa ĩne kanga ĩnukumaĩngaa ĩmasĩĩmuĩ kuusũũmi wa kĩMuau waa kĩNzua, iio gua, uutemi wa kĩNzua wamuuzĩĩlaa.

²⁹ “Katia umuntu wishũũma mbii kwiingĩla munumba ya munangũlũ. nukwitepa inshao zaakue, anga ĩsikumutũngile tĩĩ umunangũlũ. Paapo wingĩle munumba watepe.

³⁰ Wensi nasika wa kuluandĩ luane ukunsiitaa; kangĩ nasikukuilingĩĩlaa palumuĩ nineeene ukusapatĩlagiaa.

³¹ Iio gua namuĩĩla, Ĩantu ikileegeligua mulandu wensi nuutuki, ĩpa nukumutukĩlaa uMuau sikukileegeligua utimu.

³² Wensi kanga waatambule ulukaaani lwa kumusiita uMuana-muntu ukileegeligua uutimu, ĩpa uzo kanga watambule ulukaaani lwa kumusiita uMuau Muelu siku kileegeligua uutimu muna umkũmbigyulu uu sunga nuwaasio naukiiza.

³³ “Mulĩzĩpie ikyota liĩ liiza ninkali zĩĩ nziiza; katia mulĩzĩpie ikyota liĩ byĩĩ ninkali zĩĩ mbĩĩ, kunsooko kunkali zaakue ikyota lyukulĩngaguaa.

³⁴ Inie wĩleli wa nzoka, mwishũũma mbii kwitambula nanziiza pĩna muabĩĩ. Kunsooko umulomo ukutaambulaa ziizo nazijuile munkolo.

³⁵ uMuntu namuuza mukĩuto kiakue nakĩĩza ukupũnagiaa nakĩĩza; umutu namubĩĩ mukĩuto kiakue nakĩbĩĩ ukupũnagiaa nakĩbĩĩ.

³⁶ Luulo namuĩĩla, Lukaani luensi lwa kiaka naakutambulaa ĩantu ijilipũnia iyalo lya lukaani luasio palutondo lwa ulamuli.

³⁷ Kuitĩ kunkaani zaako ukialĩĩligua ĩkulukuuluu, nukunkaani zaako ukilamulua.”

ũYesu wishiiita ilyompi lya kĩlĩngasĩĩlio

³⁸ Paapo ityũmpĩ lya alangi nĩApalisayo naamushookeelia, naaũga, “Mumania, kusiiile kuone kĩlĩgasĩĩlio kumuako.”

³⁹ Nuashookeelia, nuũga, “Wĩleli naubĩĩ nuwaugololia widũũma ĩkĩlĩngasĩĩlio; sika ukipeegua kakĩlĩngasĩĩlio, isiititũla ĩkĩlĩngasĩĩlio kya kiYona umunakĩdagu.

⁴⁰ Kuitĩ kĩna ũYona alĩ wĩĩmile mundaa ya nguĩna intondo zitatu munsĩ nuutiku, iio-iioo nuMuana-muntu ukakikyala pansĩ itondo zitatu munsĩ nuutiku.

⁴¹ ĩAntu a kuNinawi ijiliĩĩmĩka palutondo lwa ulamulua palumuĩ nuwĩleli uu, ĩkakualamula ya kĩna atimuĩle, kunsooko ĩo naapela mĩlandu yaao kuutanantia wa kiYona. Laaĩ gua, ĩpa ukoolĩ namukulu kwikĩla ũYona.

⁴² Mutemi namusungu nwa kutakama ũjiliuka palutondo lwa ulamuli palumuĩ nuwĩleli uu nukukuulamula ya kĩna utimuĩle. Kuitĩ alupũnile kuukinĩĩlo wa nsĩĩ wiigie ĩmasala ma kĩSolomoni. Laaĩ gua, ĩpa ukoolĩ namukulu kwikĩla uSolomoni.”

Ubĩĩ wa kusiitieeeligua kuukamĩnkĩĩlũ

⁴³ “Lĩsĩĩmuĩ pĩna lyukumupũna umuntu lyukukĩlĩlaa paluandĩ nalugila kamaazĩ, lyukudũũmaa pakusũũpĩlia, nalĩulia.

⁴⁴ Paapo lyukuũgaa, ‘Nikishooka kunumba yaane pĩna alĩ mpũnile.’ Pĩna liaza, lyukumĩonaa ngila kakĩntu, mpiagulue nukwijĩpĩĩligua.

⁴⁵ Paapo lyukuendaa, nalĩmasola ĩmasĩĩmuĩ mĩĩa mupũngatĩ namabĩ-bĩĩ-bĩĩĩ kwikĩla ĩlo, namingĩla namikyala muumo. Nĩmpelo ya muntu nuasio yukutũlaa mbĩĩ kwikĩla nya muandio. Iio ikitũla nukuwĩleli uu naubĩĩ.”

Kĩnũna kya tai

⁴⁶ Pĩna alĩ kĩlĩ ukumatambuĩla ĩmaũmbĩ, laaa, unina nĩanũna alĩ ĩĩmĩkile panzi, naidũũma kukĩtambuĩla nduyo.

⁴⁷ Umuĩ numuĩĩla. Laaa, umaau waako nĩanũna aako ĩĩmĩkile panzi, idũũma mwĩtambuĩle ninduue.

⁴⁸ Nushookeelia, numuĩĩla unuasio naalumuĩĩlĩĩle, “uMaau waane waani, nĩanũna aane aani!

⁴⁹ Nualagĩĩla namukono ĩamanigua aakue, nuũga. Ntĩĩa ĩanũna aane numaau waane!

⁵⁰ Kuitĩ wensi nukutendaa uulooa wa kĩTata waane nwa kwigyulu, nuasio uuyo munũna waane, numugũlĩ waane, numaau waane.”