Maliko 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mpiani ya muminzi

¹ Nuandia kangĩ kwimania pananza. Naamulundĩkĩĩla mulundo mukulu, sunga ninduyo nunankĩla mwipyango, nuĩma muasio munanza; umulundo tũlũ nawĩĩma pityumbĩ piipĩ nĩnanza.

² Nuamania ningĩ kumpiani, nuaĩĩla muumania waakue,

³ “Tegeelĩ! Laaaĩ, muminzi alĩ wendile kwiminza.

⁴ Pĩna alĩ wiminza, injia nazigua panzĩla, nazĩĩza inoni nazĩzilĩa.

⁵ iNjia nazigua pipyampa pĩna kutilĩ ulongo nawingĩ, ĩkamuĩ nazilia kunsooko ya ukeei wa ulongo.

⁶ Pĩna ĩmpasu nĩlĩla nazigũnda, kunsooko ngila kamĩli, nazuuma.

⁷ iNjia naziguĩla mumiigia, nĩmiigia namakula namazishopa, sika nazitula kampeke.

⁸ iNjia naziguĩla muulongo nauuza, nazikinda nazikula nazipĩa, injia mukumi matatu, injia makumi mutandatu, injia gyana.”

⁹ Nuũga, “Nutĩĩte ĩakutuĩ a kuigĩlia, nũigie.”

¹⁰ Pĩna nuĩ wing'ene, io naalĩ ĩensi ninduyo palumuĩ nĩnaikyumi naabĩlĩ, naamukolia ĩndogolelio ya mpiani zaasio.

¹¹ Nuaĩĩla, “Inie mwapĩĩlue unkũnkũ wa utemi wakĩNzua ĩpa kuaasio naĩkunzĩ zensi zĩĩlĩ zĩ mpiani,

¹² ‘Koona nailaaa alaae, alekiona; Naiiigia iigie, alekilĩnga; Alekigomoka, aleegeligue ĩmĩlandu.’”

¹³ Nuaĩĩla, “Sika mumanile ĩmpiani ĩĩ, aimpiani zensi mukakuzilĩnga mbii?

¹⁴ uMuminzi ukuminzaa ulukaani.

¹⁵ ĩa awa apanzĩla pĩna ulukaani lwiminzua nindĩo pĩna naiigia, ĩkamuĩ nuuza ũShetani, nululeegia ulukaani naalĩ luminzue munkolo zaao.

¹⁶ Iio-iioo nindĩĩa naaminzue pipyampa, ĩa pĩna akulũigagiaa ulukaani, ĩkamuĩ akuluanũnkulaa kuulumbi;

¹⁷ ĩpa kuuzaa agila kamĩli mumiao akuĩmaa ntondo nkeei; pĩna zigyelela injago katia mpatĩ kunsooko ya lukaani, ĩkamuĩ akukilaguaa.

¹⁸ Nindĩĩa naaminzue pamiigia ingĩ naakulũigagiaa ulukaani,

¹⁹ nuukunkunali wa unkũmbigyulu, nuupembeeligua wa ugolĩ, ninshula nazĩngĩ nazingĩla, nazishopa ulukaani, naaulia uogoli.

²⁰ Nindĩĩa naalĩ aminzue pamasalu namaaza, ingĩ naakulũigagiaa ulukaani nukukuluanũnkula, nukwipĩa impeke, umuua makumi matatu, umuua makumi mutandatu, umuua gyana.”

Umania kwipũna mumpiani ya ntala nimbeu

²¹ Nuaĩĩla, “ĩNtala yukuleetaguane ĩĩĩkue munsĩ ityooto katia muulũngũ wa ulĩlĩ? Sika yukuĩĩkaguaane pauĩĩko wa ntala?

²² Kutilĩ gua nalwĩpisile, ĩpa itĩ luĩze lwigyelele, sunga kutilĩ lwa unkũnkũ, ĩpa itĩ luĩze lwigyelele.

²³ Naa ukoolĩ umukola akutuĩ a kuigĩlia, nũigie.”

²⁴ Nuaĩĩla, “Laaĩ namulũigilie; ĩngele namukumĩgemelelaa, ĩĩo mukigemeleligua niniinie, kangi mukiongeeligua.

²⁵ Nuasio nutĩĩte ukipeegua; nduyo namugila, sunga nukĩtĩĩte ukinamantulua.”

²⁶ Nuũga, uUtemi wa kĩNzua ingĩ zĩ muntu nukuminzaa imbeu munsĩĩ,

²⁷ nugona nukwilaĩla utiku nĩmunsĩ, ndizo imbeu nazilia nukwikula, uyo sika numanile kunzĩlakĩ.

²⁸ ĩNsĩĩ yukupĩĩsagiaa ĩnene; ĩmuandio nole, kangĩ mpũũ, pembele mpeke nazipasa mumpũũ.

²⁹ Pĩna naukama, ĩkamuĩ nutuala ĩnsiime kunsooko iyogola lyapikaa.

³⁰ Nuũga, “uUtemi wa kĩNzua kuupianĩkĩĩlie niyaani? Katia kuuĩĩke mumpiani kĩ.

³¹ Ingĩ kĩna kabeu ka haladali nakapandĩlue munsĩĩ, ndĩko kaniino kwikĩla imbeu tũlũ zensi za muna nsĩĩ,

³² nĩpĩna kapandĩlua kakukulaa, nakatũla kakulu kwikĩla makota mensi, nalĩsonga ntambĩ nkulu, sunga inoni za mukiania zishũũme kuligia uutimo.”

³³ Kumpiani ningĩ nazĩitĩ alukuatambuĩlaa ulukaani kĩna alĩ asũũmile kukulũigia.

³⁴ Sikukĩtambuĩlaa ndĩo isiititũla kunzĩla ya mpiani. Nualondoosia ĩamanigua aakue ing'ene inkaaani zensi.

ũYesu ukumĩtuulia ĩnzega

³⁵ Palutondo luasio pĩna niĩ mpĩndĩ, nuaĩĩla, “Kupũũte kwityumbĩ.”

³⁶ Naalĩleka iyũmbĩ, naamutuala muumo mwipyango iio kĩna alĩ wĩĩlĩ, nĩmapango namĩngĩ alĩ mĩensi ninduyo.

³⁷ Nautũla muzũgo mukulu wa nzega, maĩngo namalĩkuanga ipyango sunga ipyango nalijula ĩmaazĩ.

³⁸ Nduyo alĩ wĩĩlĩ kunũma, nugonile mumusegamo; naamulaĩlia, naamuĩĩla, “Mumania, sika kĩntune kumuako ishie nakwikapĩla?”

³⁹ Nulaĩla, numĩtakĩla ĩnzega, numĩĩila ĩnanza, “Tuulia, tuula!” ĩNzega nĩtuula nayĩĩ ituulũ dũũ.

⁴⁰ Nuaĩĩla, “Nĩkĩ mwĩooa itĩ? Muagila kausuĩĩline?”

⁴¹ Naingĩĩlua nuooa ukulu, naĩĩ kĩĩla, “Uyo waani gua, sunga ĩnzega nĩnanza zamũigia.”