Matayo 11 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Yohana Mubadĩĩzia

¹ ũYesu pĩna nukondia kukualagĩĩlia ĩamanigua aakue naikyumi naabĩlĩ, nulega kuasio nuenda kwimania nukwitanantia mukaa zaao.

² uYohana pĩna nũigia mukĩtũngo impola za utendi wa kĩKilisito, nuatuma ĩmanigua aakue kukumukolia,

³ “Ue uuene nwijile, katia kumutũngĩle wĩngĩ.”

⁴ ũYesu nushookeelia, nuaĩĩla, “Lendĩ mumuĩĩle uYohana namukuziigia nukukuziona,

⁵ ĩapokũ iona, ĩanaketele igenda, ĩanamatana ieeligua, ĩanakĩlĩmba iiigia, ĩakiu iiiukigua, nĩatũka itanantĩligua iMpola naNziiza.

⁶ Mukembetue unuasio nasika mukũmpigue kunsooko yaane.”

⁷ Pĩna naalongola, nuandia ũYesu kukumaĩĩla ĩmaũmbĩ impola za kĩYohana, “Alĩ muendile kumbuga kwilaaa yaani? lunangi nalwishũngũsigua nĩnzegane?

⁸ Ĩpa alĩ muendĩĩle yaani? kukumuona muntu nujialile intiila nantakatane? Laaĩ gua naakujialaa intiila nantakata akoolĩ munumba za atemi.

⁹ Ĩpa alĩ muendĩĩle yaani? kukumuona munakĩdagune. Eeze, namuĩĩla, namukulu kwikĩla umunakĩdagu.

¹⁰ Kuitĩ uyu wayu naalĩ muandĩkĩlue, ‘Laaa, namutuma umutumua waane ntongela ya usiu waako, nukijĩpĩĩlia ĩnzĩla yaako ntongela yaako.’”

¹¹ “Tai, namuĩĩla, Sika alĩ walakigyela kaumuĩ muwĩleli wa asungu namukulu kwikĩla uYohana Mubadĩĩzia; ĩpa namuniino muutemi wa kwigyulu ingĩ mukulu kwikĩla uyo.

¹² Kwipũma intondo za kĩYohana mubadĩĩzia sunga nantende uutemi wa kwigyulu ukuuza kumakanambalũ, nĩanamakanambalũ akuusolaa kungũlũ.

¹³ Kuitĩ ĩAnakĩdagu ensi nuUlagĩĩlio alĩ ipũnilie unakĩdagu naukinĩĩla pantondo za kĩYohana.

¹⁴ Malĩĩ ĩmusiiile kwigomba, uyo ingĩ Elia nũjiliiiza.

¹⁵ Nutĩĩte ĩakutuĩ nũigie.”

¹⁶ “Nuupianĩkĩĩlie niyaani uwĩleli uu? Wĩpianile zĩ ang'inia naikyalansile pigyulaanĩlo naakuĩĩta ĩĩĩa,

¹⁷ naiũga, ‘Aza kukumukuĩla inie impembe ĩpa sika mwaina; aza kukomilie ĩsuuka ĩpa sika mwalĩla.’

¹⁸ Kuitĩ uYohana alũjile, sika alukulĩaa katia kwikopa; ĩantu naaũga, ‘Munalĩsĩĩmuĩ.’

¹⁹ uMuana-muntu alũjile, nwilĩa nukwikopa, naaũga, ‘Laaĩ, mulakũ uyu, kangĩ mukopekia mubinio, musuamuua wa asangulia-koodi nĩanamĩlandu! Nĩmasala migyelĩĩle kĩna makulukuuluu kuutendi waakue.’”

Ukĩa kukaa nasika zishuĩlĩĩle

²⁰ Paapo nuandia kukuzitakĩla ikaa muna ĩmakula maakue namingĩ alĩ makutendekaa, kunsooko sika alĩ apelile,

²¹ “Ukĩa kumuako Kolazini! ukĩa kumuako Betisaida! Kuitĩ kanga ĩmakula naalĩ matendekile kumiani kanga ĩalĩ matendekile kuTilo nĩSidoni, alĩ ijilee apelile kalĩ, ĩĩkĩtũnga imbuela nukukĩsemuĩla ĩmaũ.

²² Ĩpa namuĩĩla, ikitũla itontũ kuTilo nĩ Sidoni kwigigimĩĩlia palutondo lwa ulamulua kwikĩla kumiani.

²³ Ninduue Kapelinaũmũ, ukinansuluane sunga kwigyulu? Ukitimigua sunga kuulungu. Kuitĩ kanga ĩmakula naalĩ matendekile kumuako ĩalĩ matendekile kuSodomũ, ĩkaa ĩkoolĩ sunga nantende.

²⁴ Ĩpa namuĩĩla, ikitũla intontũ kunsĩĩ ya Sodomũ kwigigimĩĩlia kwikĩla ue palutondo lwa ulamulua.”

Nkolo nyakukũnukulĩlua

²⁵ ĩTyungo liasio ũYesu nushookeelia, nuũga, “Nakusongelia, Tata, Shekulu wigyulu nĩnsĩĩ, kunsooko waapisĩĩle izi ĩanamasala nusugũ nuakũnukuĩla ĩaana naatakata.

²⁶ Eeze Tata, kuitĩ iio alĩ iloelĩĩlie ntongela yaako.”

Wĩtumi wa kĩYesu umuene

²⁷ “Tũlũ yensi napĩĩlue nuTata waane; kutilĩ numulĩngile uMuana, isiititũla uTata; kangĩ kutilĩ numulĩngile uTata, isiititũla uMuana, nunuasio wensi uMuana nusiiile kukumukũnukũĩla.

²⁸ Nzuĩ kumuane tũlũ ensi namukatĩĩle nĩnamuaũnue nĩmĩligo, nineene nĩkakumusũũpĩlia.

²⁹ Egaalĩ umuango waane, ĩmaniĩ kumuane, kuitĩ ĩne numupolo, nĩnkolo yaane ĩniinupilie, niniinie mukiligia uusũũpio munkolo zaani.

³⁰ Kuitĩ umuango waane muuza, numuligo waane mupepeele.”