Luka 9 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwitumua kumuao naikyumi naabĩlĩ

¹ Pĩna nuĩĩta ĩaasio naikyumi naabĩlĩ, nuapeela ingũlũ nuusũũmi mumasĩĩmuĩ tũlũ nukwikamia ĩmauluĩle.

² Nuatuma autanantie uutemi wa kĩNzua nukukuakamia ĩaluĩle.

³ Nuaĩĩla “Mulekishola kakĩntu kya musĩnzo waani, si nkome, si mpĩnda, si mapũli, simpiia; sunga kaumuĩ waani walekishola ĩmĩnkũmbĩ ĩbĩlĩ.

⁴ Nĩnumba yensi namukiingĩla, kyalĩ muumo sunga mupũne muasio.

⁵ Nĩaasio nasika ĩkakumusũgamĩĩlia inie, pĩna mwipũna mukaa niasio lukũnũntĩ ulukundĩ mumĩgulu yaani wĩĩukuĩli kumiao.”

⁶ Naalongola, naakĩlĩla mũishaalĩ, naitanantia iMpola naNziiza nukwikamania ĩantu tũlũ pensi.

Ukunguali wa kĩHelode

⁷ uMutemi Helode nũigia impola tũlũ naalĩ zitendekile nukunguala kunsooko naĩngĩ alĩ iũgaa ya kĩna uYohana wiiukile kwipũna muakiu,

⁸ ĩĩĩa ya kĩna uElia wigyelile, nĩĩĩa ya kĩna umuĩ wa anakĩdagu a kalĩ wiiukile.

⁹ uHelode nuũga; “uYohana alĩ namudumuĩle ityũe, ĩpa waani uyu naniigia impola kĩna izi?” Nudũũma wamuone.

Kukualĩĩsia antu 5000

¹⁰ ĩAtumua pĩna naashooka, naamuganuĩla impola tũlũ naalĩ azitendile. Nuasola nulongola nĩndĩo ing'ene sunga kukaa nĩkuĩtaguaa Betisaida.

¹¹ Ĩpa ĩmaũmbĩ pĩna namamana namamutiata; nuasũgamĩĩlia nuĩ kuatambuĩla impola za utemi wa kĩNzua, nuakamia ĩaasio naalĩ asiiile kwikamigua.

¹² Pĩna ĩmpasu alishaalĩĩla, ĩaasio naikyumi naabĩlĩ naamuagaana namuĩĩla, “Malage ĩmaũmbĩ malongole kũishaalĩ nukumĩgunda nĩpilimĩkĩlĩĩlie aligie pakugona nindia, kuitĩ ĩpa pĩna kuĩlĩ mbuga ntilĩ.”

¹³ Nuaĩĩla; “Apeelĩ uniinie india.” Naaũga; “Kuagila kakĩntu nakiĩngĩ isiititũla ĩmapũli mataano ninshiĩ zibĩlĩ kanga kusiitienda kuagulĩlie ĩantu ĩa tũlũ india.”

¹⁴ Kuitĩ ĩagoosia naalĩ akolĩ alĩ zĩ magana ma nzogũ mataano. Nuaĩĩla ĩamanigua aakue; “Ikyalansiĩ ĩantu nkĩlĩlĩ-nkĩlĩlĩ, zensi ĩzitĩĩte antu makumi mataano.”

¹⁵ Naatenda iio, naaikyalansia tũlũ.

¹⁶ Numasola ĩmapũli mataano ninshiĩ zibĩlĩ, nulangamĩla kwigyulu nuikembeta nuiega, nuapeela ĩamanigua aakue aatengelie ĩanamulundo.

¹⁷ Naalĩa naikyuta tũlũ; naamasoleela ĩmaminamgulua naalĩ masaagile, itooto kyuminaibĩlĩ.

Ukũmuuli wa kĩPetelo kĩna ũYesu ingĩ Kilisito

¹⁸ Pĩna alĩ wilompa wing'ene, ĩamanigua aakue naalĩ ĩpalumuĩ ninduyo, nuakolia; “ĩMaũmbĩ makuũgaa ĩne neene waani?”

¹⁹ Naamushookelia naaũga; “Yohana Mubadĩĩzia, ĩpa ĩĩĩa akuũgaa Elia, nĩĩĩa ya kĩna umuĩ wa anakĩdagu a kalĩ wiiukile.”

²⁰ Nuaĩĩla; “Ainie gua, mukuũgaa ĩne neene waani?” uPetelo nushookeelia nuũga, “Ue uue Kilisito wa kĩNzua.”

ũYesu wikũnukula kĩna ukikia nukwiiuka

²¹ Nuasugula nukukualagĩĩlia aleke kumuĩĩla kaumuĩ ulukaani ulu;

²² nuũga; “Yumũjĩpĩĩle uMuana-muntu kwiaagigua mumpola ningĩ nukwishiitua nĩanampala nĩapolia naakulu nĩalangi, nukwiulagua; nulutondo lwa katatu kwiiukigua.”

Wĩĩtua wa kĩiima

²³ Nuaĩĩla tũlũ ensi; “Wensi nusiile kwintiata nwĩĩime ĩmaakue, waukenke umusalaba waaakue lutondo luensi, wantiate ĩne.

²⁴ Kuitĩ wensi nusiiile kwigũna uumĩ waakue ukakuulimĩĩlia, ĩpa wensi nukakuulimĩĩlia uumĩ waakue kunsooko yaane, uuyo ukakuugũna.

²⁵ Kuitĩ umuntu wishaĩpigua yaani kanga wauligie uunkũmbigyulu wensi nukukĩlimĩĩlia, katia kukĩkapĩkia umuene?

²⁶ Kuitĩ wensi nukinkolelua inshoni ĩne ninkaani zaane, uMuana-muntu ukakumukolelua inshoni unuasio pĩna ukiiza muukulu waakue nuwa kĩTata nuwa amalaĩka naeelu.

²⁷ Nineene nukumuĩĩla ĩtai; Akoolĩ muĩa naĩĩmĩkile ĩpa nasika ikilũla kaukiu sunga auone tangua uutemi wa kĩNzua.”

Kwikaĩlĩka ikyelu

²⁸ Pĩna nukondia kwitambula inkaani izi, nazikĩla zĩ ntondo munaana, nuasola palumuĩ nduyo uPetelo nuYohana nuYakobo, nunankĩla munkonko walompe.

²⁹ Pĩna alĩ wilompa, kyelu lya usiu waakue nalĩkaĩlĩka, nintiila zaakue nazitũla nzelu pee, naziimĩlĩmĩnta.

³⁰ Laaa, antu abĩlĩ alĩ ĩkĩtambuĩla ninduyo, ndĩo alĩ uMusa nuElia,

³¹ naalĩ igyelĩĩle muukulu, naitambula impola za kulega kumuakue kĩna ukakuzitimĩĩlia kũYelusalemũ.

³² uPetelo nĩaasio naalĩ ĩpalumuĩ ninduyo, ĩmiiso maao alĩ maalũto, ĩpa pĩna naalaĩla naauona uukulu waakue, nĩantu nabĩlĩ naalĩ ĩĩmĩkile palumuĩ ninduyo.

³³ ĩAasio pĩna naalekanuka ninduyo, uPetelo numuĩĩla ũYesu, “Shekulu, iiza ishie nakwĩĩpa, kuzenge pigyũnda pitatu, kamuĩ kaako, kamuĩ ka kĩMusa, kamuĩ ka kĩElia;” sika numanile nĩkĩna witambula.

³⁴ Pĩna alĩ kĩlĩ witambula ĩzaasio, lyũnde naliĩza nalĩakũnĩkĩla; naoopoka pĩna alĩ iingĩla mũlyũnde.

³⁵ Luli nalupũna mwilyũnde naluũga; “Uyu wayu Muana waane, Musaagulua waane, mũigiĩ umuene.”

³⁶ Nĩpĩna ululi nalukondia kwitambula, ũYesu nũgyelela wing'ene dũũ, Nĩndĩo naatuulia; sika naamuĩĩla kaumuĩ intondo zaasio kalukaani naalĩ azioonie.

Musumbatĩ munalĩsĩĩmuĩ wikamigua

³⁷ Palutondo lwa kabĩlĩ pĩna naiika munkonko, yũmbĩ kyulu nalĩtaagana ninduyo.

³⁸ Laaa, muntu mwiyũmbĩ nwĩtunta nuũga; “Mumania, nakupeepia umulaae umuana waane kunsooko ingĩ muana waane wing'ene.

³⁹ Laaa, ĩlĩsĩĩmuĩ lyukumũtyapaa; kumpũpũkĩlĩ ukukuutaa, ndĩlo lyukumugalagalagiaa sunga ukupũũtagia ipyombolũ, kangĩ lyukutinagiaa kukumulegela, nalĩkumutiunulanga.”

⁴⁰ naapeepia ĩamanigua aako kukulĩĩnga, alemua

⁴¹ ũYesu nushookeelia nuũga; Kaaa, wĩleli naugila kausuĩĩli nuwa uleki! Sunga nalĩ nĩĩme kumiani nukukĩuumĩĩlia niniinie. Muleete umuana waako kunu.

⁴² Pĩna alulonguĩle, ĩlĩsĩĩmuĩ nalĩmuguusia pansĩ nukukumugalagalia. ũYesu nulĩtakĩla ĩlĩsĩĩmuĩ, numukamia umuana numushookelia ũshee.

⁴³ Tũlũ ensi naakulĩlua pĩna naaona uukulu wa kĩNzua. Nĩndĩo pĩna alĩ akuzikulĩlua tũlũ naaluzitendile, nuaĩĩla ĩamanigua aakue,

Ukũnukuli wa kabĩlĩ wa nkia yaakue ũYesu

⁴⁴ “Inkaani izi naziingĩle muakutuĩ aani, kuitĩ uMuana-muntu ukiĩĩkĩlua mumĩkono ya antu.”

⁴⁵ Ĩpa sika naalĩnga ulukaani luasio; alĩ lupisigue kumiao aleke kululĩnga; naoopoka kukumukolia ĩndogolelio ya lukaani luasio.

Waani namukulu

⁴⁶ Nautũla wĩkungumi pakatĩ yaao, kĩna waani namukulu mumiao.

⁴⁷ ũYesu pĩna nulĩnga ĩmasĩĩgo ma nkolo zaao, numusola mung'inia numuĩĩka pamuakue,

⁴⁸ nuaĩĩla; “Wensi nukumuanũnkulaa umung'inia uyu muliina liane ukunanũnkulaa uneene; kangĩ wensi nukunanũnkulaa ĩne ukumuanũnkulaa uyo naaluntumile; kuitĩ namuniino pakatĩ yaani tũlũ, uuyo mukulu.”

⁴⁹ uYohana nuũga; “Shekulu, alĩ kumuoonie umuntu naalĩ wiĩnga ĩmasĩĩmuĩ kuliina liako, nakumugilia kunsooko sika alĩ kwĩtiatile nindiishie.”

⁵⁰ ũYesu numuĩĩla; “Leka kumugilia, kuitĩ nasikumusiitile inie wĩĩlĩ paluandĩa luani.”

Asamalia ishiita kukumusũgamĩĩlia ũYesu

⁵¹ Pĩna ntondo zaakue za kunankĩla kwigyulu naziishũgamĩĩla, uyo nutengemalia uusiu waakue wende kwitungĩnkana niYelusalemũ;

⁵² nuatuma atumua kuntongela yaakue, naalongola naingĩla mukĩsaalĩ kya Asamalia koona amuzĩpĩlĩlie pakugona.

⁵³ Ĩpa ĩakolakaa sika naamusũgamĩĩlia kunsooko alĩ watungĩnkanagiaa uusiu waakue wende kũYelusalemũ.

⁵⁴ ĩAmanigua aakue uYakobo nuYohana, Pĩna naaona ĩzaasio naaũga; “Shekulu, usiiile kulagĩĩliene umooto utime kwipũna kwigyulu uasonse kĩna uElia naalutendile?”

⁵⁵ Nuapĩlukĩĩla nuatakĩla nuũga, “Sika mumanile inie kĩna muazaa nĩnkolo kĩ.”

⁵⁶ Kuitĩ uMuana-muntu sika alĩ wijile kwioonona uumĩ wa antu ĩpa kukuagũna. Naalongola kukĩsaalĩ kiĩngĩ.

⁵⁷ Pĩna alĩ alonguĩle munzĩla muntu numuĩĩla, “Nĩkakukutiata pensi pĩna ukienda.”

⁵⁸ ũYesu numuĩĩla, “ĩAmulula atĩĩte ĩmalũlũ, ninoni za mukiania zitĩĩte uutimo, ĩpa uMuana-muntu mugila pakugonia ityũe liakue.”

⁵⁹ Numuĩĩla umuua, “Ntiata.” Nuũga, “Shekulu, undeke nende numuĩĩke tangua utata waane.”

⁶⁰ Numuĩĩla, “Aleke ĩakiu aaĩĩke ĩakiu aao, ĩpa ue lenda uutanantie uutemi wa kĩNzua.”

⁶¹ uMuua numuĩĩla; “Shekulu, nĩkakukutiata, ĩpa undeke nende tangua kukualaga ĩaasio a munumba yaane.”

⁶² ũYesu numuĩĩla; “uMuntu nukityapaa igyembe nukwilaaa kunũma sika wijĩpĩĩle uutemi wa kĩNzua.”