Maliko 7 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu wishookeelia ishokio lya kusiitikendegeela intendo za anampala

¹ ĩApalisayo naamulundĩkĩĩla, nityũmpĩ lya alangi naalĩ apũnile kũYelusalemũ

² Naaona tyũmpĩ lya amanigua nailĩa india kumĩkono namĩdobũ, ĩndogolelio yaakue, nasika alĩ mĩkalaligue.

³ Kunsooko ĩApalisayo nĩAyahũdi ensi sika akulĩaa pĩna sika ĩkalĩĩlie tangua ĩmĩkono, naaziamba intendo za anampala aao.

⁴ Kangĩ pĩna naapũna mwigyulĩlo sika ilĩa kanga asiite kĩeelia; zikoolĩ nazĩngĩ naalĩ azaanũnkuĩle kukuziamba, kĩna kwioogia iiiko ninungu niisheme ya yuuma.

⁵ ĩApalisayo nĩalangi naamukolia, nĩkĩ gua ĩamanigua aako sika akugendelaa muntendo za anampala, ĩpa akulĩaa india kumĩkono namĩdobũ.

⁶ Nuaĩĩla, uYesaya alumupũnĩĩlie unakĩdagu iiza, inie anamampĩlu, kĩna alĩ yandĩkue, “Antu ĩa ankunkulagiaa kumĩlomo Ĩpa inkolo zaao zĩkulĩ nineene.

⁷ Ĩkĩtekelaa nakanda gua, Naimania ĩmamania nama malagĩĩlio ma antu.”

⁸ Mwalĩlekile ilyagĩĩlio lya kĩNzua nukukuziamba intendo za antu.

⁹ Nuaĩĩla, “Iiza! Mwalĩsiita ilyagĩĩlio lya kĩNzua koona muziambe intendo zaani!

¹⁰ uMusa aluũgile, ‘Kulia utata waako numaau waako; nwakumutukĩla ũshee nunina, kwikia nwakie.’

¹¹ Inie mukuũgaa gua, ‘Kanga umuntu wamuĩĩle ũshee katia unina, Kĩntu kiane nakijĩpĩĩle kukukusaĩpia ingĩ Kolibani’ (ĩndogolelio yaakue, Kĩpũnigue kwa kĩNzua),

¹² sika mukumugombagiaa kukumutendela kalumuĩ ũshee katia unina

¹³ Mukuloononeelia ulukaani lwa kĩNzua kuntendo zaani naalĩ mukĩsaalĩlaa; kangĩ mingĩ namĩitĩ mukutendaa.”

¹⁴ Pĩna nuliĩta iyũmbĩ nulĩĩĩla, nzigiĩ tũlũ ensi, mulĩnge.

¹⁵ Kutilĩ nakĩĩlĩ kunzi ya muntu nakyukumũingĩlaa mumuakue nakĩsũũma kukumudobia, ĩpa nakĩkumupũnaa umuntu, kĩĩkio kyukumudobagiaa umuntu.

¹⁶ Naa ukolĩ umukola akutuĩ a kuigĩlia, nũigie.

¹⁷ Pĩna nũingĩla munumba nulĩleka iyũmbĩ, ĩamanigua aakue namukolia impola za mpiani niasio

¹⁸ Nuaĩĩla, yoine, niniinie muagila kaulĩngi? Sika mulĩngilene kĩna nakiĩlĩ kunzi ya muntu nakyukumũingĩlaa mumuakue sika kishũũma kukumudobia?

¹⁹ Kunsooko sika kiingĩla munkolo ĩpa mundaa, nukwipũna kwibyaala. Iio nuzeelia india zensi.

²⁰ Nuũga, nakyukumupũnaa umuntu, kiasio kĩĩkio kyukumudobagiaa umuntu.

²¹ Kunsooko kwipũna mumoo wa muntu makupũnaa masĩĩgo namabĩĩ, ulandĩ, wiii, uulagi,

²² ugololia, uawa, ugaali, upembeelia, usambo, ukĩndani, ituki, lukeemo, uulu.

²³ uUbĩĩ uu wensi ukupũnaa munsĩ nukukumoonoona umuntu.

Ukamigua wa munanso wa ndugu yĩngĩ

²⁴ Nulega kuasio, nuenda kumĩmbĩ za Tilo nĩSidoni. Nũingĩla munumba, nusiia walekimana kamuntu kaumuĩ; sika nusũũma kukĩpisa.

²⁵ Ĩkamuĩ umusungu naalutĩĩte ĩkananso naalĩ kingĩlue nĩlĩsĩĩmuĩ, pĩna nũigia impola zaakue, nuuza numuguĩĩla pamĩgulu yaakue.

²⁶ Numusungu alĩ Mugiliki, kĩntua kiakue muSilopoiniki. Numulompa walĩĩnge ĩlĩsĩĩmuĩ mumunanso waakue.

²⁷ Numuĩĩla, “Aleke ĩaaana ikyute tangua; sika iiza gua kukuusola uugalĩ wa aana nukukuzigumĩla imbua.”

²⁸ Nduyo numushookeelia numuĩĩla, “Eeze Shekulu, nimbua zukulĩa imaminangulua ma aana paulũngũ wa meeza.”

²⁹ Numuĩĩla, kunsooko ya lukaani ulu, longola, ĩlĩsĩĩmuĩ lyamulegelaa umunanso waako.

³⁰ Nulongola kunumba yaakue, nukaagaana ĩkaana kagonigue muulĩlĩ, nĩlĩsĩĩmuĩ lyakalegelaa.

Ukamigua wa muntu munakĩlĩmba kangĩ musekema

³¹ Nulega kangĩ mumĩmbĩ za Tilo, nukĩlĩla pakatĩ ya Sidoni sunga kunanza ya Galĩlaya, pakatĩ ya mĩmbĩ za Dekapoli.

³² Naamuleetela munakĩlĩmba kangĩ musekema, naamupeepia waĩĩke ĩmĩkono yaakue

³³ Numuũna luandĩ pamulundo wing'ene, nuĩĩkĩla injala zaakue muakĩtuĩ aakue, nutia matĩ, nulupaatia ululĩmĩ luakue,

³⁴ nulangamĩla kwigyulu, nwĩsũsũma, numuĩĩla, “Epata,” ĩndogolelio yaakue, “Lĩmbuuka!”

³⁵ Nĩakĩtuĩ aakue naalĩmbuuka, ĩkamuĩ ululĩmĩ luakue nalutonta, nutambula kĩĩsa.

³⁶ Nualagĩĩlia aleke kukumukũmulĩla kaumuĩ. Iio kĩna alĩ wĩkakilie kukualagĩĩlia, iio nĩndĩo naĩkakia kwitanantia.

³⁷ Naakũmĩkia kwikĩlĩkĩĩla, naiiũga, watendaa tũlũ iiza; sunga ĩanakĩlĩmba iigie nianakĩmũũmĩ atambule.