Maliko 10 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kyolio lya wĩleki

¹ Nulega kuasio nupika kumĩmbĩ za Uyahũdi nukwityumbĩ liYolidani, maũmbĩ namĩlundĩĩla kangĩ namamuagaana, nuamania kangĩ kĩna alĩ wijiĩlĩĩle.

² ĩApalisayo naamuagaana naamukolia koona amugeme, mũikone umugoosia kukumuleka umusungu waakue?

³ Nuashookeelia nuaĩĩla, “uMusa alumulagĩlĩĩlie yaani?”

⁴ Naamuĩĩla, “uMusa alukulekĩĩle kwiandĩka ĩmbalua ya kĩlekela nukukumuleka.”

⁵ ũYesu nuaĩĩla, “Kunsooko ya ukakũ wa nkolo zaani numuandĩkĩlia ilyagĩĩlio ĩlĩ.

⁶ Ĩpa gua kwipũna umuandio wa utũndua wa unkũmbigyulu, ‘uNzua nuaumba umugoosia numukĩĩma.’

⁷ ‘Kunsooko ĩĩ umuntu ukakualeka ũshee nunina, wakamantane numusungu waakue;

⁸ nĩaasio naabĩlĩ ikitũla muĩlĩ umuĩ sunga sika ikitũla abĩlĩ kangĩ ĩpa muĩlĩ umuĩ.’

⁹ Iio gua uNzua naalukĩkamantĩĩnie, umuntu waleke kukĩkamantuula.”

¹⁰ “Sunga numunumba ĩamanigua naamukolia impola za lukaani luasio.

¹¹ Nuaĩĩla, wensi nukakumuleka umusungu waakue nukwitoola wĩngĩ, wagololagiaa;

¹² numusungu kanga wamuleke umugoosia waakue nukwitoolua numuntu wĩngĩ, wagololagiaa.”

ũYesu ukuakembeta ĩang'inia

¹³ Naamutualila ĩang'inia waasumbule; ĩamanigua aakue naaa kuagilia.

¹⁴ ũYesu pĩna nuaona nuĩĩpĩlua, nuaĩĩla, “Alekĩ ĩang'inia aaze kumuane, muleke kuagilia, kuitĩ naĩkĩna ĩa, uutemi wa kĩNzua ingĩ waao.

¹⁵ Tai namuĩĩla, uNuasio nasikuwaanũnkuĩle uutemi wa kĩNzua zĩ mung'inia sika ukakuwingĩla kainiino.

¹⁶ Nuakũmbasĩla nuĩĩkĩla ĩmĩkono yakue mumiao, nuakembeta.”

Musumbatĩ namugolĩ widũũma uupanga wa kalĩ nakalĩ

¹⁷ Sunga pĩna alulonguĩle munzĩla muntu umuĩ numumankĩĩla, nutũngama pamuakue, numukolia, “Mumania nwĩmuuza, ntende yaani nsũũme kukuusaala uupanga wa kalĩ nakalĩ.”

¹⁸ ũYesu numuĩĩla, “Nĩkĩ winjĩta nĩmuuza. Kutilĩ namuuza isiititũla umuĩ dũũ nduyo uNzua.”

¹⁹ Umamanile ĩmalagĩĩlio, “Ulekiulaga, ‘Ulekigololia, Ulekiiia, Ulekikuĩla uulongo, Ulekipembeelia, kulia utata waako numaau waako.’”

²⁰ “Numuĩĩla, mumania aya mensi namakendegelĩĩle kwipũna uulĩsia waane.”

²¹ ũYesu numulaa, numuloogua, numuĩĩla, “Umukeepeele lukaani lumuĩ; longola, ugulie tũlũ yensi nutĩĩte, uapeele ĩatũka, ninduue ukitũla utĩĩte ĩkĩuto kwigyulu; kangĩ nzuu untiate.

²² Nusiununala kuusiu kulukaani ulu, nulongola nuusungu kunsooko alutĩĩte nsao ningĩ.”

Igilia ya ugolĩ

²³ ũYesu nulaaanga, nuaĩĩla ĩmanigua aakue, “Ikakũ kuaasio akola nsao kwiingĩla muutemi wa kĩNzua!

²⁴ ĩAmanigua naakulĩlua kunkaani zaakue. ũYesu nushookeelia kangĩ, nuaĩĩla, aana aane, ikakũ kuaasio naasanilie inshao kwiingĩla muutemi wa kĩNzua!

²⁵ Itontũ ĩngamĩa kwisheelela munsungĩĩli ya lusinge kwikĩla umugolĩ kwiingĩla muutemi wa kĩNzua.”

²⁶ Naakũmĩkia nangũlũ naamuĩĩla, “Waani gua nusũũmile kwigũnĩka?”

²⁷ ũYesu nualaaa nuũga, “Kuantu sika ishũũmĩkile, ĩpa kwa kĩNzua sika iio, kunsooko tũlũ zensi zishũũmĩkile kwa kĩNzua.

²⁸ uPetelo nuandia kukumuĩĩla, laaa, ishie kwalekile tũlũ yensi nakukutiata ue.”

²⁹ ũYesu nuũga, “Tai taaii namuĩĩla, muntu wensi nulekile ĩnumba katia mĩgunda kunsooko yane nukusooko ya Mpola na Nziiza

³⁰ ukipeegua nkua gyana ĩpaino munityũngo ĩlĩ, numba nĩanũna niagũlĩ nunina nĩaana nĩmĩgunda palamuĩ nuupaatigua, numuunkũmbigyulu naũjile uupanga wa kalĩ nakalĩ.

³¹ Ĩpa iingĩ naa muandio ikitũla a mumalĩĩlio, nĩamumalĩĩlio ikitũla a muandio.”

Ukũnukuli wa katatu wa nkia yaakue ũYesu

³² Nindĩo alĩ ĩĩlĩ munzĩla naiinankĩla kũYelusalemũ. ũYesu alĩ watongelaa; naakulĩlua, nindĩo naalĩ ĩtiatile naoopooka. Nuatuala kangĩ naikyumi naabĩlĩ nuandia kukuaĩĩla nazĩkakumuagaana,

³³ nuũga, laaaĩ kwinankĩla kulunziĩ kũYelusalemũ, nuMuana-muntu ukiĩĩkĩlua mumĩkono ya apolia naakulu nĩalangi, nĩndĩo ĩkakumulamula kwiulagua; ĩkakumuĩĩka mumikono ya ndugu nazĩngĩ,

³⁴ nĩndĩo ĩkakumupopota nukukumutiĩla ĩmatĩ, nukukumukua namĩkoa nukukumuulaga, nĩpĩna intondo zitatu zikikila ukiiiuka.

Lyompi lya kĩYakobo nuYohana

³⁵ uYakobo nuYohana, ĩaaana a kĩZebedayo, naamuagaana naamuĩĩla, mumania, kusiiile ukutendele luensi nakukakukulompa.

³⁶ Nuaĩĩla, musiiile numutendele yaani?

³⁷ Naamuĩĩla, ukugombie ishie kwikyalanse umuĩ kumukono waako wa kĩgoosia, umuua kumukono waako wa kĩkĩĩma muukulu waako.

³⁸ ũYesu nuaĩĩla, sika mumanile namukululompa. Mwishũũmane kwikopela ĩkĩĩko nanukukopelaa ĩne, nukwibadĩĩzigua uubadĩĩzo nanumubadĩĩziligue ĩne?

³⁹ Naamuĩĩla, kusũũmile. ũYesu nuaĩĩla, ĩkĩĩko nanukukopelaa ĩne mukakukĩkopela, nuubadĩĩzo nanumubadĩĩzĩligue ĩne mukibadĩĩzigua;

⁴⁰ ĩpa mumpola za kikyalansa kumukono waane wa kĩgoosia nuwakĩkĩĩma, sika lukaani luane kwipeelana, ĩpa ikipeegua ĩaasio naalĩ azĩpĩlĩligue.

⁴¹ Nĩaasio naikyumi pĩna naaziigia, naandia kukuatakĩla uYakobo nuYohana.

⁴² uYesu nuaĩĩla, mumanile kĩna ĩaasio naakusĩĩgaguaa kũtũla akulu a ndugu nazĩngĩ akudemelaa kungũlũ, nĩakulu aao akĩoonatĩĩlagiaa.

⁴³ Ĩpa sika ikitũla itĩ kumiani, ĩpa wensi nusiiile kwitũla mukulu mumiani ukitũla mwĩtumi waani;

⁴⁴ wensi nusiile kwitũla wa muandio mumiani ukitũla musese wa tũlũ ensi.

⁴⁵ Kuitĩ uMuana-muntu sika alũjile kukĩtumĩlua ĩpa kukĩtuma nukwipũnia uuumĩ waakue wĩĩ ukomoli kunsooko ya iingĩ.

Mupokũ Balitimayo wikamigua

⁴⁶ Naapika kũYeliko. Pĩna alĩ wilega kũYeliko palumuĩ nĩamanigua akue niyũmbĩ nikyulu, umuana wa kĩTimayo, uBalitimayo, mulompi namupokũ, alĩ wikyalansile panzĩla.

⁴⁷ Ninduyo pĩna nũigia kĩna ingĩ ũYesu Munazaleti, nuandia kwikuuta, nuũga, ee Yesu Muana wa kĩDaudi, unkolelua kĩnishungu!

⁴⁸ Iingĩ naamugilia koona watuulie, ĩpa nulongoleka kukĩtunta, ee Muana wa kĩDaudi unkolelue kĩnishungu!

⁴⁹ ũYesu nuĩma, nuũga, muĩti! Naamuĩta umupokũ, naamuĩĩla, kamia nkolo; uuka, ukukuĩta.

⁵⁰ Nutaaga ĩntiila yaakue, nupũũta, numuagaana ũYesu.

⁵¹ ũYesu numushookeelia numuĩĩla, usiiile nukutendele yaani? uMupokũ numuĩĩla, shekulu, nsiiile moone.

⁵² ũYesu numuĩĩla, “Longola, uusuĩĩlĩ waako wakukamagiaa.” Ĩkamuĩ nuona, numutiata munzĩla.