Luka 8 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Asungu naalĩ akumutumĩla ũYesu

¹ Pĩna naikĩla yaasio, alĩ wipilima-pilima mukaa numuũishaalĩ nũitanantia iMpola Nanziiza ĩza utemi wa kĩNzua. Nĩaasio naikyumi naabĩlĩ alĩ yĩpalumuĩ ninduyo,

² nĩasungu ĩĩa naalĩ akamigue ĩmasĩĩmuĩ nĩmauluĩle; nĩndĩo alĩ Malia nukuĩtaguaa Magidalene naalĩ mupũnue nĩmasĩĩmuĩ mupũngatĩ,

³ nũJoana umusungu wa kĩKuuza muilisua wa kĩHelode, nuSũsana nĩnaĩngĩ iingĩ naalĩ akumutumĩla kunsao zaao.

Mpiani ya muminzi

⁴ iYũmbĩ kyulu pĩna nalĩlunda, nĩaasio naalĩ apũnile mukaa yensi naamuagaana, nũitambula kumpiani

⁵ “Mumizi alupũnile kwienda kwiminza imbeu zaakue. Nduyo pĩna alĩ wiminza, injia nazigua panzĩla nazitilangĩlua, ninoni za mukiania nazizilĩa.

⁶ iNjia nazigua mwipyampa; pĩna nazilia nazuuma kunsooko ya kuulia uugũndũ

⁷ iNjia nazigua pakatĩ ya miigia, nĩmiigia namaliania ndizo namazishopa.

⁸ iNjia nazigua muulongo nauuza, nazilia nazipĩa mpeke gyana.” Pĩna alĩ witambula izi, nwĩtunta kululi nuũga “Nutĩĩte ĩakutuĩ a kuigĩlia, nũigie.”

⁹ ĩAmanigua aakue naaamukolia ĩndogolelio ya mpiani ĩĩ.

¹⁰ Nuũga, “Inie mwapeegilue kwimana uunkũnkũ wa utemi wa kĩNzua ĩpa naĩngĩ kumpiani, koona naalaaa alekiona, kangĩ naiigia alekilĩnga.

¹¹ Nĩmpiani ĩĩ ĩndogolelio yaakue ntĩĩ, ĩmbeu ingĩ uLukaani lwa kĩNzua.

¹² ĩAasio a panzĩla ingĩ ao naakũigagiaa, paapo nuuza ũShetani nululeegia ulukaani munkolo zaao, alekiizishũĩĩla nukwigũnika.

¹³ Nĩaasio mwipyampa ingĩ aao naakũigagiaa naaluanũnkula ulukaani kuulumbi; nĩndĩo agila kamĩli, naasuĩĩla kwityũngo niino, numwityũngo lya ugemua naĩkamatula.

¹⁴ Nindizo naziguile pakatĩ ya miigia ingĩ aao naakũigagiaa, numulugendo luao naasopua nuukunkunali nuugolĩ, nuwĩloeelia wa uumĩ uu, sika naapĩa kakĩntu.

¹⁵ Nĩzaasio muulongo nauuza ingĩ aao kunkolo nangolokũ nuuuza akũigagiaa ulukaani nukukuluamba, naakupĩĩsagiaa inkali kuugigimĩlia.”

Umanigua kwipũna mumpiani ya ntala

¹⁶ “Kutilĩ nukusonsagiaa ĩntala nukukumĩkũnĩkĩla munsĩ ya kĩseme katia kukumĩĩĩka muulũngũ, ĩpa ukumĩĩĩkaa muuĩĩko wa ntala, itĩ naiingĩla auone uweelu.

¹⁷ Kuitĩ kutilĩ ulukaani nalupisigue nasika lũjilikũnukulua, sunga lwa unkũnkũ nasika lũjile kigyelela nukwipũnĩla kualiĩ.

¹⁸ Ĩlaaĩkiĩ gua kĩna mwiiigia; kuitĩ umukola kĩntu ukiongeeligua nunuasio namugila ĩkĩntu, sunga kĩĩkio nusĩĩgile kĩna utĩĩte ukileegeligua.”

Kĩnũna kya tai

¹⁹ Naamuagana unina nĩanũna aakue, naalemua kukumusũgamĩĩla kunsooko ya mulundo.

²⁰ Nuleetelua impola, nuĩĩlua “uMaau waako nĩanũna aako ĩĩmĩkile panzi asiiile kukĩona ninduue.”

²¹ Nushookeelia nuaĩĩla “uMaau waane nĩanũna aane aao naakũigagiaa ulukaani lwa kĩNzua nukukulutenda.”

ũYesu ukumĩtuulia ĩnzega

²² Lutondo lumuĩ nunankĩla mwipyango umuene nĩamanigua aakue, nuaĩĩla “Kuĩni, kupũũte sunga kwityumbĩ lĩĩa lya nanza.” Naalĩganĩĩlia ipyango, naalongola.

²³ Nĩndĩo pĩna alĩ alonguĩle nugona indoolo, nĩnzega nkulu nĩkũnka munanza sunga ipyango naliandia kukijulaa ĩmaazĩ, naĩĩma muluago.

²⁴ Naamuagaana naamulaĩlia, naaũga, “Shekulu Shekulu, kwikapĩla!” Nulaĩla, numĩtakĩla ĩnzega, nĩmaĩngo ma maazĩ namatuula; naipola naituula dũũ.

²⁵ Nuaĩĩla, “uUsuĩĩli waani wĩĩlĩ mpĩĩ?” Naoopoka naakulĩlua, naĩĩ kĩtambuĩla eene kueene, “Waani uyu, sunga ukumĩlagĩĩlia ĩnzega nĩmaazĩ nĩndayo mamũigĩa.”

uMugelasi munalĩsĩĩmuĩ wikamigua

²⁶ Naapika kunsĩĩ ya Agelasi nĩtungĩnkĩĩne nĩGalĩlaya.

²⁷ Nunduyo pĩna nupika kwityumbĩ, naataagana numuntu wa kaa niasio nutĩĩte masĩĩmuĩ, sika alukĩtũngaa kantiila ntondo ningĩ, sunga sika alukikyalaa munumba ĩpa paibĩĩla.

²⁸ Pĩna numuona ũYesu, nuzogolia nugua ntongela yaakue, nulikitia kululi lukulu, “Kwĩmbii ninduue Yesu, Muana wa kĩNzua nwa kukiania. Nakupeepia ulekinjagia.”

²⁹ Kunsooko alĩ walĩlagĩĩlagiaa ĩlĩsĩĩmuĩ lĩmupũne umuntu nuasio. Kuitĩ alukuambaguaa nĩlĩsĩĩmuĩ nkua ningĩ, sunga nulindĩĩlua mukĩtũngo nukwitũngua ĩmatendele nĩmĩkoa; nutianga iitũngo yaasio, numankangigua nĩlĩsĩĩmuĩ kumbuga.

³⁰ ũYesu numukolia “ĩLiina liako uue waani.” Nuũga “ĩLiina liane neene Legioni;” kunsoko masĩĩmuĩ mingĩ mamũingĩlĩĩle.

³¹ Namamupeepia waleke kumaĩĩla mapũne kwienda kuulungu.

³² Ĩpaasio alĩ lĩkoolĩ dyale lya ngũlũĩ ningĩ naalĩ zidĩĩma munkonko; namamupeepia wamalekele maziingĩle. Numagombia.

³³ ĩMasĩĩmuĩ namamupũna umuntu namingĩla mungũlũĩ, nidyale nalĩtinĩntĩkĩla pigyĩlĩlĩ kuukaaũ sunga munanza, nazikapĩla mumaazĩ sue.

³⁴ ĩAdĩĩmi pĩna naaona naalĩ zitendekile, naamanka naasapatĩlia impola mukaa numũishaalĩ.

³⁵ ĩAntu naapũna ende aone naalĩ zitendekile, naamuagaana ũYesu, naamuona umuntu naaza mupũnue nĩmasĩĩmuĩ wikyalansaa pamĩgulu ya kĩYesu ujialile intiila, waazaa nĩmasala, naoopoka.

³⁶ Nĩaasio naalĩ azioonie ĩzaasio naaaganuĩla kĩna alĩ mukamigue unuasio naalĩ muambue nĩmasĩĩmuĩ.

³⁷ Nĩantu ensi a nsĩĩ nĩpilimĩkĩlĩĩlie ĩAgelasi naamulompa walege kunsiao kuitĩ alĩ ingĩĩlagua nuooa wingĩ; nunankĩla mwipyango, nushooka.

³⁸ Numuntu naalĩ mupũnue nĩmasĩĩmuĩ numupeepia ĩtiate nunduyo, ĩpa numulaga nuũga

³⁹ “Lenda kumuako, uganule namakulu uNzua naazukutendĩĩle. Nulongola nũitanantia mukaa yensi namakulu ũYesu naazumutendĩĩle.”

Wiiukigua wakĩ niYailo nukwikamigua kumusungu naalukupũnagiaa ĩmĩgali

⁴⁰ ũYesu pĩna nushooka, iyũmbĩ nalĩmusũgamĩĩlia kuulumbi kuitĩ tũlũ alĩ atũngĩĩle wapike.

⁴¹ Laaa muntu nuuza, ĩliina liakue Yailo, mukulu wishũnagogi, nugua pamĩgulu ya kĩYesu, numupeepia wapike kunumba yaakue

⁴² kuitĩ alutĩĩte munanso wing'ene, nĩmiaka yaakue alĩ zĩ kyumi nĩbĩlĩ, nduyo alĩ wĩpiipĩ kwikia. Nĩpĩna alulonguĩle, iyũmbĩ nalĩtũla kumuzũga-zũga.

⁴³ Nuuza numusungu naalukupũnagiaa ĩmĩgali miaka kyumi nĩbĩlĩ, sika nusũũma kwikamigua numuntu wensi;

⁴⁴ nuenda kunũma yakue nulĩamba ishogolo lya ntiila yaakue; ĩkamuĩ uupũni wa mĩgali yaakue nautipa.

⁴⁵ ũYesu nuũga, “Waani wampaatia.” Pĩna tũlũ naasiita, uPetelo nuũga “Shekulu, iyũmbĩ lyukupilimĩkĩlĩĩlie nukukukupĩnga-pĩnga.”

⁴⁶ Ĩpa ũYesu nuũga “Ukoolĩ naazumpaatilie, kuitĩ moonie ya kĩna ngũlũ zampũnaa.”

⁴⁷ uMusungu pĩna nuona ya kĩna sika wĩpisile, nupoloka wikĩkĩma, nugua ntongela yaakue, numulondooselia ntongela ya antu tũlũ ĩnsooko ya kumupaatia, nĩkĩna aza mukamigue ĩkamuĩ.

⁴⁸ Numuĩĩla “Maau, uusuĩĩli waako wakukamagia;” lenda nĩmatiliga.

⁴⁹ Pĩna alĩ kĩlĩ witambula, nuuza muntu kwipũna kunumba ya mutemi nuũnga “uMunanso waako wakiaa, leka kumuagia uMumania.”

⁵⁰ Ĩpa ũYesu Pĩna nwigyũlia ĩzaasio, numushookeelia “Lekioopoka, suĩĩla udũũ, ninduyo ukipangata,”

⁵¹ Pĩna nupika kunumba, sika numugombia kaumuĩ wingĩle palumuĩ ninduyo isiititũla uPetelo nuYohana nuYakobo nũshee nunina wa muana.

⁵² ĩAntu tũlũ alĩ ilĩla nukukumulĩĩla ĩsuuka, ĩpa nuũga “Lekilĩlĩ, sikukiile uyu, ĩpa ugonile ndoolo.”

⁵³ Naamusekekia kuitĩ alĩ amanile kĩna ukiile.

⁵⁴ Numũtyapa umukono, nwĩtunta kululi nuũga, “Munanso, uuka!”

⁵⁵ uMuau waakue naumushookela, ĩkamuĩ nuuuka; nulagĩĩlia wapeegue india.

⁵⁶ ĩAleli aakue naakulĩlua; ĩpa nualagĩĩlia aleke kumuĩĩla kaumuĩ naaza zitendekile.