Maliko 16 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwiiiuka kwa kĩYesu

¹ Pĩna lutondo lwa wikyali nalukĩla, uMalia nwa kuMagidala, nuMalia unina wa kĩYakobo, nuSolome, naagula ĩmakũta nama nsũla-nsũla, amupake.

² Sunga palutondo lwa muandio lwijũma, kĩlĩ daau, naenda kukĩbĩĩla pĩna ĩmpasu alĩ itua.

³ Naĩĩ kĩtambuĩla eenekuene; “Waani nukakukupingilitĩlia igyũe pamulango wa kĩbĩĩla?”

⁴ Pĩna naalaa, naaona kĩna igyũe lyakondaa kwipingilitigua, nindĩlo alĩ kyulu zigi-zigi.

⁵ Pĩna naingĩla mukĩbĩĩla, naamuona umusumba wikyalansile paluandĩ lwa kĩgoosia, nujialile intiila nzelu, naatunduala.

⁶ Ninduyo nuaĩĩla; “Lekitundualĩ, mukumudũũma ũYesu Munazaleti naalĩ mukononteelue mumusalaba. Wiiukaa, ukutilĩ munu; laaĩ pĩna alĩ amuĩĩkile.

⁷ Ĩpa longolĩ, muaĩĩle ĩamanigua aakue, nuPetelo; ya kĩna wamutongeelaa kwienda kuGalĩlaaya; kuasio kuuko mukakumuona kĩna alumuĩĩlĩĩle.”

⁸ Naapũna mukĩbĩĩla naamanka, kunsooko naingĩĩlua nuukĩkĩmi numuntũmbĩ; sunga sika naamuĩĩla kamuntu kalukaani, kuitĩ alĩ oopokaa. [

⁹ Ninduyo pĩna nũiuka palutondo lwa muandio lwijũma kĩlĩ gyĩngu, numwigyeleela tangua uMalia nwa kuMagidala naalumuĩngĩĩlie ĩmasĩĩmuĩ namupũngati.

¹⁰ Nuasio nuenda nuaĩĩla impola izi aasio naalĩ yĩensi, naalĩ ikĩsusuma nukwilĩla.

¹¹ Ĩpa ĩasio pĩna naiigia kĩna waazaa mupanga ninduyo alĩ wamuonaa, sika naasuĩĩla.

¹² Pĩna nazikĩla zaasio, nũigyeleela abĩlĩ mumiao kũkyelu liĩngĩ, pĩna aalĩ igenda naalunziĩ kumĩgunda.

¹³ Nĩaasio nalongola, naaganuĩla ĩaasio naĩngĩ; sunga ndĩo sika naaasuĩĩla.

¹⁴ Pembele nũigyeleela aasio naikyumi numuĩ pĩna alĩ ilĩa, nuatakĩla kuusiitishuĩĩla waao nuukakũ wa nkolo zaao, kuitĩ sika alĩ aasuĩlĩĩle ĩaasio naalĩ amuoonie pĩna alĩ wiiukile kwipũna muakiu.

¹⁵ Nuaĩĩla, longolĩ muunkũmbigyulu tũlũ, ĩmwitanantia ĩmpola nanziiza kukĩumbe tũlũ.

¹⁶ Nusuĩlĩĩle nukwibadĩĩzigua ukigũnĩka; nasikusuĩlĩĩle ukilamulua.

¹⁷ Niilĩngasĩĩlio ii yĩkakĩtiata nĩaasio naasũĩlĩĩle, kuliina liane ikiĩnga ĩmasĩĩmuĩ; ikitambula ntambo mpia

¹⁸ ikiamba ninjoka; sunga kanga akope ĩkyakuulagana sika kĩkakuatenda kakĩntu; ikiĩĩkĩla ĩmĩkono yaao mualuĩle nĩndĩo ikikamia.

¹⁹ ũShekulu Yesu pĩna nukondia kukĩtambuĩla nĩndĩo, nutualua kwigyulu, nwikyalansa pamukono wa kĩgoosia wa kĩNzua.

²⁰ Nĩndĩo naapũna, naatanantia tũlũ pensi; ũShekulu nukĩtuma umulĩmo palumuĩ nĩndĩo, nukukulukamĩnkĩĩlia uLukaani kuilĩngasĩĩlio naalĩ yĩtiatile ndulo.]