Matayo 10 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Atumua kyumi naabĩlĩ nukwitumua kumuao

¹ Nuĩĩta ĩamanigua akue naikyumi naabĩlĩ, nuapeela usũũmi mumasĩĩmuĩ amaĩnge nukwikamia mauluĩle mensi nuuneketũ wensi.

² Nĩmiina ma atumua naikyumi naabĩlĩ ntaaya. Nwa muandio Simoni nukuĩtanguaa Petelo nuAndelea umunũna waakue, nuYakobo sha Zebedayo nuYohana umunũna waakue;

³ Pilipo nuBalitolomayo, Tomaso nuMatayo musangulia-koodi, Yakobo ũsha Alpayo nuTadayo,

⁴ Simoni Mukananayo nũYuda nwa kuIsikaliote naalumusakilie.

⁵ Ĩa naalĩ ikyumi naabĩlĩ ũYesu nuatuma, nualagĩĩlia nuũga, “Mulekienda munzĩla ya ndugu nazĩngĩ, sunga mulekiingĩla mukaa yensi nya Asamalia;

⁶ taazu muende kunkolo nazalimĩlĩĩle za numba ya ĩSilaeli.

⁷ Pĩna mwigenda, tanantiĩ, ĩmwiũga. uUtemi wa kwigyulu wasũgamĩĩlaa.

⁸ Kamiĩ ĩaluĩle, iiukiĩ ĩakiu, eeliĩ ĩanamatana, ĩngĩ ĩmasĩĩmuĩ; muapeegue nakanda, pũniĩ nakanda.

⁹ Mulekishola zahabũ katia mapeesa, katia mpiia mumisipi yani,

¹⁰ Sunga mpĩnda ya musĩnzo katia mĩnkũmbĩ ĩbĩlĩ, sunga ilaatu katia nkome; kunsooko umunamulĩmo wijĩpĩĩle kwipeegua india zaakue.

¹¹ Numukaa yensi katia kĩsaalĩ kiensi namukakukiingĩla mudũũmĩ waani muasio namusanigue, mũkyale pamuakue sunga pĩna mukilega.

¹² Pĩna mũingĩla munumba, ũgiĩ,

¹³ nĩnumba kanga ijĩpĩĩle, matiliga maani mĩĩ muasio; malĩĩ ĩsikijĩpĩĩle, matiliga maani mamushookele.

¹⁴ Wensi kanga wasiite kumusũgamĩĩlia katia kukuzitegeela inkani zaani, pĩna mwapũna munumba katia kaa niasio, lukũnũntĩ ulunkundĩ lwa mĩgulu yaani.

¹⁵ Tai namuĩĩla, ikitũla itontũ ĩnsĩĩ ya Sodomũ nĩGomola kwigigimĩlĩa palutondo lwa ulamulua kwikĩla ĩkaa niasio.

¹⁶ “Laaĩ, ĩne namutuma zĩ nkolo pakatĩ ya iyĩngi; luulo gua, muĩ asugũ zĩ nzoka; muĩ muagila kautiulia zĩ nkunda.

¹⁷ Ĩsukukĩ nĩantu; kuitĩ ĩkakumutuala kumalindĩ, numumasũnagogi maao ĩkakumukua;

¹⁸ Mukitualua paakulu nĩatemi kunsooko yaane, utũle ukuĩli kumiao nukundugu nazĩngĩ.

¹⁹ Ĩpa pĩna ĩkakumutuala, mulekipinda-pinda mutambule yaani, kunsooko lĩĩlo tyũngo mukipeegua namukakuzitambula.

²⁰ Kuitĩ sikaka niinie namwitambula, ingĩ uMuau wa kĩTata waani, uuyo witambula munsĩ yaani.

²¹ Munũna ukakumusakia umunũna waakue waulague, io-iioo nũshee numuana, nĩaana ĩkakuauukĩĩla ĩaleli nukukuaulaga.

²² Mukitũlishuukĩlua nĩantu tulu kunsooko ya liina liane. uNuasio gua nwakugigimĩĩlia sunga ĩmpelo, uuzo ukigũnĩka.

²³ Pĩna ĩkakumuĩnga mukaa ĩĩ talamĩlĩ yĩngĩ. Tai namuĩĩla. Sika mukakuzimala ikaa za ĩSilaeli sunga waaze uMuana-muntu.

²⁴ “uMumanigua sikukumukĩlĩkĩĩlaa umumania waakue, numusese sikukumukĩlĩkĩĩlaa ũshekulu waakue.

²⁵ Yendile muumo kumumanigua kũtũla zĩ umumania waakue, numusese kũtũla zĩ ũshekulu waakue. Malĩĩ ĩamuĩtile umukola numba Belizebuli, sika nangũlũne ĩaasio a munumba yaakue.

²⁶ “Luulo gua, muleke kĩoopooka, kuitĩ kutilĩ nalukũnĩkĩle nasika lũjilikũnukulua; katia nalupisigue nasika lũjililĩngua.

²⁷ Nanukumuũĩla inie muwiilu, lutambulĩ muweelu; nĩnamukupuepuelaguaa kukĩmpisĩ-mpisĩ; lutanantiĩ kumatembe.

²⁸ Muleke kĩoopooka naakuulagaa umuĩlĩ, nasika asũũmile kukumĩulaga ĩnkolo; taazu mumoopoke nusũũmile kwioonoona ĩnkolo numuĩlĩ gaa muGehena.

²⁹ Pishamamba pibĩlĩ, sika pyukugulagiguaa kusenti ĩmuĩne? Sunga nakamuĩ sika kakuguaa pansĩ ĩsikumanile uTata waani.

³⁰ Ĩpa inie, sunga ĩmatũmbĩ ma matũe maani maaligue mensi.

³¹ Luulo gua, mulekioopoka; inie mwa ngele nkakũ kwikĩla ipinoni pingĩ.

³² Luulo gua, tũlũ wensi nukinkũmuula ntongela ya antu, nineene nĩkakumukũmuula ntongela ya kĩTata waane nuĩlĩ kwigyulu.

³³ Wensi nukinkaana ntongela ya antu, nineene nĩkakumukaana ntongela ya kĩTata waane nuĩlĩ kwigyulu.

³⁴ “Mulekishĩĩga kĩna nijile kwileeta matiliga muna nsĩĩ. Sika nijile kwileeta ĩmatiliga, ĩpa iyũmba.

³⁵ Kuitĩ nijile kwikinĩla muntu nũshee, munanso nunina, mukuĩlĩmĩla numukuĩ,

³⁶ nĩalugu a muntu ingĩ aao ĩa munumba yaakue.

³⁷ Numuloilue ũshee katia unina kwikĩla ĩne, sika winjĩpĩĩle; numuloilue umuana namugoosia katia namukĩĩma kwikĩla ĩne sika winjĩpĩĩle.

³⁸ Nduzo nasikukukenkaa umusalaba waakue nukwintianta, sika winjĩpĩĩle.

³⁹ Nukuligagiaa uuumĩ waakue ukakuulimĩĩlia, nduyo nukuulimĩĩlagiaa uuumĩ wakue kunsooko yaane, ukakuuligia.

⁴⁰ “Nukumuanũnkulaa inie, ukunanũnkulaa uneene; nduzo nukunanũnkulaa ĩne, ukumuanũnkulaa naaluntumile.

⁴¹ Nukumuanũnkulaa umunakĩdagu kunsooko munakĩdagu, ukiligia ĩkĩpeegua kya munakĩdagu; nduyo nukumuanũnkulaa umunakulukuuluu kunsooko munakulukuuluu, ukiligia ĩkĩpeegua kya munakulukuuluu.

⁴² Wensi kanga wamupeele umuĩ wa ĩa naaniino sunga ĩkĩĩko kya maazĩ namapolo kunsooko mumanigua, tai namuĩĩla, sikukilimĩĩlia kainiino ĩkĩpeegua kiakue.”