Maliko 11 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu wiingĩla mũYelusalemũ zĩ mutemi

¹ Pĩna naasũgamĩĩla kũYelusalemũ piipĩ nĩBetipage nĩBetania pankonko ya mĩzeituni, nuatuma abĩlĩ muamanigua aakue,

² nuaĩĩla, lendĩ sunga kukĩsaalĩ ĩkio namutungĩnkĩĩne, nĩpĩna mukiingĩla muasio, ĩkamuĩ mukiona muana-ndoguĩ mutũngue nasika waladaamĩĩlua numuntu; mutũngulĩ muleetĩ.

³ Wensi kanga wamukolie, Nĩkĩ mwitenda itĩ, ũgĩ, Shekulu umusiiile, ĩkamuĩ ukakumushookia kangĩ umuana-ndoguĩ papa.

⁴ Naalongola, naamuona umuana-ndoguĩ mutũngue pamulango kunzi ya nzĩla nankulu; naamutũnguĩla.

⁵ Nĩantu naĩngĩ naalĩ ĩĩmĩkile paasio naaĩĩla, mwitenda yaani namukumutũnguĩla umuana-ndoguĩ?

⁶ Naaaĩĩla kĩna ũYesu alĩ ualagĩlĩĩlie, ndĩo naaalekela.

⁷ Naamutualĩla ũYesu umuana ndoguĩ, naala intiila zaao mukiania yaakue; numudaamĩĩla.

⁸ Iingĩ naaala intiila zaao munzĩla, ĩĩa naatema intambĩ mumĩgunda nukukuzaala munzĩla.

⁹ ĩAntu naalĩ atongĩĩle nĩaasio naalĩ ĩtiatile naĩtunta induli zaao naaũga, Osiana, wakũmazukigue nũjile muliina lya kĩShekulu!

¹⁰ Ukũmazukigue uutemi naupolokile, wa kĩtata wĩĩtu uDaudi! Osiana kukiania kwigyulu!

¹¹ Nũingila mũYelusalemũ munumba ya kĩNzua; pĩna nulaaanga tũlũ yensi nandĩ zensi, kuitĩ alĩ yaazaa mpĩndĩ nupũna nuenda kuBetania palumuĩ nĩnaikyumi naabĩlĩ.

Mukuu nasika upĩĩle inkali

¹² Mudaau pĩna naapũna kuBetania, nukolua nzala.

¹³ Nuona kĩna kulĩ mukuu nalĩ utĩĩte ĩmalũka, nuenda koona waone yaani naĩkoolĩ muasio. Pĩna nuusũgamĩĩla sika nuona kakĩntu isiititũla ĩmalũka udũũ, kuitĩ sika alĩ tyũngo lya nkali.

¹⁴ Nushookeelia nuuĩĩla, sunga ĩkalĩ nakalĩ, kaumui walekilĩa inkali kumuako. Nĩamanigua aakue naiigia.

ũYesu ukumielia iNumba ya kĩNzua

¹⁵ Naapika kũYelusalemũ, nũingĩla muNumba ya kĩNzua, nuandia kukuaĩnga ĩaasio naalĩ igulia nukwigula munumba ya kĩNzua nuzigalulanga imeeza za akaĩĩsia-mpeesa, nĩ matengu maagulia nkunda.

¹⁶ Sunga sika numuleka kaumuĩ wakĩlie ĩkĩseme pakatĩ ya numba ya kĩNzua.

¹⁷ Nũimania nuũga, “Sika yandĩkuene kĩna ĩnumba yaane ikiĩĩtua numba ya wĩtekeli kundugu tũlũ zensi? Ĩpa inie gua mwamĩtendaa yĩĩ lyũlũ lya aleegelania.”

¹⁸ ĩApolia naakulu nĩalangi naaziigia impola, naadũũma ĩnzila ya kumuulaga kuitĩ alĩ amoopookaa, kunsooko iyũmbĩ tũlũ alĩ lyakũmagiaa kuumania waakue.

¹⁹ Nĩpĩna nayĩĩ mpĩndĩ nulega mukaa.

Ngũlũ za usuĩĩli

²⁰ Mudaau pĩna alĩ akĩlile, naauona umukuu uumaa kwipũna kũtyina.

²¹ uPetelo nwijuka impola zaakue numuĩĩla, shekulu laaa, umukuu naazuuzũmile, uumaa!

²² ũYesu nushookeelia nuaĩĩla, musuĩĩle mwa kĩNzua.

²³ Tai namuĩĩla, Wensi nukakumĩĩĩla ĩnkonko ĩĩ, Kuuluka utaague munanza, sunga walekitũla ninkankani munkolo yaakue, ĩpa wasuĩĩle kĩna zaasio nwitambulla zitendeke, zikitũla zaakue.

²⁴ Kunsooko ĩĩ namuĩĩla, Mensi namukumapeepia muulompi, suĩĩlĩ ya kĩna mukumaanũnkula, nindayo mikitũla maani.

²⁵ Pĩna muĩmĩkile nukwilompa, lekelĩ kanga ĩmutĩĩte lukaani kumuntu; koona nuTata waani nwa kwigyulu wamuleegelie inie uutimu waani.

²⁶ Ĩpa kanga uniinie sika mũleegelania ĩmĩlandu, sunga uTata waani nwa kwigyulu sika ukakumuleegelia inie uutimu waani.

Kyolio mumpola za usũũmi wa kĩYesu

²⁷ Naapika kũYelusalemũ kangĩ, pĩna alĩ wiumbaumba panumba yakiNzua, ĩapolia naakulu nĩalangi nĩanampala naamuagaana,

²⁸ naamuĩĩla, kuusũũmi kĩ witenda inkaani izi; kangĩ waani naalukupĩĩle uusũũmi uu uzitende izi?

²⁹ ũYesu nuaĩĩla, “Nĩkakumukolia lukaani lumuĩ, niniinie munshookeelie; paapo nĩkakumuĩĩla kuusũũmĩ kĩ nukutendaa izi.

³⁰ uUbadĩĩzo wa kĩYohana alĩ upũnile kwigyulu kanga kuantu? Nshookeeliĩ.”

³¹ Naĩtambuĩla eene kueene naiiũga, kanga kuũge, Alĩ upũnile kwigyulu, ukiũga, Nĩkĩ gua sika namumusuĩĩla.

³² Ĩpa kanga kuũge, Upũnile kuantu? alĩ oopokile ĩantu, kuitĩ ensi alĩ amuoonie uYohana kĩna munakĩdagu wa tai.

³³ Naamushookeelia ũYesu, naaũga, sika kumanile. ũYesu nuũga, sunga nineene sika nukumuĩĩla inie kuusũũmi kĩ nukuzitendaa izi.