Maliko 12 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mpiani ya mugunda wa mĩzabiibu

¹ Nuandia kukĩtambuĩla nĩndĩo kumpiani, “Muntu alupandĩĩle mĩzabiibu mumugunda, nukita ĩkito, nulĩsĩmbĩla ityulĩ lya kusokolela inkali, nukĩzenga ĩkĩlĩngo kya kulilĩla, nualindĩĩlia ĩalĩmi, nulongola musĩnzo kulĩ.

² Sunga pityũngo liakue numutuma umwĩtumi kualĩmi koona wazaanũnkule inkali za mĩzabiibu kualĩmi a mugunda.

³ Naamuguĩla, naamukua, namupunia kunzi, naamushookia mugila kakĩntu.

⁴ Numutuma kangĩ kumiao mwĩtumi wĩngĩ, nunuasio naamukuanga inguma mwityũe, naamutukanga.

⁵ Numutuma numuua, unuasio naamuulaga; nĩĩa iingĩ, ĩĩ naaakua, ĩĩa naaaulaga.

⁶ Alĩ kĩlĩ utĩĩte umuĩ, umuana waakue muloogua; uyu numutuma kumiao nkua ya mumalĩĩlio, nuũga, ‘Ĩkakumukulia umuana waane.’

⁷ Ĩpa ĩalĩmi aasio naĩtambuĩla eene kueene, uyu wayu musaali, kuĩni kumuulage, nuusaali ukitũla wĩĩtu.

⁸ Naamuguĩla, naamuulaga, naamutaaga kunzi ya mugunda wa mĩzabiibu.”

⁹ Ukitenda yaani gua, umukola mugunda wa mĩzabiibu. Ukiiiza nukukuaulaga ĩalĩmi aasio, numugunda waasio wa mĩzabiibu ukakuapeela antu ĩngĩ?

¹⁰ Sunga uwandĩkua uu mwikaalĩ kukuusomane, “Igyũe naalĩ alĩsiitile ĩazengi liasio lialĩĩ gyũe kyulu lya kuluũno.

¹¹ ulukaani ulu lupũnile kwa kĩShekulu ndulo ingĩ lwa ukulĩlua pamiiso mĩĩtu.”

¹² Naadũũma amuguĩle, naaliopooka iyũmbĩ, kuitĩ alĩ alĩngile kĩna kumpiani niasio aluataambuĩle ĩeene. Naamuleka, naalongola.

Kyolio lya kumupũnĩlia uKaisali koodi

¹³ Naatuma kumuakue katũmpĩ ka Apalisayo nĩantu a kĩHelode amutege muutambuli waakue.

¹⁴ Naamuagaana, naamuĩĩla, “Mumania, kumanile kĩna ue uue wĩmuntu wa tai, sunga sikukukunkunalaa kumpola za muntu wensi, kunsooko sikukulaaa kamakelu ma antu, ĩpa mutai ukumĩmanagiaa ĩnzĩla ya kĩNzua. Iizane kukumupeela uKaisali ĩkoodi anga zũi.”

¹⁵ Kumupeelene katia kuleke kumupeela. Ninduyo pĩna nulĩnga uunamampĩlu waao, nuaĩĩla, nĩkĩ mwingema, Ndeetelĩ ĩshilinge ndaae.

¹⁶ Naamĩleeta, Nuaĩĩla, aityũe ĩlĩ lya kuani munu nuwandĩkua uu. Naamuĩĩla, lya kĩKaisali.

¹⁷ ũYesu nuaĩĩla, mupeelĩ uKaisali naya kĩKaisali, naya kĩNzua mupeelĩ uNzua. Naamukulilua dũũ.

Kyolio lya wiiuki kwipũna muakiu

¹⁸ NĩAsadukayo, naakuũgaa kutilĩ kawiiuki, naamuagaana, naamukolia naaũga,

¹⁹ “Mumania, uMusa alukuandĩkĩĩle itĩ, ‘Kanga umuntu wakiisie umunũna wamuleke umusungu mugila kamuana, umunũna waakue wamusole umusungu nuasio, nduyo wamuligĩlie umunũna uluuli.’

²⁰ Alĩ akoolĩ antu mupũngati ĩkĩnũna; nwa muandio numusola musungu, nukia, nduyo sika nuleka kaluuli.

²¹ Nwa kabĩlĩ numusola, nukia, sika nuleka kaluuli; numwa katatu iio;

²² sunga tũlũ ensi naa mupũngati sika naaleka kaluuli. ĩMpelo ya ĩa tũlũ nukia numusungu nuasio.

²³ Muwiiuki pĩna ikiiiuka, ukitũla musungu wa kuani muĩa? Kunsooko tũlũ ensi naa mupũngati alĩ amusolile.”

²⁴ ũYesu nuaĩĩla, si luulone mulimĩlĩĩle kunsooko sika mumanile uwandĩkua sunga ingũlũ za kĩNzua.

²⁵ Kuitĩ pĩna ikiiiuka kwipũna muakiu, sika akutoolaa sunga kwitoolua, ĩpa ikitũla zĩ amalaĩka mwigyulu.

²⁶ Nukumpola za akiu kĩna akũiukagiguaa, mwikaalĩ kalasomane mukĩtabũ kya kĩMusa, mumpola za kĩtũnkũ, kĩna uNzua alumuĩĩlĩĩle nuũga, Ĩne neene nĩNzua wa kĩIbũlahimu nuNzua wa kĩIsaki nuNzua wa kĩYakobo?

²⁷ Sika Nzua wa akiu ĩpa wa apanga. Mulimĩlĩĩle nangũlũ!

Kyolio lilyagĩĩlio nikyulu

²⁸ Umuĩ wa alangi nuuza nwigyũlia ĩkĩkunguma ni nduyo, nulĩnga ya kĩna waashookelĩĩlie iiza, numukolia, lyagĩĩlio kĩ nalya muandio mutũlũ.

²⁹ ũYesu nushookeelia, lya muandio ntĩĩlĩ, Iigia Ĩsilaeli, ũShekulu Nzua wĩĩtu ingĩ Shekulu wing'ene.

³⁰ Ninduue muloogue ũShekulu Nzua wako kumoo waako tũlũ nukunkolo yaako tũlũ nukumasala maako tũlũ nukungũlũ zaako tũlũ.

³¹ Nĩlya kabĩlĩ ntĩĩlĩ, Muloogue umunakaa waako kĩna ĩnkolo yaako. Kutilĩ ilyagĩĩlio naliĩngĩ nikyulu kwikĩla aya.

³² uMulangi numuĩĩla tai Mumania, utambuĩle iiza kĩna uNzua ingĩ Nzua wing'ene, sunga kutilĩ nuĩngĩ isiititũla umuene dũũ.

³³ Nukukumuloogua umuene kunkolo yensi nukuulĩngi wensi nukungũlũ zensi, nukukumuloogua umunakaa kĩna ĩnkolo yaako; inkaani izi zukukĩlaa ĩmapolia nĩmakũmbĩ tũlũ mensi.

³⁴ NũYesu pĩna nuona kĩna washookeelia kumasala, numuĩĩla, “Ue sika wĩkulĩ muutemi wa kĩNzua.” Kwĩpũna paapo kutilĩ kaumuĩ naalugagũilie kukumukolia kangĩ.

Kilisito Muana wa kĩDaudi

³⁵ ũYesu pĩna alĩ wimania muNumba ya kĩNzua nushookeelia, nuũga, “Nĩkĩ ĩalangi akuũgaa kĩna uKilisito ingĩ muana wa kĩDaudi.

³⁶ uDaudi umuene aluũgile kuusũũmi wa kĩMuau Muelu, ‘ũShekulu alumuĩĩlĩĩle ũShekulu waane, Kyalansa pamukono waane wa kĩgoosia Sunga pĩna nĩkakuaĩĩka ĩanlugu aako Nsĩlĩlĩ ya mĩgulu yaako.’”

³⁷ “uDaudi umuene numuĩta, ‘Shekulu,’ yatũla mbii gua, wĩĩ muana waakue?” Numulundo alĩ ukumutegeela kwilyumbi.

Kukĩsukuka nĩalangi

³⁸ Nuaĩĩla muumania waakue, ĩsukukĩ nĩalangi, naaloe kwiumba-umba ĩajialile intiila nandĩĩpũ nukwiũgigua mumagulĩlo,

³⁹ nukukikyalansa kuntongela mumasũnagogi nukumatengu ma kuntongela pandia.

⁴⁰ Akulĩaa numba za akiĩlua, nukuunamampĩlu akulompaa ilĩĩpũ; ĩa ijililigia ulamulua naulũto.

Sadaka ya mukĩĩlua mutũka

⁴¹ Nduyo nwikyalansa nutungĩnkana pauĩĩkĩlo wa sadaka, nũilaa kĩna umulundo wiiikĩla ĩmapeesa muuĩĩkĩlo wa sadaka. Agolĩ iingĩ naaĩĩkĩla mingĩ.

⁴² Nuuza musungu umuĩ, mukiĩlua, mutũka, nuĩĩkĩla pishenti pibĩlĩ, lika kya hela ĩmuĩ.

⁴³ Nuĩĩta ĩamanigua aakue, nuaĩĩla, tai namuĩĩla, uMukiĩlua uyu namutũka uĩĩkĩĩle nangũlũ kwikĩla tũlũ naiĩĩkĩla muuĩĩkĩlo wa sadaka,

⁴⁴ Kuitĩ ĩa tũlũ aza iĩĩkĩla kwipũna munsao zaao naningĩ, ĩpa uyu azuĩĩkĩĩle yensi muutũka waakue, ziizo ndia zaakue zensi.