Maliko 14 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kialo kya kumuulaga ũYesu

¹ Pĩna nazikĩla ntondo zibĩlĩ, nalutũla lutondo lukulu lwa Pasaka, kangĩ lwa ugalĩ naugila igaaĩ. ĩApolia naakulu nĩalangi naaidũũma kukumuguĩla kuupembeelia, amuulage.

² Kuitĩ alĩ aũgile, ilekitũla palutondo nalukulu koona ulekitũla muzũgo wa antu.

ũYesu wipakua ĩmakũta kuBetania

³ Pĩna alĩ wĩĩlĩ kuBetania munumba ya kĩSimoni munamatana, nwikyalansile pandia, nuuza musungu naalutĩĩte kasali ka makũta ma nalada,

⁴ Alĩ akoolĩ naalĩ aĩĩpĩlaguaa naiũga eene kueene, “Yaa kĩ gua kwioonoona ĩmakũta itĩ?”

⁵ Kuitĩ ĩmakũta aya aza mijiliguligua kushilinge magana matatu nukwikĩlĩkĩĩla, apeegue ĩatũka. Naamusininkalĩla dũũ umusungu nuasio.

⁶ ũYesu nuaĩĩla, “Mulekĩ, nĩkĩ mukumuagia. Wĩtumĩĩle mulĩmo namuuza.

⁷ Kuitĩ kuuza mwĩensi nĩatũka intondo tũlũ, nĩpĩna musiiile kukutendela naiiza musũũmile; ĩpa ĩne sika kwĩensi niniine intondo zensi.

⁸ Utendile kĩna usũũmile, watongelaa kukuupaka ĩmakũta umuĩlĩ waane kunsooko ya uĩĩkua.

⁹ Tai namuĩĩla, kuensi kĩna iMpola na Nziiza zikitanantigua muna unkũmbigyulu wensi, naalutendile uyu lukiganulua kuwijukĩlo waakue.”

Usongeelani wa kĩYuda

¹⁰ ũYuda nwa kuIsikaliote, umuĩ wa aasio naikyumi naabĩlĩ, nuenda kuapolia naakulu koona wamusakie kumiao.

¹¹ Nindĩo pĩna naiigia naalumbĩkia, naalagaana kukumupeela mpiia. Nudũũma ĩnzĩla ya kumusakia kwityũngo nalijĩpĩĩle.

¹² Sunga palutondo lwa muandio lwa ugalĩ naugila igaaĩ, pĩna alĩ amĩsĩnzile ĩnkolo ya Pasaka, ĩamanigua aakue naamukolia, “Mpĩĩ pĩna usiile kuende kukuzĩpĩlĩlie umĩlĩe ĩPasaka?”

¹³ Nuatuma abĩlĩ muamanigua akue, nuaĩĩla, lendĩ mukaa, mukitaagana numugosia umĩkenkile ntunda ya maazĩ, mutiatĩ.

¹⁴ Pensi pĩna ukiingĩla, muĩĩlĩ umukola numba, Mumania uũgile, liĩlĩ mpĩĩ ityando liane ĩlya agenda ndĩĩle ĩPasaka muasio palumuĩ nĩamanigua aane.

¹⁵ Ninduyo ukakumulagĩĩla ityando lya kukiania nikyulu, lyakondaa kwijĩpĩĩligua; muasio muumo mukuzĩpĩlĩlie.

¹⁶ Ĩamanigua naalongola naenda mukaa naaona iio-iioo kĩna aluaĩĩlĩĩle, naamĩzĩpĩĩlia ĩPasaka.

¹⁷ Pĩna niĩ mpĩndĩ, nuuzaa palumuĩ nĩnaikyumi naabĩlĩ.

¹⁸ Nindĩo pĩna alĩ ikyalansile pandia nailĩa, ũYesu nuũga, “Tai namuĩĩla, umuĩ waani nwilĩa ensi nineene ukinshakia.”

¹⁹ Naandia kwiona usungu, naĩĩ kumukolia umuĩ-umuĩ, “Neenene?

²⁰ Nuaĩĩla, umuĩ wikyumi naabĩlĩ, uyo nakwilĩĩlia ensi nineene mukiungu.”

²¹ Kuitĩ uMuana-muntu walongolaa kĩna alĩ muandĩkĩlue, ĩpa ukĩa kumuakue umuntu nuasio nukumusaki uMuana-muntu. Taazu kanga umuntu nuasio alĩ walekilelua.

²² Pĩna alĩ ilĩa nuusola uugalĩ, nuukembeta, nuuega, nuapeeela, nuũga, “Koĩ uuwau muĩlĩ waane.”

²³ Nukĩsola nĩkĩĩko, nusongelia, nuapeela, naakĩkopela tũlũ ensi.

²⁴ Nuaĩĩla, uu waau mugali waane wilyago, nũitĩkile kunsooko ya iingĩ.

²⁵ Tai namuĩĩla, Sika nikikopa kangĩ uupĩi wa mĩkali ya mĩzabiibu sunga palutondo luasio pĩna nĩkakuukopa naupia muutemi wa kĩNzua.

²⁶ Ndĩo pĩna naakondia kwiĩmba, naalongola kunkonko ya Mĩzeituni.

ũYesu wipũnia uunakĩdagu kĩna amanigua ĩkakumuleka

²⁷ ũYesu nuaĩĩla, tũlũ ensi mukishuukua, kuitĩ yandĩkue, Nĩkakumukua umudĩĩmi ninkolo zikishapatĩla.

²⁸ Ĩpa pĩna niiuka, nĩkakumutongeela kwienda kũGalilaya.

²⁹ uPetelo numuĩĩla, “Kanga tũlũ ensi asuukue, ĩpa ĩne sika neene.”

³⁰ ũYesu numuĩĩla, tai nakuĩĩla, ue nantende muna utiku wau-waauu, umunbĩ ĩkaa wikaalĩ kalakunkula nkua zibĩlĩ, ukinkaana nkua zitatu.

³¹ Ninduyo nwĩkakia kwiũga, kanga ĩinjĩpĩĩle kwikia ninduue, sika nĩkakukukaana kainiino. Tũlũ ensi naaũga iio-iioo.

ũYesu muGetisemane

³² Naaaza sunga pakĩtanga nakyukuĩtagua Getisemane, nuaĩĩla ĩamanigua aakue, “Kyalansĩ papa pĩna ukaa nilompa.”

³³ Nuasola uPetelo nuYakobo nuYohana palumuĩ nduyo nuandia kwitunduala nukukĩsũsũma.

³⁴ Nuaĩĩla, ĩnkolo yaane ĩtĩĩte usungu ukulu piipĩ kwikia; ĩĩmĩ papa, mukengeale!

³⁵ Nutela iniino, nugua pansĩ, nũilompa ya kĩna naa ishũũmĩkile, ityũngo ĩlĩ lyumukĩle.

³⁶ Nuũga, “Aba Tata, tũlũ ishũũmĩkile kumuako; ndeegelia ĩkĩĩko ĩkĩ; ĩpa sika kĩna numuloele ĩne, ĩpa kĩna umuloele ue.”

³⁷ Nuuza mwĩaagaana agonaa indoolo, numuĩĩla uPetelo, “Simoni, wagonaane indoolo. Sika wasũũmane kwikengeala kansaa kaĩmuĩ.”

³⁸ Kyalĩ nuukenge nukwilompa, mulekiingĩla muugemua. ĩNkolo ndoogue, ĩpa umuĩlĩ muneketũ.

³⁹ Nuenda kangĩ nulompa nuũga inkaani zizoziizoo.

⁴⁰ Nuuza kangĩ, nuaagaana agonaa indoolo, kuitĩ ĩmiiso maao alĩ maazaa malũto, sunga sika naalumana lwa kumushookelia.

⁴¹ Nuuza nkua ya katatu nuaĩĩla gonĩ gua ĩpaino, musũũpie; yakondaa, ityũngo lyapolokaa; laaĩ, uMuana-muntu wiĩĩkĩlua mumĩkono ya anamĩlandu.

⁴² Uukĩ kwĩĩni; laaĩ, nuasio nwinshakia wasũgamĩĩlaa.

Kwiguĩlua kwa kĩYesu

⁴³ Alĩ kĩlĩ witambula, ĩkamuĩ ũYuda nupika, umuĩ wikyumi naabĩlĩ, yĩensi niyũmbĩ, naatĩĩte maũmba nĩmasukulĩ, apũnile kuapolia naakulu nĩalangi nĩanampala.

⁴⁴ uNuasio nukumusakia alĩ waapĩĩle ĩkĩlĩngasĩĩlio, nuũga, nanĩkakumusuna, nuasio uuyo; mumuguĩle, mumusole kĩĩsa.

⁴⁵ Pĩna nuuza, ĩkamuĩ numuagaana, nuũga, Shekulu! numusunikia.

⁴⁶ Naanansula ĩmĩkono yaao, naamuguĩla.

⁴⁷ Umuĩ waao naalĩ ĩpaasio, nusopoola iyũmba, numukua umusese wa mupolia namukulu, numudumula ukutuĩ

⁴⁸ ũYesu nushookeelia, nuaĩĩla, mupũnile nĩmaũmbane nĩmasukulĩ munguĩle ĩne zĩ muleegelania?

⁴⁹ Ntondo zensi alĩ kuuza nĩĩlĩ ntongela yaani muNumba ya kĩNzua nanimania, sika namunguĩla, ĩpa aya matũlile koona uwandĩkua ukondeeligue.

⁵⁰ Paapo ĩamanigua naamuleka, naamanka tũlũ ensi.

⁵¹ Numusumbatĩ umuĩ numutiata, alĩ wĩtũngile mumwĩlĩ waakue ntiila nankamũ, naamuguĩla.

⁵² Ninduyo numĩleka ĩntiila nankamũ, numanka wĩkĩpuĩ.

ũYesu ntongela ya mupolio namukulu

⁵³ Naamutuala ũYesu kumupolia namukulu; naĩlundĩĩla ĩapolia naakulu nĩanampala nĩalangi tũlũ ensi

⁵⁴ uPetelo numutiatĩlĩĩle nuĩlĩ kulĩ, sunga kukĩanda kya mupolia namukulu; nwikyalansile palumuĩ nĩĩtumi, nwioota umooto.

⁵⁵ ĩApolia naakulu nilindĩ liensi naiidũũma ukuĩli kwa kĩYesu koona amuulage; sika naaona.

⁵⁶ Kuitĩ iingĩ alĩ akumukuĩla uulongo, ĩpa uukuĩli waao sika naukamantana.

⁵⁷ Sunga ĩĩĩa naĩĩmĩka nukwikuĩla ulongo, naiũga,

⁵⁸ ishie alĩ kumũigilie wiũga, ĩne nikakumĩtaula ĩnumba ĩĩ nya kĩNzua nanzengue kumĩkono, nukutondo zitatu nikijenga yĩngĩ nasika nzengue kumĩkono.

⁵⁹ Sunga niitĩ gaa uukuĩli waao sika naukamantana.

⁶⁰ Numupolia namukulu nuĩmĩka pakatĩ, numukolia ũYesu, nuũga, sika wishookeeliane kalukaani? Ĩa ikuĩla yaani kumuako.

⁶¹ Ĩpa nutuulia sunga sika nushookeelia kalukaani. Umupolia namukulu numukolia kangĩ, numuĩĩla, “Ue uue Kilisitone, Muana wa Mukulu?”

⁶² ũYesu nushookeelia, “Ingĩ neene, Niniinie mukakumuona uMuana-muntu wikyalansile pamukono wa kĩgoosia nwa ngũlũ, ĩupolokile nĩmalũnde ma kwigyulu.”

⁶³ uMupolia namukulu nuzitandulanga intiila zaakue, nuũga, yaakĩgua kwidũũma ĩakuĩli.

⁶⁴ Mũigagiaa uutukĩla-Nzua waakue; musĩĩgileei inie. Tũlũ ensi naalamula kĩina yumũjĩpĩĩle kwiulagua.

⁶⁵ ĩĨĩa naandia kukumutiĩla ĩmatĩ, naamukũnĩkĩla uusiu, naĩĩ kumukua inkũndi, naĩĩ kumuĩĩla, pũnia unakĩdagu! Sunga ĩĩtumi ndĩo naamukua impĩĩ.

uPetelo ukumukaana ũYesu

⁶⁶ uPetelo alĩ wĩĩlĩ panzi pakĩanda; nakaaza katũgua kamuĩ ka mupolia namukulu,

⁶⁷ nakamuona uPetelo wioota umooto, nakamutuupĩĩla, nakaũga, ue ninduue aza mwĩpalumuĩ nuMunazaleti ũYesu.

⁶⁸ Nukaana, nuũga, sika numuĩzĩ, sunga sika nigyũũlie yaasio nwitaambula ue. Nupũna kunzi sunga kumpongolo. uMumbĩ nukunkula.

⁶⁹ ĩKatũgua kaasio nakamuona kangĩ, nakandia kukuaĩĩla ĩaasio naalĩ ĩĩmĩkile paasio, “Uyu wayu umuĩ waao.”

⁷⁰ Nukaana kangĩ. Katũngo kaniino kangĩ, ĩaasio naalĩ ĩĩmĩkile paasio naamuĩĩla uPetelo, “Kulukuuluu ue mwĩpalumuĩ ndĩo kunsooko ue uMugalĩlaya.”

⁷¹ Nuandia kwijũma nukwilapa, “Sika numuĩzĩ umuntu nuasio namukumutambula.”

⁷² Ĩkamuĩ umumbĩ nukunkula nkua ya kabĩlĩ. uPetelo nulũjuka ulukaani luasio naalĩ muĩĩlue nũYesu, “uMumbĩ ĩkaa wikaalĩ kalakunkula nkua zibĩlĩ, ukinkaana nkua zitatu.” Pĩna nulupindĩkia, nulĩla.